Lɛ̄vi̍ti̍kɔ̍ɔ̄ 1
1
A̍ sa̍lālā lūāmāāla̍ŋ o̍kɔ̄ɔ̄
1Mi̍ i̍ yɔ̄nu᷄ŋ, Mūu̍sē wa̍ o̍ tɛ̍ndīi̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ve̍e̍lū ndu̍ mbo̍ sūāā nāa̍ ndu̍ chu̍a̍. Mbo̍ dīmūl ndu̍ āā, 2“Di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ Ya̍a̍wɛ̄ɛ̄ dīmi̍ māā, wānā o̍ wānā tē a̍ wa̍ hūnɔ̄ɔ̍ sa̍lā chɔ̄lōo̍ sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, nāū nu᷄m nūm pi̍la̍a̍ ɔ̄ɔ̄ sāā nu̍mndo̍, ɔ̄ɔ̄ chūīŋ nu᷄m nūm pi̍la̍a̍ kɛ̍sɛ̍ kɛ̍sɛ̍ ndu̍ ŋ̄ hu᷄ŋ ni̍. 3Tē ō wa̍ pɛ̍ māā chɔ̄lūāā nūmnda̍ ō pīlɛ̍ ŋ̄ hīŋ sa̍lā lūāmāa̍ sōlīo̍o̍ ni̍, chɔ̄lū pīāāndōo̍ o̍ nɔ̍ sɔ᷅ŋ o̍ sɔ̄ŋ te̍ wo̍ ndu̍ ŋ̄ hu᷄ŋ ni̍. Ndu̍yɛ̍ tē ā hīŋ a̍ ndu̍ pɛ̍, o̍ dīō tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ŋ̄ yɔ̄ŋgū ndu̍ ni̍, ko̍ŋ to̍sā ni̍ mī bi̍ī sa̍lā nūm ko̍ŋ. 4Tē a̍ wa̍ chɔ̄lōo̍ ho̍ō yɔ̄ŋgōo̍ pɛ̍ a̍ ha̍ndu̍ ndu̍ bāa̍ o̍ lēbōl. O̍ ko̍ŋ, sa̍lā lūāmāā kōŋ ō chō bīīlū, mī ma̍l nu̍m le̍ yɔ̄ŋndā nūmnda̍ wɔ̍ɔ̍ŋnda̍ŋ. 5Tē a̍ yɔ̍ŋgu̍ chɔ̄lōo̍ ho̍ō o̍ tɛ̍ndīi̍ ya̍ Mɛ̍lɛ̄ka̍ Ya̍a̍wɛ̄ɛ̄ wo̍ dīō pɛ̍, a̍ lo̍ o̍ ko̍ŋ ā dīī chɔ̄lōo̍ ho̍ō lo̍ŋ. O̍ ko̍ŋ kɔ̍ɔ̍lī, pūa̍a̍ E̍lɔ̄ŋ nda̍ a̍ cho̍ wānāā sōlīāā lāsa̍lāa̍ wa̍ ā chūa̍ kōo̍ma̍ chɔ̄lū kōŋ ā fāsa̍ŋi̍a̍a̍ ma̍ŋ o̍ ma̍āŋ cho̍ o̍ tɛ̍ndi̍i̍ nūu̍ dīō wo̍ kpēŋgo᷄ŋ vēllāa̍ vēllē. 6O̍ ko̍ŋ kɔ̍ɔ̍lī, nūm wāna̍ ku̍ɛ̄ sa̍lā lūāmāā kōŋ sōlīo̍o̍ wo̍, a̍ so̍li̍ chɔ̄lū ko̍ŋ yāu̍wo̍ ā sɛ̄ŋ, a̍ ki̍li̍ ki̍li̍ ndu̍ kpo̍u̍. 7O̍ ko̍ŋ, mī pūa̍a̍ E̍lɔ̄ŋ nda̍ a̍ cho̍ wānāā sōlīāā lāsa̍lāa̍ wa̍ ā dɔ̄ū yɔ̄mnde̍ o̍ ma̍āŋndo̍ chōo̍ mā kīīsu̍u̍ yīŋnde̍ŋ. 8O̍ ko̍ŋ kɔ̍ɔ̍lī, ma̍ chūa̍ vīsīŋ chɔ̄lū kōŋ lātūlu̍ a̍ bōlle̍ŋ, ndu̍yɛ̍ a̍ chūɛ̄īmā ndūa̍a̍ŋ mā yɛ̄ɛ̄mbu̍u̍ o̍ yɔ̄mīī kēŋ chōo̍. 9Pūlu̍ŋ chɔ̄lū kōŋ ni̍, a̍ pēlūŋ ndɔ̄ɔ̍ŋ kpo̍u̍, nu̍m ku̍ɛ̄ sa̍lā kōŋ sōlīo̍o̍ wo̍, ā nɔ̄ mā tɔ̄ɔ̄ mu̍ŋ a̍ mɛ̄ŋnda̍ŋ, le̍ mī wānāā sōlīāā lāsa̍lāa̍ ā lōm chɔ̄lū kōŋ kpo̍u̍ māā sa̍lā lūāmāā o̍ ma̍āŋndo̍ chōo̍. Sa̍lāa̍ ho̍ō, tē chūŋ ndɔ̄ɔ̍ ō kōma̍l la̍ pɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄. 10Tē chūīŋndo̍ kɛ̄lɛ̄ŋgāā sāa̍ wāŋndo̍ hīŋ le̍ sa̍lā lūāmāa̍ sōlīo̍o̍ ni̍, chɔ̄lū kōŋ ō nɔ̄ mbō wa̍ ō pīāāndōo̍ o̍ nɔ̍ sɔ᷅ŋ o̍ sɔ̄ŋ te̍ wo̍. 11Tē wānā ko̍ŋ ō hīŋ a̍ chɔ̄lōo̍ ho̍ō pɛ̍, ō dīī ndu̍ Mɛ̄lɛ̄ka̍ lāchī o̍ ma̍āŋ ndo̍ kpēŋgēi̍ bā lūāŋndo̍. Tē ō dīī ndu̍ pɛ̍, pūa̍a̍ E̍lɔ̄ŋ nda̍ a̍ cho̍ wānāā sōlīāā lāsa̍lāa̍ wa̍ ā fāsa̍ŋi̍a̍a̍ kōo̍ma̍ chɔ̄lōo̍ ho̍ō o̍ ma̍āŋndo̍ kpēŋgo᷄ŋ vēllāa̍ vēllē. 12O̍ ko̍ŋ kɔ̍ɔ̍lī, mī wānā ko̍ŋ ō sɛ̄ŋ chɔ̄lū kōŋ mbō ki̍li̍ ki̍li̍ ndu̍ kpo̍u̍. Tē ō sɛ̄ŋ ndu̍ pɛ̍, wānāā sōlīāā lāsa̍lāa̍ ā chūa̍ vīsīŋ mu᷅ŋ a̍ bōlle̍ŋ lātūlu̍, ndu̍yɛ̍ a̍ chūɛ̄īmā chɔ̄lū kōŋ ā yɛ̄ɛ̄mbu̍u̍ o̍ yɔ̄mīi̍ cho̍ o̍ ma̍āŋndo̍ chōo̍ ve̍ chōo̍. 13Pūlu̍ŋ chɔ̄lū kōŋ ni̍, a̍ pēlūŋ ndɔ̄ɔ̍ŋ kpo̍u̍, wāna̍ ku̍ɛ̄ sa̍lā kōŋ sōlīo̍o̍ wo̍, ō nɔ̄ mbō tɔ̄ɔ̄ mu̍ŋ a̍ mɛ̄ŋnda̍ŋ. O̍ ko̍ŋ, mī wāna̍ so̍li̍ sa̍lāa̍ wo̍ ō hīŋ a̍ mu̍ŋ kpo̍u̍ mbō lōm mu̍ŋ o̍ yīŋ o̍ ma̍āŋndo̍ chōo̍. Sa̍lāa̍ ho̍ō, tē chūŋ ndɔ̄ɔ̍ ō kōma̍l la̍ pɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.”
14Mi̍ Mɛ̄lɛ̄ka̍ Ya̍a̍wɛ̄ɛ̄ hi̍a̍ū lāchī a̍ sūɛ̍i̍ māā, “Tē yōūwo̍ wāŋndo̍ ō yēēma̍ le̍ sa̍lā lūāmāa̍ sōlīo̍o̍ na̍a̍ ya̍ Mɛ̍lɛ̄ka̍ Ya̍a̍wɛ̄ɛ̄ chu̍a̍ ni̍, yōū kōŋ ō nɔ̄ mbō wa̍ pīīŋndo̍ kɛ̄lɛ̄ŋgāā ka᷅ŋgbo̍ fɔ̍ŋndɔ̍ɔ̍. 15Wānā so̍līāā lāsa̍lāa̍ ō nɔ̄ mbō hīŋ a̍ yōū kōŋ o̍ ma̍āŋndo̍, mbō nyūmbū ndu̍ kɛ̄se̍i̍ mbō sūŋgū ndu̍ bōlle̍ŋ. Tē ō sūŋgū pɛ̍, ō lōm bōllē lēŋ o̍ ma̍āŋndo̍ chōo̍, o̍ ko̍ŋ kɔ̍ɔ̍lī, ō tōsa̍ kōo̍ma̍ yōū kōŋ mā yūēīnu̍ŋ kpo̍u̍ o̍ ma̍āŋndo̍ hōlnɔ᷄ŋndo̍. 16O̍ ko̍ŋ kɔ̍ɔ̍lī, mī wāna̍ so̍līāā lāsa̍lāa̍ ō sōli̍ yōū kōŋ yɔ̍ɔ̍yɔ̍ɔ̍, a̍ nyɛ̄ o̍ nyɛ̍ cho̍ ndu̍ ni᷄ŋ mbō vīōū, o̍ ma̍āŋndo̍ kpēŋgēi̍ pīlɛ̍i̍ kūmbū pāa̍le̍ŋ lē chāŋndo̍, nāa̍ nda̍ vīāū pu᷅lta̍ŋ nda̍. 17Mbō lo̍ o̍ ko̍ŋ mbō sāa̍ yōū kōŋ kūmba᷅ŋnda̍ŋ vēllāa̍ vēllē mbō tɛ̄nda̍ ndu̍ tɛ̄ɛ̄ŋ, kɛ̍ ō ki̍lū kpa̍li̍ le̍. Mbō chu̍a̍ ni̍ko̍ yo̍ū ko̍ŋ, mbō hāndu̍ ndu̍ o̍ yɔ̄mīi̍ cho̍ ke̍ŋ o̍ ma̍āŋndo̍ chōo̍ ve̍ chōo̍, mbō lōm ndu̍ o̍ yīŋ māā sa̍lā lūāmāā. Sa̍lāa̍ ho̍ō, tē chūŋ ndɔ̄ɔ̍ ō kōma̍l la̍ pɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.”
Currently Selected:
Lɛ̄vi̍ti̍kɔ̍ɔ̄ 1: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
