Lɛ̄vi̍ti̍kɔ̍ɔ̄ 3
3
A̍ sa̍lā kɔ̄l nyūlōo̍ o̍kɔ̄ɔ̄
1“Tē wāŋndo̍ yēēma̍ le̍ sa̍lā kɔ̄l nyūlōo̍ sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ a̍ nāūwo̍ pɛ̍, ō sōlī sa̍lā ko̍ŋ a̍ nāū tōōyōo̍, ɔ̄ɔ̄ a̍ nāū lāāndōo̍. Kɛ̍ ō nɔ̍ mbō nɔ̄ sɔ̄ŋ o̍ sɔ̄ŋ te̍. 2Tē wāŋndo̍ ho̍ō ō hīŋ a̍ nāūwo̍ ho̍ō pɛ̍, ō hāndu̍ ndu̍ bāa̍ o̍ lēbōl, o̍ ko̍ŋ kɔ̍ɔ̍lī, ā dīī nāūwo̍ ho̍ō o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ la̍tu̍lu̍ wo̍ sōndōo̍ lo̍ŋ. Tē ā dīī ndu̍ pɛ̍, pūa̍a̍ E̍lɔ̄ŋ nda̍ a̍ cho̍ wānāā sōlīāā lāsa̍lāa̍ wa̍ ā fāsa̍ŋi̍a̍a̍ kōo̍ma̍ nāūwo̍ ho̍ō o̍ ma̍āŋndo̍ kpēŋgo᷄ŋ vēllāa̍ vēllē. 3Chɔ̄lū nda̍ chō ho̍ō dīyɔ̄ɔ̄ le̍ sa̍lā kɔ̄l nyūlōo̍ ho̍ō sōlīo̍o̍ wo̍, ā nɔ̄ mā lōm vīsīŋ chɔ̄lōo̍ ŋ̄ ti᷄ŋ o̍ ma̍āŋndo̍ chōo̍, o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ māā sa̍lā lūāmāā. Vīsīŋ nda̍ nɔ̄ mā lōm o̍ ma̍āŋndo̍ chōo̍ wo̍ŋ mu̍ŋ cho̍ mu᷅ŋ ni̍. Chūɛ̄īma̍ cho̍ nāū kōŋ ni᷄ŋ mā hōlna᷄ŋ o̍ pūlo̍ŋ nda̍ŋ, 4a̍ bɔ̄ŋgu̍ŋ mūu̍ŋ ndo̍ŋ, lātūlu̍ a̍ chūɛ̄īma̍ ho̍lnu̍ŋ bɔ᷅ŋgu̍ŋ mu̍ŋ nda̍ŋ, a̍ yēmi̍i̍ hɔ᷅lle̍, sōlīo̍o̍ ndi̍ le̍nde̍ a̍ bɔ̄ŋgu̍ŋ mūu̍ŋ ndo̍ŋ. 5O̍ ko̍ŋ kɔ̍ɔ̍lī, mī pūa̍a̍ E̍lɔ̄ŋ nda̍ a̍ chō wānāā sōlīāā lāsa̍lāa̍ wa̍ ā chūa̍ vīsīŋ nda̍ chō mu̍ŋ so̍lī wo̍ŋ mā hɛ̄ɛ̄ndu̍u̍ mu̍ŋ o̍ yɔ̄mīi̍ cho̍ o̍ ma̍āŋndo̍ chōo̍ ve̍, mā lōm mu̍ŋ māā sa̍lā lūāmāa̍ o̍ ya̍ Mɛ̍lɛ̄ka̍ lo̍. Kāni̍ fu̍u̍le̍, sa̍lā lūāmāa̍ sa̍lāa̍ ho̍ō ō chō ni̍, ndu̍yɛ̍ tē chūŋ ndɔ̄ɔ̍ kōma̍l la̍ pɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄. 6Tē sāa̍ kɛ̄lɛ̄ŋgāā chūīŋndo̍ wāŋndo̍ ō yēēma̍ sa̍lā lūāmāa̍ sōlīo̍o̍ o̍ ya̍ lo̍ ni̍, wānā ko̍ŋ ō yēēma̍ pɛ̍, ō sōlī o̍ pi̍a̍a̍ndōo̍ ɔ̄ɔ̄ o̍ la̍a̍ndōo̍ o̍ ya̍ lo̍ māā sa̍lā. Kɛ̄ chɔ̄lū ko̍ŋ ō nɔ̍ mbō nɔ̄ sɔ̄ŋ o̍ sɔ̄ŋ te̍. 7Tē sāā fɔ̍ŋndɔ̍ɔ̍ wāŋndo̍ ō hīŋ le̍ sa̍lāa̍ sōlīo̍o̍ a̍ ndu̍ ni̍, wānā ko̍ŋ ō nɔ̄ mbō hīŋ a̍ sāā fɔ̍ŋndɔ̍ ko̍ŋ mbō yɔ̄ŋgu̍ ndu̍ māā kē ya̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. 8Tē wānā ko̍ŋ ō hīŋ a̍ sāa̍ ho̍ō pɛ̍, ō hāndu̍ ndu̍ bāa̍ o̍ lēbōl, o̍ ko̍ŋ kɔ̍ɔ̍lī, ā dīī sāa̍ ho̍ō o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ sōndōo̍. Tē ā dīī ndu̍ pɛ̍, pūa̍a̍ E̍lɔ̄ŋ nda̍ a̍ cho̍ wānāā sōlīāā lāsa̍lāa̍ wa̍ ā lo̍ o̍ ko̍ŋ ā fāsa̍ŋi̍a̍a̍ kōo̍ma̍ sāa̍ ho̍ō o̍ ma̍āŋndo̍ kpēŋgo᷄ŋ vēllāa̍ vēllē. 9O̍ ko̍ŋ kɔ̍ɔ̍lī, sāa̍ nda̍ chō ho̍ō dīyɔ̄ɔ̄ le̍ sa̍lā kɔ̄l nyūlōo̍ sōlīo̍o̍ wo̍, ā nɔ̄ mā lōm vīsīŋ ndɔ̄ɔ̍ŋ ŋ̄ ti᷄ŋ o̍ ma̍āŋndo̍ chōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. Vīsīŋ nda̍ nɔ̄ mā lōm ndo̍ŋ mu̍ŋ cho̍ mu᷅ŋ ni̍. Chūɛ̄īmā sāā ko̍ŋ, a̍ lōmndē tūmndē māchūɛ̄īle̍ŋ, fāŋāa̍ le̍ŋ le̍nde̍ a̍ pɛ̄ŋgu̍ pāā kɔ̄ɔ̍ chɛ̍chɛ̍, a̍ chūɛ̄īma̍ cho̍ ndu̍ ni᷄ŋ mā hōlna᷄ŋ o̍ pūlo̍ŋ nda̍ŋ, 10a̍ bɔ̄ŋgu̍ŋ mūu̍ŋ ndo̍ŋ, a̍ chūɛ̄īma̍ ho̍lnu̍ŋ bɔ᷅ŋgu̍ŋ mu̍ŋ nda̍ŋ, o̍ ko̍ŋ kɔ̍ɔ̍lī, a̍ yēmi̍i̍ hɔ᷅lle̍, sōlīo̍o̍ ndi̍ le̍nde̍ a̍ bɔ̄ŋgu̍ŋ mūu̍ŋ ndo̍ŋ lātūlu̍. 11Tē ā sōli̍ nyɔ̄ɔ̍ŋ mu᷅ŋ pɛ̍ kpo̍u̍, wānā so̍līāā lāsa̍lāa̍ o̍ cho̍ sa̍lāla̍ŋ sōlīo̍o̍ a̍ te̍le̍ŋ ko̍ŋ ndo̍, ō chūa̍ mu̍ŋ ō lōm mu̍ŋ o̍ ma̍āŋndo̍ chōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ māā sa̍lā nyɛ̄ dīāā. 12Tē ō wa̍ pɛ̍ māā chūīŋndo̍ wāŋndo̍ hīŋ sa̍lā ho̍ō sōlīo̍o̍ ni̍, wānā ko̍ŋ ō hu̍ŋ a̍ ndu̍ ya̍ Mɛ̍lɛ̄ka̍ o̍ hɔ̄l, 13mbō hāndu̍ ndu̍ bāa̍ o̍ lēbōl, o̍ ko̍ŋ kɔ̍ɔ̍lī, mā dīī ndu̍ o̍ tɛ̍ndīi̍ chɔ᷅m māā Mɛ̄lɛ̄ka̍ chō a̍ nya̍ la̍tu̍lu̍ wo̍ sōndōo̍. Tē ā dīī ndu̍ pɛ̍, pūa̍a̍ E̍lɔ̄ŋ nda̍ a̍ cho̍ wānāā sōlīāā lāsa̍lāa̍ wa̍ ā lo̍ o̍ ko̍ŋ ā fāsa̍ŋi̍a̍a̍ ko̍o̍ma̍ chūīŋndo̍ ho̍ō o̍ ma̍āŋndo̍ kpēŋgo᷄ŋ vēllāa̍ vēllē. 14O̍ ko̍ŋ kɔ̍ɔ̍lī, chūīŋ nda̍ chō ho̍ō dīyɔ̄ɔ̄ le̍ sa̍lā kɔ̄l nyūlōo̍ sōlīo̍o̍ wo̍, ā nɔ̄ mā lōm vīsīŋ ndɔ᷄ŋ ŋ̄ ti᷄ŋ o̍ ma̍āŋndo̍ chōo̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍. Vīsīŋ nda̍ nɔ̄ mā lōm ndo̍ŋ mu̍ŋ cho̍ mu᷅ŋ ni̍. Chūɛ̄īmā chūīŋ ko̍ŋ ni̍, a̍ chūɛ̄īma̍ cho̍ ndu̍ ni᷄ŋ mā hōlna᷄ŋ o̍ pūlo̍ŋ nda̍ŋ, 15a̍ bɔ̄ŋgu̍ŋ mūu̍ŋ ndo̍ŋ, a̍ chūɛ̄īma̍ ho̍lnu̍ŋ bɔ᷅ŋgu̍ŋ mu̍ŋ nda̍ŋ, o̍ ko̍ŋ kɔ̍ɔ̍lī, a̍ yēmi̍i̍ hɔ᷅lle̍ fāŋāa̍ ndi̍ le̍nde̍ a̍ bɔ̄ŋgu̍ŋ mūu̍ŋ ndo̍ŋ chɛ̍chɛ̍. 16O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō lōm nyɛ̄m mu᷅ŋ o̍ ma̍āŋndo̍ chōo̍ o̍ ya̍ Mɛ̍lɛ̄ka̍ lo̍ māā sa̍lā nyɛ̄ dīāā. Ndu̍yɛ̍ tē chūŋ sa̍lā kōŋ ō kōma̍l la̍ pɛ̍, I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄. Ndu̍yɛ̍ lā sīna̍ pɛ̍ŋgu̍ māā chɔ̄lū o̍ chɔ̄lū nya̍ wa̍ sa̍lāa̍ sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍, chūɛ̄īmā chɔ̄lū kōŋ ki̍nɛ̍i̍, ya̍ Mɛ̍lɛ̄ka̍ Ya̍a̍wɛ̄ɛ̄ nɔ̍ ni̍. 17I̍sɔ̄lūɛ̍i̍nɔ̍ o̍ I̍sɔ̄lūɛ̍i̍nɔ̍, o̍ nɔ̍ mbō dē chūɛ̄īmā chɔ̄lōo̍, kɛ̄lɛ̄ŋgāā kōo̍ma̍ ndūa̍ŋ te̍. Sāwa̍ ya̍ I̍ do̍ū nya̍ ho̍ō wo̍, sāwāa̍ o̍ cho̍ le̍ nya̍ le̍ fɛ̍ɛ̍ŋ a̍ fɛ̍ɛ̍ŋ ni̍, mbō kūɛ̄ le̍nde̍ kɛ᷅ a̍ chūāūwāā nyāā, bā o̍ bā nya̍ wa̍ īchāli̍ pɛ̍.”
Currently Selected:
Lɛ̄vi̍ti̍kɔ̍ɔ̄ 3: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
