Ɛ̍sɔ̍dɔ̍ɔ̄ 8

A̍ mɛ̄ɛ̍ sɔ̄lla̍ chūa̍ lɛ̄ŋndē I̍chi̍pīle̍ŋ kpo̍u̍ yɛ̍ o̍kɔ̄ɔ̄

1O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl vɛ̄lɛ̄ Mūu̍sē āā, “Kɔ̍ nāa̍ māsā bɛ̍ndōo̍ I̍chi̍pī chu̍a̍, mā kɔ̍ di̍mūl ndu̍ māā Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, ‘Ma̍l wa̍nāā nīa̍a̍ mā kūɛ̄ mā kɔ̍ so̍o̍lūū ya̍. 2Tē a̍ me̍l nda̍ le̍, I̍ cho̍ lɛ̄ŋndē I̍chi̍pīle̍ŋ nyɛ̄ pālāa̍ tūsī chōo̍. Sɔ̄lla̍ chō hūnɔ̄ɔ̄ lɛ̄ŋndē I̍chi̍pīle̍ŋ chūā kpo̍u̍. 3I̍ cho̍ tōsā mī sɔ̄lla̍ pɛ̄ Na̍īl o̍ pēēlo̍, mā he᷄l o̍ kɔ̄ŋgɔ̍, mā tūi̍ o̍ lɛ̄ŋndē I̍chi̍pīle̍ŋ ni᷄ŋ kpo̍u̍. O̍ chīɛ̄ī nu̍m lēmāsāa̍ ni̍, o̍ nūmndo̍ chi̍ɛ̍ī ni̍ŋ ni̍, o̍ nūmndo̍ kpēlē ni̍, o̍ chīɛ̄īlā lāŋgba̍ā nu̍m a̍ ka᷅lla̍ ni᷄ŋ ni̍, o̍ chīɛ̄īlā wāŋnda̍ I̍chi̍pī ni᷄ŋ ni̍, o̍ fo̍ndāŋndā nda̍ lūām be̍e̍dīi̍yo̍ la̍ŋ ni̍, ndu̍yɛ̍ a̍ o̍ nyɛ̄m lāāndūŋ nda̍ lūām be̍e̍dīi̍yo̍ wo̍ŋ ni᷄ŋ, lo̍ŋ kpo̍u̍ sɔ̄lla̍ chō wā ā tīūwāā si̍lɔ̍. 4Ndu̍yɛ̍ nya̍ pi̍la̍ bɛ̍ɛ̍ kɛ̍sɛ̍ kɛ̍sɛ̍, nūm ni̍, wāŋnda̍ I̍chi̍pī ni̍, lāŋgba̍ā nūm a̍ ka᷅lla̍ ni̍, sɔ̄lla̍ cho̍ wā nya̍ hēlɔ̄ɔ̍ chōo̍.’ ”

5Ndu̍yɛ̍ mi̍ Mūu̍sē nda̍ E̍lɔ̄ŋ a̍ ku̍ā a̍ yōōŋgōo̍ mɛ̄ɛ̍ Mɛ̄lɛ̄ka̍ dīmu̍l nda̍ yɛ̍. O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Dīmu̍l E̍lɔ̄ŋ mbō yu̍lu̍ tīnda̍ ndɔ̄ɔ̍ o̍ pēēla̍ŋ chōo̍ I̍chi̍pī. I̍ cho̍ tōsā pēē pɔ̍mbɔ̄ ni̍, pēē bɛ̍ndū ni̍, so̍o̍ŋ ko̍lāā ni̍, mī sɔ̄lla̍ fūla̍ o̍ mɛ̄ŋmā māŋ ni᷄ŋ kpo̍u̍, mā he᷄l o̍ kɔ̄ŋgɔ̍ mā tīu̍ o̍ lɛ̄ŋndē I̍chi̍pīle̍ŋ ni᷄ŋ si̍lɔ̍.” 6O̍ ko̍ŋ, mi̍ E̍lɔ̄ŋ yu̍lū tīnda̍ ndɔ̄ɔ̍ o̍ pēēla̍ŋ I̍chi̍pī cho̍o̍. Mɛ̄ɛ̍ o̍ yu̍lu̍, mi̍ sɔ̄lla̍ kāndu̍ fūlāa̍ o̍ pēēla̍ŋ ni᷄ŋ I̍chi̍pī ma̍ tīū o̍ lɛ̄ŋndē I̍chi̍pīle̍ŋ ni᷄ŋ kpo̍u̍. 7Mɛ̄ɛ̍ māsā bɛ̍ndōo̍ I̍chi̍pī wānāā ndūāā ma̍ŋgālāa̍ ā chē vɛ̄lɛ̄ nyɛ̍ yɔ̍nu̍ŋndo̍, nda̍ bɛ̍ɛ̍ ma̍ tōsā o̍ māŋgālā ndāa̍ ni᷄ŋ mi̍ sālla̍ fūla̍ o̍ pēēla̍ŋ ni᷄ŋ.

8Kɛ̍ mɛ̄ɛ̍ sālla̍ ā hīu̍ ni᷅ŋ wāŋnda̍ I̍chi̍pī pālāa̍ te̍i̍, mi̍ māsā bɛ̍ndōo̍ I̍chi̍pī o̍ vēēlū Mūu̍sē nda̍ E̍lɔ̄ŋ, mbo̍ dīmūl nda̍ āā, “Yāndi̍i̍ Mūu̍sē, nyɔ̍ɔ̍lu̍l na̍a̍ Mɛ̄lɛ̄ka̍ Ya̍a̍wɛ̄ɛ̄ ō fāŋa̍l na̍a̍ sɔ̄lla̍ ha̍ā. I̍ cho̍ wānāā nyāa̍ mālɔ̄ɔ̄ mā kɔ̍ so̍lī sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ ndāa̍ lo̍.”

9Mi̍ Mūu̍sē di̍mūl ndu̍ āā, “Bālā tīɔ̍ɔ̍ŋ, I̍ chɛ̍l. I̍ cho̍ Mɛ̄lɛ̄ka̍ pi̍ɛ̍i̍ le̍ nya̍. I̍ cho̍ Mɛ̄lɛ̄ka̍ pīɛ̄ī mbō fāŋa̍ sɔ̄lāa̍ cho̍ ha̍ā o̍ nūmndo̍ chi̍ɛ̍ī ni᷄ŋ, a̍ o̍ chīɛ̄īlā lāŋgba̍ā nūm a̍ ka᷅lla̍ ni᷄ŋ, a̍ o̍ chīɛ̄īlā wāŋnda̍ I̍chi̍pī ni̍ŋ nda̍ŋ. A̍ cho̍ lō wa̍ su̍e̍e̍, mɛ̄ɛ̍ ha̍ā Na̍īl o̍ pēēlo̍. Kɛ̍ chɔ᷄m ya̍ lɔ̍ɔ̄ ŋ̄ yēēma̍ ya̍ mī pi̍ɛ̍i̍ Mɛ̄lɛ̄ka̍ le̍ nya̍ wo̍.”

10Mi̍ Māsā bɛ̍ndōo̍ I̍chi̍pī o̍ di̍mūl ndu̍ āā, “Sīɔ̄dīi̍ ya̍ I̍ ye̍e̍ma̍ ni̍ mā pi̍ɛ̍ī le̍ na̍a̍.”

Mi̍ Mūu̍sē di̍mūl ndu̍ āā, “Bālā tīɔ̍ɔ̍ŋ, I̍ chɛ̍l. I̍ cho̍ tōsā mɛ̄ɛ̍ ŋ̄ dīmi̍ yɛ̍. Nūm pi̍la̍ bɛ̍ɛ̍ ā chō chɔ̄ māā mɛ̄lɛ̄ka̍ o̍ mɛ̄lɛ̄ka̍ cho̍ māā Mɛ̄lɛ̄ka̍ Ya̍a̍wɛ̄ɛ̄, o̍ cho̍ Mɛ̄lɛ̄ka̍ nāā wo̍ le̍. 11Sīɔ̄dīi̍, o̍ nūmndo̍ chi̍ɛ̍ī ni᷄ŋ ni̍, o̍ chīɛ̄īlā lāŋgba̍ā nūm a̍ ka᷅lla̍ ni᷄ŋ ni̍, a̍ o̍ chīɛ̄īlā wāŋnda̍ I̍chi̍pī ni̍ŋ kpo̍u̍, sɔ̄lla̍ chō mālɔ̄ɔ̄. A̍ chō lō wa̍ su̍e̍e̍ mɛ̄ɛ̍ ha̍ā Na̍īl o̍ pēēlo̍.” 12O̍ ko̍ŋ, Mūu̍sē nda̍ E̍lɔ̄ŋ, ma̍ fāŋa᷄ŋ ma̍sā bɛ̍ndōo̍ o̍ hɔ̄l lo̍ŋ, ma̍ mīīŋgū. Mi̍ Mūu̍sē pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄ le̍ mbo̍ fāŋa̍ māsā bɛ̍ndōo̍ nyɛ̄ pālāā sɔ̄lla̍ ha̍ā chōo̍. 13Ndu̍yɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī Mūu̍sē dīōm, mbo̍ tōsā sɔ̄lāa̍ wa̍ o̍ lɛ̄ŋndē I̍chi̍pīle̍ŋ ni᷄ŋ nda̍ kpo̍u̍ ma̍ wū. A̍ wa̍ chīɛ̄īla̍ŋ ni᷄ŋ nda̍ ni̍, a̍ wa̍ chīɛ̄īla̍ŋ lā bālāā wa̍, a̍ ha̍ā o̍ chīɔ̍ɔ̍ŋ ni᷄ŋ, nda̍ kpo̍u̍, ma̍ wū. 14Mi̍ wāŋnda̍ I̍chi̍pī a̍ dīū dīū sɔ̄la̍a̍ vi̍lɛ̍i̍ya̍ ha̍ā ku̍ndālā bɛ̄ndūla̍ŋ. Lɛ̄ŋndē I̍chi̍pīle̍ŋ kpo̍u̍ mi̍ lē fūlā chūŋ wɔ̄ɔ̍ŋndo̍ a̍ sɔ̄lāā vi̍lɛ̍i̍ya̍. 15Kɛ̍, mɛ̄ɛ̍ Māsāa̍ I̍chi̍pī o̍ che᷅ māā sɔ̄lāa̍ wa̍ nda̍ pālāa̍ wa̍ ā chūū wu᷄ kpo̍u̍, mbo̍ hīāū lāchī a̍ bōllē kālāle̍ŋ tōsāa̍, ō ye᷄ŋ Mūu̍sē nda̍ E̍lɔ̄ŋ lānī le̍. Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ yɛ̍, le̍nde̍ ko̍ni̍ i̍ yɔ̍nu̍ŋ ni̍.

A̍ mɛ̄ɛ̍ chu̍ndo̍o̍ sīmnu᷄ŋ nya̍ā kīsīa̍a̍ I̍chi̍pī yɛ̍ o̍kɔ̄ɔ̄

16O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Di̍mu̍l E̍lɔ̄ŋ ō lɔ̍ɔ̍ chu̍ndo̍o̍ lɛ̄ŋ a̍ tīnda̍ cho̍ ndu̍ o̍ bā wo̍. Tē ō lɔ̄ɔ̄ pɛ̍, chu̍ndo̍o̍ o̍ lɛ̄ŋndē I̍chi̍pīle̍ŋ ni᷄ŋ ō chō chɔ̄nɔ᷄ŋ o̍ hūēīye̍ ni᷄ŋ, mbō sīmnu᷄ŋ nya̍ā kīsīa̍a̍.” 17O̍ ko̍ŋ, mi̍ Mūu̍sē di̍mūl E̍lɔ̄ŋ, mi̍ E̍lɔ̄ŋ lu̍a̍ā chu̍ndo̍o̍ lɛ̄ŋ a̍ tīnda̍ ndɔ̄ɔ̍. Mɛ̄ɛ̍ o̍ lɔ̍ɔ̄, chu̍ndo̍o̍ o̍ lɛ̄ŋndē I̍chi̍pīle̍ŋ ni᷄ŋ kpo̍u̍, mbo̍ māŋga᷄ŋ nya̍ā kīsīa̍a̍. Mi̍ nyāā kīsīa̍a̍ ha̍ā ā tīū o̍ lɛ̄ŋndēŋ I̍chi̍pīle̍ŋ ni᷄ŋ kpo̍u̍. Wāŋnda̍ chīe̍e̍ya̍ ni̍, chɔ̄lūa̍a̍ ni̍, mi̍ nyāā kīsīa̍a̍ ha̍ā ā tīū nda̍ lēkɔ̄ɔ̍ si̍lɔ̍. 18Mɛ̄ɛ̍ māsā bɛ̍ndōo̍ wānāā ndūāā māŋgālāa̍ ā chē vɛ̄lɛ̄ nyɛ̄ Mūu̍sē nda̍ E̍lɔ̄ŋ a̍ to̍sa̍ wo̍, nda̍ bɛ̍ɛ̍ ma̍ kīndī kīndī o̍ nɛ̄ī o̍ nɛ̄ī ni̍ŋ le̍ mā māŋga̍la̍ nyāā kīsīa̍a̍, kɛ̍ ā nɔ̍la̍ le̍. Mi̍ nyāā kīsīa̍a̍ ha̍ā ā tīū bā o̍ bā fe̍e̍ o̍ lɛ̄ŋndē I̍chi̍pīle̍ŋ ni᷄ŋ. 19Mi̍ wānāā māŋgālāa̍ ha̍ā lō o̍ ko̍ŋ, ma̍ dīmūl māsāa̍ I̍chi̍pī āā, “He̍ī ndi̍ ō cho̍ wāna̍ chi̍e̍e̍ le̍ to̍sa̍ ndi̍ le̍. Mɛ̄lɛ̄ka̍ kpe̍e̍kpe̍i̍ to̍sa̍ ndi̍ ni̍.” Kɛ̍ a̍ ko̍ŋ kpo̍u̍, mi̍ māsāa̍ I̍chi̍pī ō hīāū lāchī a̍ bōllē kālāle̍ŋ tōsāa̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ yɛ̍, māsā bɛ̍ndōo̍ I̍chi̍pī o̍ ye᷄ŋ Mūu̍sē nda̍ E̍lɔ̄ŋ lānī le̍.

Pēŋgi̍a̍a̍ hɛ̄lū lɛ̄ŋndē I̍chi̍pīle̍ŋ

20O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Māsāa̍ I̍chi̍pī o̍ cho̍ lākɔ̄ sīɔ̄dīi̍ Na̍īl o̍ pēēlo̍. Le̍la̍ŋ tē pāa̍le̍ŋ lē sɛ̄ sīɔ̄dīi̍ pɛ̍, nūm ni̍, E̍lɔ̄ŋ ni̍, lā pēna̍ chɔ̍nɔ᷄ŋ mī lā kōma̍l ndu̍ bōōndi̍i̍ o̍ cho̍ wa̍ kɔ̄la̍ŋ o̍ pēēlo̍ ve̍. O̍ ko̍ŋ, mī lā kɔ̍ di̍mūl ndu̍ māā ya̍ Mɛ̍lɛ̄ka̍ Ya̍a̍wɛ̄ɛ̄ I̍ di̍mi̍ a̍a̍, ‘Ma̍l wānāā nīa̍a̍ mā kūɛ̄ mā kɔ̍ so̍o̍lūū ya̍. 21Tē a̍ me̍l nda̍ le̍, I̍ cho̍ lɛ̄ŋndē I̍chi̍pīle̍ŋ nyɛ̄ pālāa̍ chēle̍ŋ tūsī chōo̍. I̍ cho̍ tōsā mī pēŋgi̍a̍a̍ chūa̍ lɛ̄ŋnde̍ŋ nde᷅ŋ kpo̍u̍. Pēŋgi̍a̍a̍ wā ni̍ŋ o̍ lɛ̄ŋnde̍ŋ nde᷅ŋ ni᷄ŋ ha̍a̍a̍, nūm ni̍, lāŋgba̍ā nūm a̍ ka᷅lla̍ ni̍, a̍ wāŋnda̍ I̍chi̍pī, pēŋgi̍a̍a̍ chō hūnɔ̄ɔ̄ wā o̍ chīɛ̄īlā nyāla̍ŋ ni᷄ŋ kpo̍u̍, mā tīū si̍lɔ̍. Ā chō hūnɔ̄ɔ̄ tīū a̍ lɛ̄ŋ kpo̍u̍. 22Kɛ̍, būŋgɛ̄i̍ Ku̍u̍sīɛ̄ŋnde̍ ki̍nɛ̍i̍, nāa̍ wāŋnda̍ I̍sɔ̄lūɛ̄ī a̍ cho̍ wa̍, I̍ cho̍ tōsā pēŋgi̍a̍a̍ cho̍ wa᷅ lo̍ŋ te̍. O̍ ko̍ŋ, mī chɔ̍m nya̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, māā o̍ lɛ̄ŋnde̍ŋ nde᷅ŋ ni᷄ŋ bɛ̍ɛ̍, I̍ nɔ̍ kpāāyāa̍. 23I̍ cho̍ yɛ̍ yi̍ɔ̍ɔ̍ chɔ̄m, wānāa̍ nīa̍a̍ tɛ̄ɛ̄ŋ a̍ wānāā nūmnda̍. Pāa̍le̍ sīɔ̄dīi̍ le̍ŋ kpe̍e̍kpe̍i̍ sūɛ̍i̍ ka̍a̍mɛ̍i̍ he̍ī ī chō yɔ̄nɔ᷄ŋ ni̍.’ ” 24Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ Mɛ̄lɛ̄ka̍ Ya̍a̍wɛ̄ɛ̄ to̍sā nyɛ̄ o̍ di̍mi̍ wo̍. Mbo̍ yɔ̄ŋ pēŋgi̍a̍a̍, ma̍ tīū lɛ̄ŋndē I̍chi̍pīle̍ŋ kpo̍u̍. Māsā bɛ̍ndōo̍ I̍chi̍pī chīɛ̄ī ndɔ̍ lēmāsāa̍ ni̍, a̍ chīɛ̄īlā wānāā ndūāā bɛ̍ndūa̍a̍, mi̍ pēŋgi̍a̍a̍ hīālū kpo̍u̍. Lɛ̄ŋndē I̍chi̍pīle̍ŋ kpo̍u̍, mī le̍ tāmbū a̍ pēŋgi̍a̍a̍.

25O̍ ko̍ŋ kɔ̍ɔ̍lī, mi̍ māsā bɛ̄ndōo̍ I̍chi̍pī o̍ ve̍e̍lū Mūu̍sē nda̍ E̍lɔ̄ŋ, mbo̍ dīmūl nda̍ āā, “La̍ kɔ̍ mī lā kɔ̍ so̍lī sa̍lāla̍ŋ o̍ Mɛ̄lɛ̄ka̍ nyāa̍ lo̍ o̍ lɛ̄ŋnde̍ŋ nde᷅ŋ ni᷄ŋ.”

26Kɛ̍ mi̍ Mūu̍sē di̍mūl ndu̍ āā, “Ō bɛ̍ndā mī ŋ̄ sōli̍ sa̍lāla̍ŋ na̍ŋnu᷄ŋ o̍ Mɛ̄lɛ̄ka̍ Ya̍a̍wɛ̄ɛ̍ nāa̍ lo̍ le̍, kāni̍ fo̍ndōle̍, sa̍lālā nāāla̍ na̍a̍ ŋ̄ sōlī la̍ŋ, lā cho̍ sa̍lālā wāŋnda̍ I̍chi̍pī a̍ ye̍e̍mā bɛ̍ɛ̍ mā chē le̍. Tē wāŋnda̍ I̍chi̍pī a̍ che᷅ na̍a̍ sa̍lālā wāā le̍nde̍ so̍līo̍o̍ pɛ̍, ā chō na̍a̍ vīī vīī a̍ pōūta̍ŋ mā dīu̍ na̍a̍. 27Le̍la̍ŋ, ma̍l na̍a̍ mī ŋ̄ kūɛ̄ kɔ̄lā ti᷅ŋ pālɛ̍i̍ ya̍a̍ o̍ po̍llo̍ ni᷄ŋ mī ŋ̄ kɔ̍ so̍lī sa̍lāla̍ŋ lo̍ŋ nāa̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ chūā, mɛ̄ɛ̍ o̍ di̍mu̍l na̍a̍ yɛ̍.”

28Mi̍ māsā bɛ̍ndōo̍ I̍chi̍pī di̍mī āā, “Bālā tīɔ̍ɔ̍ŋ, I̍ chɛ̍l. I̍ cho̍ nya̍ mālɔ̄ɔ̄ mī lā kūɛ̄ o̍ po̍llo̍ ni᷄ŋ mī lā kɔ̍ so̍lī sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ nyāa̍ lo̍. Kɛ̍ ndu̍yɛ̍, lā hi̍ū lākɔ̄ la̍nda̍ŋ te̍. Le̍la̍ŋ, kɔ̍ mā kɔ̍ pīɛ̍i̍ Mɛ̄lɛ̄ka̍ le̍ na̍a̍ mbō fēŋa̍l na̍a̍ pēŋgi̍a̍a̍ ha̍ā.”

29Mi̍ Mūu̍sē di̍mūl ndu̍ āā, “I̍ chɛ̍l. Tē I̍ ma̍l dɔ̍ɔ̍ na̍nu᷄ŋ pɛ̍, I̍ cho̍ lākɔ̄ Mɛ̄lɛ̄ka̍ Ya̍a̍wɛ̄ɛ̄ pīɛ̄ī le̍ nya̍. Ndūyɛ̍, sīɔ̄dīi̍ pēŋgi̍a̍a̍ cho̍ o̍ nūmndo̍ chi̍ɛ̍ī ni᷄ŋ nda̍, a̍ ha̍ā o̍ chīɛ̄īlā lāŋgba̍ā nūm a̍ ka᷅la̍ ni᷄ŋ, a̍ ha̍ā o̍ chīɛ̄īlā wāŋnda̍ I̍chi̍pī ni̍ŋ, pēŋgi̍a̍a̍ ka̍ŋ kpo̍u̍ ā chō mālɔ̄ɔ̄. Kɛ̍ ndu̍yɛ̍, lo̍ ni᷅ŋ o̍ lēdīōm mā ma̍l wāŋnda̍ ha̍ā mā kɔ̍ so̍lī sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍.”

30O̍ ko̍ŋ, mi̍ Mūu̍sē cha̍ŋ mbo̍ mīīŋgū. Mɛ̄ɛ̍ o̍ mi̍i̍ŋgu̍, mbo̍ kɔ̍ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄ le̍ wāŋnda̍ I̍chi̍pī. 31Ndu̍yɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lī pīɛ̄īlē ndɔ̄le̍ŋ. Pēŋgi̍a̍a̍ ku̍ndāa̍ bɛ̄ndūa̍a̍ wa̍ o̍ lɛ̄ŋndē I̍chi̍pīle̍ŋ ni᷄ŋ nda̍, a̍ wa̍ o̍ māsā bɛ̍ndōo̍ lo̍ chīɛ̄ī ni̍ŋ nda̍ ni̍, a̍ ha̍ā o̍ chīɛ̄īlā wānāā ndūāā bɛ̍ndūa̍a̍ ni᷄ŋ, a̍ ha̍ā o̍ chīɛ̄īlā wāŋnda̍ I̍chi̍pī ni̍ŋ, mi̍ Mɛ̄lɛ̄ka̍ tōsā ma̍ māl kpo̍u̍, ō pīlɛ̍ bɛ̍ɛ̍ lo̍ le̍. 32Kɛ̍ a̍ ko̍ŋ kpo̍u̍, māsāa̍ I̍chi̍pī o̍ chɛ̍l mbō ma᷄l wāŋnda̍ I̍sɔ̄lūɛ̄ī mā kūɛ̄ le̍. Mbo̍ hīāū lāchī a̍ bōllē kālāle̍ŋ tōsāa̍.

Currently Selected:

Ɛ̍sɔ̍dɔ̍ɔ̄ 8: YM

Highlight

Copy