Ɛ̍sɔ̍dɔ̍ɔ̄ 7

1Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl ndu̍ āā, “Bu̍u̍la᷄ŋ te̍. Tē ō wa̍ māā yɔ̄ŋɔ̄ɔ̄ pɛ̍, nu᷄m cho̍ wā sɔ̍ŋgɔ̍ ya̍ Mɛ̄lɛ̄ka̍ wo̍ nāa̍ māsāa̍ I̍chi̍pī chūa̍ ni̍. Mī E̍lɔ̄ŋ bɛ̍nūm ndu̍ wa̍ māā wāna̍ su̍a̍ā le̍ Mɛ̄lɛ̄ka̍ wo̍ mbō sōō sōndō nūmndo̍. 2Le̍la̍ŋ, nyɛ̄ o̍ nyɛ̍ ya̍ I̍ cho̍ nu̍m dɔ̄wɔ̄ɔ̄ o̍ sōndō le̍ māsāa̍ I̍chi̍pī dīmūllo̍, di̍mu̍l E̍lɔ̄ŋ bɛ̍nūm mbō kūɛ̄ mbo̍ kɔ̍ hi̍vī dīōmndā lāŋ māsāa̍ bɛ̍ndōo̍ I̍chi̍pī o̍ lānī, mbō dīmu̍l ndu̍ le̍ mbō ma᷄l wāŋnda̍ I̍sɔ̄lūɛ̄ī mā fūla̍ o̍ lɛ̄ŋndē ndɔ̄le̍ŋ ni᷄ŋ. 3Kɛ̍, I̍ cho̍ māsā bɛ̍ndōo̍ I̍chi̍pī bōlle̍ŋ kīndī, mī tōsa̍ ō ye᷅ŋ nya̍ lānī le̍. I̍ cho̍ tāāmāsi̍la̍ bɛ̍ndūla̍ŋ chɔ̄m, ndu̍yɛ̍ mī to̍sa̍ ka̍a̍ma̍ālā bɛ̄ndūla̍ŋ o̍ lɛ̄ŋndē I̍chi̍pīle̍ŋ ni᷄ŋ. 4Kɛ̍ a̍ ko̍ŋ kpo̍u̍, ō ye᷅ŋ ni̍ŋ nya̍ lānī le̍. O̍ ko̍ŋ, mī tu̍si̍ lɛ̄ŋndē I̍chi̍pīle̍ŋ kpo̍u̍ nyɛ᷅ pālāa̍ bɛ̄ndōo̍ chōo̍, mbō fūūlu̍u̍ nda̍ sōndōo̍ lɛ̄ŋ mɛ̍ɛ̄. Tē I̍ tu̍si̍ I̍chi̍pī nyɛ̄ pālāā bɛ̄ndōo̍ chōo̍ pɛ̍, māsā bɛ̍ndōo̍ I̍chi̍pī ō cho̍ chɛ̄lɔ̄ɔ̄ mbō ma᷄l wānāā nīa̍a̍, mī so̍li̍ wāŋnda̍ I̍sɔ̄lūɛ̄ī a̍ yu̍ŋgu̍la̍ ndāla̍ŋ kpo̍u̍. 5Lɔ̍ɔ̍ ya̍ I̍ cho̍ wāŋnda̍ I̍chi̍pī nyɛ̄ pālāā bɛ̄ndōo̍ tūsī chōo̍, mī so̍lī wāŋnda̍ I̍sɔ̄lūɛ̄ī I̍chi̍pī wo̍, te̍le̍ŋ ko̍ŋ wāŋnda̍ I̍chi̍pī a̍ cho̍ sīnā ni̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.” 6O̍ ko̍ŋ, Mūu̍sē ni̍, E̍lɔ̄ŋ ni̍, ma̍ tōsā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ yɛ̍. 7Ndu̍yɛ̍ a̍ te̍le̍ŋ nda̍ kūɛ̄ kɔ̄lā la̍ŋ a̍ yōōŋgōo̍ ho̍ō nāa̍ māsā bɛ̍ndōo̍ I̍chi̍pī chu̍a̍ wo̍, Mūu̍sē o̍ wa̍ wɔ̄sīla̍ŋ be̍le̍-ŋɔ̍ma̍a̍ (80), mī E̍lɔ̄ŋ ndu̍ wa̍ wɔ̄sīla̍ŋ be̍le̍-ŋɔ̍ma̍a̍ a̍ lā yāa̍ (83).

Tīnda̍ E̍lɔ̄ŋ ndo̍ ō māŋga̍ŋ kɛ̍ūwo̍

8Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē nda̍ E̍lɔ̄ŋ āā, 9“Mūu̍sē, tē lā kɔ̍ di̍mūl māsā bɛ̍ndōo̍ I̍chi̍pī nyɛ̄ ya̍ I̍ di̍mu̍l nya̍ wo̍ pɛ̍, mbō nyūna̍ nya̍ le̍ mī lā chɔ᷄m tāāmāsi̍ o̍ tāāmāsi̍ o̍ chɔ᷅m māā ya̍ ve᷅m nya̍ ni̍ wo̍ pɛ̍, a̍ di̍mu̍l E̍lɔ̄ŋ ō ma᷄l tīnda̍ cho̍ ndu̍ o̍ bā wo̍ lɛ̄ŋ māsā bɛ̍ndōo̍ I̍chi̍pī lāchī. O̍ ko̍ŋ, I̍ cho̍ tōsā mī tīnda̍ ko̍ŋ ō sīmnu᷄ŋ kɛ̍ūwo̍.” 10O̍ ko̍ŋ kɔ̍ɔ̍lī, mi̍ Mūu̍sē nda̍ E̍lɔ̄ŋ a̍ ku̍ā nāa̍ Māsā bɛ̍ndōo̍ I̍chi̍pī chu̍a̍, ma̍ kɔ̍ do̍o̍nu᷄ŋ ndu̍ ko̍na̍ a̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍. Ndu̍yɛ̍ mi̍ E̍lɔ̄ŋ o̍ ma᷅l tīnda̍ wa̍ ndu̍ o̍ bā wo̍ lɛ̄ŋ māsā bɛ̍ndōo̍ lāchī nda̍ lāŋgba̍ā ndūāā ka᷅lla̍. O̍ ko̍ŋ, mi̍ tīnda̍a̍ ho̍ō sīmnu᷄ŋ kɛ̍ūwo̍. 11Mɛ̄ɛ̍ māsāa̍ I̍chi̍pī o̍ che᷅ nyɛ̄ yɔ̍nu̍ŋ ndo̍, ndu̍ bɛ̍ɛ̍ mbo̍ vēēlū wānāā ndūa̍a̍ kɔ̄l kālu̍a̍a̍, a̍ wānāā ndūa̍a̍ ma̍ŋgālāa̍ le̍ mī nda̍ bɛ̍ɛ̍ ma̍ hu᷄ŋ ma̍ŋgālā kɛ̄ūwa̍. 12Ndu̍yɛ̍, nda̍ bɛ̍ɛ̍ mɛ̄ɛ̍ ndā hīŋ ma̍ hu᷄ŋ ma̍ŋgālā kɛ̄ūwa̍. Mɛ̄ɛ̍ nda̍ mɛ̄li̍ tīnda̍la̍ ndāla̍ŋ, mi̍ tīnda̍la̍ ndāla̍ŋ lā sīmnu᷄ŋ kɛ̍ūwa̍. Kɛ̍, mi̍ kɛ̄u̍ E̍lɔ̄ŋ ndo̍ ō mīsī mīsī kɛ̄ūwāā ndāa̍ ka̍ŋ kpo̍u̍. 13Kɛ̍ a̍ nyɛ᷄ yɔ̍nu̍ŋ ko̍ŋ ndo̍ kpo̍u̍, māsā bɛ̍ndōo̍ I̍chi̍pī o̍ ye̍ŋ Mūu̍sē nda̍ E̍lɔ̄ŋ lānī le̍. Mbo̍ hīāū lāchī a̍ bōllē kālāle̍ŋ tōsāa̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ yɛ̍.

A̍ kpūndɛ̍la̍ yɔ̍nu̍ŋ I̍chi̍pīla̍ŋ o̍kɔ̄ɔ̄

A̍ mɛ̄ɛ̍ mɛ̄ŋnda̍ŋ mā sīmnu᷄ŋ ko̍o̍wa̍ŋ I̍chi̍pī yɛ̍

14Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Nyɛ̄ ya̍ di̍mu̍l nu̍m a̍ māsā bɛ̍ndōo̍ I̍chi̍pī o̍kɔ̄ɔ̄ wo̍, ndu̍ o̍ ka̍ndu̍ ho̍ō tōsāa̍ ni̍. Mi̍ di̍mūl nu̍m māā ō chō bōllē kālā le̍ŋ tōsā, mbō kɛ̍ɛ̍ māā o̍ me̍l wāŋnda̍ I̍sɔ̄lūɛ̄ī mā kūɛ̄ le̍. 15Kɛ̍ nyɛ̄ ya̍ I̍ cho̍ nu̍m dīmūllo̍, ndu̍ cho̍ ho̍ō ni̍. Sīɔ̄dīi̍, māsā bɛ̍ndōo̍ I̍chi̍pī ō nɔ̄ le̍ kɔ̄la̍ŋ Na̍īl o̍ pēēlo̍. Le̍la̍ŋ, tē pāa̍le̍ŋ lē sɛ̄ pɛ̍, nūm ni̍, E̍lɔ̄ŋ ni̍, lā kūɛ̄ lā kɔ̍ chu᷅m ndu̍ o̍ pēē ko̍ŋ kɔ̍ŋgɔ̍. Ndu̍yɛ̍, tē lā wa̍ kɔ̄la̍ŋ pɛ̍, tīnda̍ nya̍ ma᷄l ko̍ŋ lɛ᷅ŋ mbo̍ sīmnu᷄ŋ kɛ̍ūwo̍ wo̍, lā kūɛ̄ a̍ ndu̍ o̍ bā. 16Tē lā kūɛ̄ pɛ̍ a̍ di̍mu̍l māsāa̍ I̍chi̍pī āā, ‘Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ Hi̍būlūi̍ya̍ ā pīɛ̄īyo̍, ō vēm ya̍ nāa̍ nūm chūa̍ māā ya̍ I̍ di̍mu̍l nu̍m, mī nūm ma̍l wānāā ndūa̍a̍ mā kɔ̍ so̍o̍lūū ndu̍ o̍ po̍llo̍ ni᷄ŋ. Kɛ̍ ma̍ kɛ̄ɛ̄ māā a̍ me᷅l nda̍ le̍. Ndu̍yɛ̍, mɛ̄ɛ̍ na̍a̍ ŋ̄ sūāā nu̍a̍ā yɛ̍ bɛ̍ɛ̍ ā chō wɔ̄ lēchōo̍. 17Le̍la̍ŋ, ya̍ŋ ni᷅la̍ŋ mā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍. Mɛ̄lɛ̄ka̍ di̍mi̍ māā, ō cho̍ nu̍m chɔ̄m māā ndu̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, a̍ nyɛ̄ o̍ cho̍ tōsā wo̍. Le̍la̍ŋ, si̍m mā chē nyɛ̄ cho̍ yɔ̄nɔ᷄ŋndo̍. I̍ cho̍ mɛ̄ŋnda̍ŋ o̍ Pīo̍o̍ Na̍īl lɔ̄ɔ̄ a̍ tīnda̍a̍ ho̍ō ya̍ o̍ bā. Tē I̍ lɔ̍ɔ̄ ma̍ŋ pɛ̍, mɛ̄ŋnda̍ŋ ma᷅ŋ kpo̍u̍ mā chō sīmnu᷄ŋ ko̍o̍wa̍ŋ kpo̍so̍ŋ. 18Sūū o̍ sūū cho̍ Na̍īl o̍ pēēlo̍, ō pīlɛ̍ bɛ̍ɛ̍ ō cho̍ lo᷅ yo̍o̍mū le̍. Ndu̍yɛ̍, mɛ̄ŋnda̍ŋ o̍ Pīo̍o̍ Na̍īl kpo̍u̍ mā chō hūnɔ̄ɔ̄ chūŋ yɛ̄so̍o̍ fūlā. Wāŋnda̍ I̍chi̍pī a̍ nɔ̍lā ni̍ŋ mā ko᷄l mɛ̄ŋnda̍ŋ ma᷅ŋ te̍.’ ”

19O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Di̍mu̍l E̍lɔ̄ŋ ō yūlū tīnda̍ ndɔ̄ɔ̍ o̍ pēēla̍ŋ I̍chi̍pī. Pēē pɔ̍mbɔ̄ ni̍, pēē bɛ̍ndū ni̍, so̍o̍ŋ ko̍lāā ni̍, kpo̍u̍ ō yūlu̍ tīnda̍ ndɔ̄ɔ̍ lēchōo̍. Tē ō yūlū pɛ̍, mɛ̄ŋnda̍ŋ o̍ fo̍ndāŋndā lāŋ kpo̍u̍, mā chō sīmnɔ᷄ŋ ko̍o̍wa̍ŋ kpo̍so̍ŋ. Mɛ̄ŋma̍ cho̍ bɛ̍ɛ̍ o̍ nyɛ̄m lāāndūŋ yɛ̍ yi̍ɔ̍ɔ̍ŋ ni᷄ŋ, mi̍ ŋ̄ wā ŋ̄ tōōsīāā a̍ yɔ̄mnde̍, ndu̍yɛ̍ a̍ pōūta̍ŋ ndo̍ŋ, ma̍ŋ kpo̍u̍ mā chō sīmnɔ᷄ŋ ko̍o̍wa̍ŋ.”

20O̍ ko̍ŋ, nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē nda̍ E̍lɔ̄ŋ, ma̍ tōsā. Ma̍ kūā o̍ Pīo̍o̍ Na̍īl, ma̍ kɔ̍ di̍mūl māsā bɛ̍ndōo̍ I̍chi̍pī nyɛ̄ o̍ nyɛ̄ Mɛ̄lɛ̄ka̍ dīmu̍l nda̍. O̍ ko̍ŋ, mi̍ E̍lɔ̄ŋ o̍ he̍e̍lū tīnda̍ ndɔ̄ɔ̍ mbo̍ lūāā mɛ̄ŋnda̍ŋ Na̍īl o̍ pēēlo̍, ma̍sā bɛ̍ndōo̍ I̍chi̍pī nda̍ lāŋgba̍ā ndūāā ka᷅lla̍ kpo̍u̍ o̍ hɔ̄l lo̍ŋ. O̍ ko̍ŋ, mɛ̄ŋma̍ wa̍ Na̍īl o̍ pēēlo̍ wa̍ŋ kpo̍u̍, mī mā sīmnu᷄ŋ ko̍o̍wa̍ŋ kpo̍so̍ŋ. 21O̍ ko̍ŋ kɔ̍ɔ̍lī, sūūwa̍ Na̍īl o̍ pēēlo̍ kpo̍u̍ ma̍ wū. Mi̍ mɛ̄ŋnda̍ŋ mā fūlā chūŋ yɛ̄so̍o̍, wāŋnda̍ I̍chi̍pī nda̍ a̍a̍ nɔ̍lā ma̍ŋ kōlɔ̄ɔ̄ le̍. Ndūyɛ̍ mɛ̄ŋnda̍ŋ I̍chi̍pī kpo̍u̍, mi̍ mā sīmnu᷄ŋ ko̍o̍wa̍ŋ kpo̍so̍ŋ. 22Kɛ̍ māsāa̍ I̍chi̍pī bɛ̍ɛ̍, mi̍ wānāā ndūāā mɛ̍ŋgɛ̄lāa̍ ā sīīŋgūū mɛ̄ŋnda̍ŋ kōo̍wa̍ŋ o̍ māŋgālā ndāa̍ ni᷄ŋ. Ndu̍yɛ̍ mi̍ māsā bɛ̍ndōo̍ I̍chi̍pī o̍ hi̍a̍ū lāchī a̍ bōllē kālāle̍ŋ tōsāa̍, mbo̍ hīāū bɛ̍ɛ̍ māā pāāndū. Ō chɛ᷄l mbō ya᷄ŋ nīla̍ŋ o̍ nyɛ̄ Mūu̍sē nda̍ E̍lɔ̄ŋ a̍ di̍mu̍l ndu̍ wo̍ le̍. Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ yɛ̍, le̍nde̍ ko̍ni̍ i̍ yɔ̍nu̍ŋ ni̍. 23A̍ ka̍a̍ma̍ā Mūu̍sē nda̍ E̍lɔ̄ŋ a̍ to̍sa̍ ko̍ŋ ndo̍ kpo̍u̍, ō ye᷄ŋ nda̍ lānī le̍. Mbo̍ mūli᷄ŋ, mbo̍ kūānu᷄ŋ o̍ chīɛ̄ī ndɔ̄ɔ̍. 24Wāŋnda̍ I̍chi̍pī nda̍ a̍a̍ nɔ̍lā mī nda̍ a̍a̍ ko̍l mɛ̄ŋnda̍ŋ o̍ Pīo̍o̍ Na̍īl le̍. O̍ ko̍ŋ, ma̍ kāndū so̍o̍ŋnda̍ŋ tōūwɔ̄ɔ̍ o̍ Pīo̍o̍ Na̍īl kɔ̍ŋgɔ̍ le̍ mɛ̄ŋmā kōla̍ŋ.

25Chɔ̍ŋ a̍ pāa̍le̍ Mɛ̄lɛ̄ka̍ tōsa̍ mi̍ Pīo̍o̍ Na̍īl o̍ si̍mnu᷄ŋ ko̍o̍wa̍ŋ nde̍ŋ, ō chūa̍ pālɛ̍i̍ ī ŋɔ᷄mmɛ̍ū mɛ̄ŋnda̍ŋ mā wa̍ le̍nde̍.

Currently Selected:

Ɛ̍sɔ̍dɔ̍ɔ̄ 7: YM

Highlight

Copy