Lɛ̄vi̍ti̍kɔ̍ɔ̄ 2
2
A̍ sa̍lā tɔ̄lɔ̄ɔ̄ ku̍llo̍ o̍kɔ̄ɔ̄
1Mi̍ Mɛ̄lɛ̄ka̍ hīāū lāchī a̍ sūɛ̍i̍, mbo̍ dīmī āā, “Tē wāŋndo̍ o̍ wa̍ hūnɔ̄ɔ̍ a̍ tɔ̄lɔ̄ɔ̄ ku̍llo̍ le̍ sa̍lāa̍ sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, wānā ko̍ŋ ō nɔ̄ mbō bɛ̄ɛ̄ndi̍a̍a̍ tɔ̄lɔ̄ɔ̄ ku̍l ko̍ŋ mbō tōōsi̍a̍a̍ ndu̍ kōlō to̍o̍sīāā bēe̍dīi̍ kɛ̍ndɛ̄ kɛ̍ndɛ̄. O̍ ko̍ŋ kɔ̍ɔ̍lī, mbō tāāli̍a̍a̍ chūɛ̄īmā ɔ̄li̍fīi̍ya̍ŋ lēcho̍ō mbō mūūli̍āŋ, ndu̍yɛ̍ mbō hāndu̍ nyɛ̄m chūŋ kɛ̄ndɔ᷄ŋ lēchōo̍. 2Tē ō chīi̍ ndu̍ bɛ̄ɛ̄ndīāā pɛ̍ kpo̍u̍, o̍ chu̍a̍ ndu̍ o̍ hīŋ a̍ ndu̍ o̍ pūa̍a̍ E̍lɔ̄ŋ nda̍ lo̍, a̍ cho̍ wānāā sōlīāā lāsa̍lāa̍ wa̍. O̍ ko̍ŋ, mī wānā so̍līāā lāsa̍lāa̍ o̍ cho̍ sa̍lāla̍ŋ sōlīo̍o̍ a̍ te̍le̍ŋ ko̍ŋ ndo̍, ō nyɔ̄la̍ kōlō to̍o̍sīāā bēe̍dīi̍ ko̍ŋ bāa̍ cha̍, ō mūūli̍āŋ le̍nde̍ a̍ chūɛ̄īmā ɔ̄li̍fīi̍ya̍ŋ. O̍ ko̍ŋ kɔ̍ɔ̍lī, mbō chūa̍ nyɛ̄m chūŋ kɛ̄ndɛ̄ŋ mu᷅ŋ kpo̍u̍, mbō lōm kōlo̍ tānā ko̍ŋ o̍ ma̍āŋndo̍ chōo̍ a̍ nyɛ̄m chūŋ kɛ̄ndɛ̄ŋ mu᷅ŋ lātūlu̍ o̍ ya̍ Mɛ̄lɛ̄ka̍ lo̍. Sa̍la̍ nɔ̍ mbō lōmnu᷄ŋ o̍ ma̍āŋndo̍ chōo̍ wo̍ o̍ cho̍ ni̍. Ndu̍yɛ̍ tē chūŋ ndɔ̄ɔ̍ o̍ kōma̍l la̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄. 3Tē wānā so̍līāā lāsa̍lāa̍ o̍ chīi̍ kōlo̍ tānā kōŋ sa̍lāa̍ sōlī pɛ̍, ō tɔ᷄ cho̍ lō wo̍, wānāā sōlīāā lāsa̍lāa̍ a̍ fu̍la̍ o̍ yu̍ŋgu̍ E̍lɔ̄ŋ ndo̍ chōo̍ wa̍, nda̍ pūa̍a̍ ndāa̍ nda̍ nɔ̍ ko̍ŋ ni̍. Sa̍lā nya̍ sōli̍ ko̍ŋ o̍ ya̍ Mɛ̍lɛ̍ka̍ Ya̍a̍wɛ̄ɛ̄ lo̍ wo̍, o̍ lēbōllo̍ kpe̍e̍kpe̍i̍ ndu̍ cho̍ o̍ wa᷅ ko̍ŋ le̍ E̍lɔ̄ŋ nda̍ pūa̍a̍ ndūa̍a̍ wo̍ ni̍. 4Tē ō wa̍ pɛ̍ sa̍lā ku̍llo̍ ŋ̄ hīŋ sōlīo̍o̍ ni̍ kɛ̍ mbo̍ wā māā be̍e̍dīi̍ lu̍a̍māā, ō nɔ̄ mbō wa̍ bēe̍dīi̍ nda̍ tōōsīāā ā do̍ū yi̍i̍sīi̍ le̍ wo̍, mbō wa̍ ō tōōsīāā a̍ kōlō kɛ̍ndɛ̄ kɛ̍ndɔ̄ɔ̍. Ndu̍yɛ̍, mbō wa̍ ō mūūli̍āŋ a̍ chūɛ̄īmā ɔ̄li̍fīi̍ya̍ŋ. Tē ko̍ŋ te̍, ō nɔ̄ mbō wa̍ bēe̍dīi̍ fɛ̍fɛ̍dɛ̍ɛ̍ nda̍ tōōsīāā ā do̍ū yi̍i̍sīi̍ le̍ni̍ŋ te̍ wo̍, bēe̍dīi̍ nda̍ tōōsīāā mā tāāli̍a̍a̍ chūɛ̄īmā ɔ̄li̍fīi̍ya̍ŋ le̍chōo̍ wo̍. 5Tē ō wa̍ pɛ̍ sa̍lā ku̍llo̍ wāŋndo̍ hīŋ ni̍, kɛ̍ mbo̍ wā māā bēe̍dīi̍yo̍ ō nda̍ lōm o̍ hɛ̄ŋgɛ̍i̍ kpa̍yāŋndo̍ ni᷄ŋ ndo̍, wānā ko̍ŋ, a̍ kōlō kɛ̍ndɛ̄ kɛ̍ndɔ̄ɔ̍ o̍ nɔ̍ ni̍ mbō tōōsi̍a̍a̍ bēe̍dīi̍yo̍ ho̍ō, mūūli̍āŋndo̍ ndu̍ a̍ chūɛ̄īmā ɔ̄li̍fīi̍ya̍ŋ, ndu̍yɛ̍ ō nɔ̍ mbō dɔ̄ū yi̍i̍sīi̍ o̍ yi̍i̍sīi̍ le̍ni̍ŋ te̍. 6Tē lā bɛ̄ɛ̄ndi̍a̍a̍ bēe̍dīi̍yo̍ ho̍ō pɛ̍, lā yīmi̍ yi̍mi̍ ndu̍ lā tāāli̍a̍a̍ chūɛ̄īmā ɔ̄li̍fīi̍ya̍ŋ lēchōo̍, kāni̍ fu̍u̍le̍, ndu̍ bɛ̍ɛ̍ sa̍lā ku̍llo̍ o̍ cho̍ ni̍. 7Tē ō wa̍ pɛ̍ māā sa̍lā ku̍llo̍ wāŋndo̍ nɔ̄ le̍ sōlīo̍o̍ ni̍, mɛ̄ɛ̍ bēe̍dīi̍ nda̍ bɛ̄ɛ̄ndīāā o̍ hɛ̄ŋgɛ̍i̍ nda̍ bɛ̍ɛ̍ndīāā sa̍lā ku̍llo̍ wo̍ ni᷄ŋ ndo̍ a̍ ndu̍ o̍ nɔ̍ ni̍ mbō sōli̍ sa̍lā kōŋ. Wānā ko̍ŋ a̍ kōlō kɛ̍ndɛ̄ kɛ̍ndɔ̄ɔ̍ o̍ nɔ̍ ni̍ mbō bɛ̄ɛ̄ndi̍a̍a̍ bēe̍dīi̍yo̍ ho̍ō, mūūli̍āŋndo̍ ndu̍ a̍ chūɛ̄īmā ɔ̄li̍fīi̍ya̍ŋ. 8Tē ā bɛ̄ɛ̄ndi̍a̍a̍ sa̍lā ku̍llo̍ ho̍ō le̍ ndu̍ sa̍lāa̍ sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, ā chu̍a̍ ndu̍ ā hīŋ a̍ ndu̍ o̍ wānā so̍līāā lāsa̍lāa̍ lo̍, o̍ ko̍ŋ kɔ̍ɔ̍lī, wānā so̍līāā lāsa̍lāa̍ ō chu̍a̍ ndu̍ ō kūɛ̄ a̍ ndu̍ o̍ ma̍āŋndo̍. 9O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō chūa̍ bēe̍dīi̍ ko̍ŋ ō ti᷄ŋ ō tānāa̍, mbō lōm ndu̍ o̍ ma̍āŋndo̍ chōo̍. Sa̍lā lūāmāa̍ nɔ̍ mbō sōli̍ŋ o̍ ma̍āŋndo̍ chōo̍ wo̍ o̍ cho̍ ni̍. Ndu̍yɛ̍ sa̍lā kōŋ tē chūŋ ndɔ̄ɔ̍ ō kōma̍l la̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄. 10Tē wānā so̍līāā lāsa̍lāa̍ ō sōli̍ sa̍lā ku̍llo̍ o̍ tānā kōŋ sa̍lāa̍ pɛ̍, o̍ tɔ᷄ cho̍ lō wo̍, pu̍a̍a̍ E̍lɔ̄ŋ nda̍ a̍ cho̍ wānāā sōlīāā lāsa̍lāa̍ wa̍ nda̍ nɔ̍ ko̍ŋ ni̍. Sa̍lā lūāmāā nya̍ chō ko̍ŋ so̍lī o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, mi̍ lā wā ō tɔ̄ɔ̍ pūa̍a̍ E̍lɔ̄ŋ nda̍ kīo̍o̍ wo̍, ndu̍ cho̍ ō dīāndāa̍ ya̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l ni̍. 11Ndūyɛ̍ sa̍lā o̍ sa̍lā ku̍lu̍, tē lā wa̍ ndu̍ sa̍lāa̍ sōlīo̍o̍ o̍ ya̍ Mɛ̍lɛ̍ka̍ Ya̍a̍wɛ̄ɛ̄ lo̍ pɛ̍, lā nɔ̍ mī lā dɔ̄ū yi̍i̍sīi̍ o̍ yi̍i̍sīi̍ le̍ni̍ŋ te̍. Kāni̍ fo̍ndōle̍, nyɛ̄ dīāā o̍ nyɛ̄ dīa̍a̍ nɔ̍ yi̍i̍sīi̍yo̍ lēni᷄ŋ kɛ̄lɛ̄ŋgāā mbo̍ nɔ̄ līa̍a̍ŋ lēni᷄ŋ pɛ̍, lā nɔ̍ mī lā lōm ndu̍ o̍ ma̍āŋndo̍ chōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍. 12Lā hūŋ a̍ tɔ̄lɔ̄ɔ̄lā nyāla̍ tāse̍la̍ nya̍ kēēndu̍u̍ o̍ chīɔ̄ɔ̄ŋ nyāa̍ŋ ni᷄ŋ īwɔ̄sī o̍ īwɔ̄sī la̍ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ māā lākē, kɛ̍ o̍ ve᷅ le̍ la̍ŋ lōmɔ̄ɔ̄ o̍ ma̍āŋ chōo̍ le̍. Kēla̍ŋ nda᷅ŋ tē chūŋ ndɔ̄ɔ̍ kōma̍l la̍ pɛ̍, Ya̍ Mɛ̄lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄. 13O̍ ko̍ŋ kɔ̍ɔ̍lī, sa̍lā o̍ sa̍lā ku̍lu̍ tē lā wa̍ ndu̍ sa̍lāa̍ sōlīo̍o̍ o̍ ya̍ lo̍ pɛ̍, lā nɔ̄ mī lā dɔ̄ū hɛ᷄lle̍ lēni᷄ŋ, fo̍ndōle̍, hɛ᷄lle̍ ndi̍ si̍m le̍ kpe̍ma̍ ya̍ Mɛ̍lɛ̄ka̍ yīi̍ a̍ nya̍ wāŋnda̍ I̍sɔ̄lūɛ̄ī wo̍ ni̍. Le̍la̍ŋ, lā so̍lī sa̍lā o̍ sa̍lā ku̍lu̍ o̍ ya̍ Mɛ̍lɛ̄ka̍ lo̍ mī lā kɛ̄ɛ̍ hɛ᷄lle̍ dɔ̄wɔ̄ɔ̄ lēni᷄ŋ te̍. 14O̍ ko̍ŋ kɔ̍ɔ̍lī, wānā o̍ wānā tē a̍ wa̍ hu̍nɔ̄ɔ̍ a̍ nyɛ̄ dīāā ku̍llo̍ o̍ tāse̍ ŋ̄ kōū o̍ chīɛ̄ī nūmnde̍ ni᷄ŋ ndo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, ō tāse̍ ŋ̄ kūāū sɛ̍nɛ̄ī kpe̍e̍kpe̍i̍yo̍, ndu̍ ŋ̄ nɔ̄ ni̍ mā tūɛ̄ī mā hīŋ a̍ ndu̍ o̍ ya̍ lo̍ māā sa̍lā. 15Te̍ a̍ wa̍ hūnɔ̄ɔ̍ a̍ nyɛ̄ dīa̍a̍ ho̍ō pɛ̍, a̍ ha̍ndu̍ chūɛ̄īmā ɔ̄li̍fīi̍ya̍ŋ a̍ nyɛ̄m chūŋ kɛ̄ndɔ᷄ŋ lēchōo̍ ā hīŋ a̍ ndu̍. Kāni̍ fu̍u̍le̍, sa̍lā nyɛ̄ dīāā ku̍llo̍ o̍ cho̍ ni̍. 16O̍ ko̍ŋ, mī wānā so̍līāā lāsa̍lāa̍ o̍ cho̍ sa̍lāla̍ŋ sōlīo̍o̍ a̍ te̍le̍ŋ ko̍ŋ ndo̍, ō nyɔ̄la̍ nyɛ̄ dīāā ku̍l tu̍ɛ̍i̍yāā kōŋ ō ti᷄ŋ, ō mūūli̍āŋ le̍nde̍ a̍ chūɛ̄īmā ɔ̄li̍fīi̍ya̍ŋ, o̍ ko̍ŋ kɔ̍ɔ̍lī, mbō chūa̍ nyɛ̄m chūŋ kɛ̄ndɛ̄ŋ mu᷅ŋ kpo̍u̍ mbō lōm kōlo̍ tānā ko̍ŋ o̍ ma̍āŋndo̍ chōo̍ māā nyɛ̄ dīāā sa̍lā o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍.
Currently Selected:
Lɛ̄vi̍ti̍kɔ̍ɔ̄ 2: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
