Romàtɔwo 9
9
Mawu be dùkɔ̃ cãcãa
1Nyè mu le ɖà àjè ò; ènu kè mù le gblɔ̃a, nyàwo be nyi lè Kristò mè, ɖo *jìjigbè nyè le ɖù ɖase na mù lè Gbɔ̃gbɔ̃ Kɔ̀kɔ̀ɛ a mè, ku kãkã ɖo e ji: 2mù ɖɔ ku àkpɔ̃ gã ɖe, eye èjì nyè le sè veve wè sia wè. 3E jro mù ŋutɔ cã be, ɖo nɔ̀vi nyè kèwo nyi àpe xòmètɔwo lè ŋutilã mèawo taa, Mawu ne sɛ̃kpɛ̃ na mù fàa, ne bèa klã mù jo lè Kristò ŋuti gbɔ̀xue. 4Đo woawo ye nyi Izràɛlvi kèwo Mawu cãawo, eye woawo ye trɔ zũ èviawo. E ɖè yebe gogo fiɔ wo, ɖù èzò vòvòwo ku wo. Woawo ye Mawu sɔ yebe èsea na, be fiɔ wo àlekè wo la sɛ̃ ɛ̀ ɖoa be èmɔnu. Woawo ke ye be fìã àjɔ̀gbèwo na. 5Wo jɔ̀ so tɔgbe xɔ̀ nyikɔwo mè, eye woawo mè ye Kristò jɔ̀ so, sìgbè àgbètɔ kè pòta na ènuwo kpataa nène. Woa na gogo Mawu kaka sɔ yì! * Àmèn.
6Mawu be ènyàa mu trɔ zũ ènugbalo gbɔ̀xue ò, ɖo mu nyi àmè kèwo jɔ̀ lè Izràɛl be xòmè mèawo kpata ye nyi Izràɛlvi ŋutɔ-ŋutɔawo ò. 7Àmè kèwo cã jɔ̀ so Abràham mèawo kpata mu nyi yebe èvi ŋutɔ-ŋutɔawo ò, ɖo Mawu gblɔ̃ na Abràham be: “Izàk be jìjimèviwo ye la nyi èvi wòwo.” 8E gɔ̃mè ye nyi be, mu nyi èvi kèwo Abràham jì sìgbè àgbètɔ nèneawo ye nyi Mawu be èviwo ò. Vɔ̀ bòhũa, ekèwo Mawu fìã na ɛ̀, gbɔ̀xue be jìawo ye nyi yebe jìjimèviwo. 9Ènyà kè Mawu gblɔ̃ sɔ fìã àjɔ̀gbè na ɛ̀a ye nyi be: “Èpè kèa, be hùenu kèa, mù la trɔ va, eye Sarà la jì ŋusùvi.”
10Mu nyi ekèa ɖèɖe kpò ye ò. Nène a ke ye be nyi na Rebekà cã. Mia kpata, mia tɔgbe Izàk, kpò be fɔ èfu na. 11Gãkea, mu kpɔ jì ɖèviawo ò, eŋuã, ɖèviawo cã mu kpɔ wɔ̀ ènu vuɛ̃, àlo ènu nyuɛ̃, gbɔ̀xue, àleke be Mawu ŋutɔ be ɖoɖɛ ne nɔ̀ ànyi kaka sɔ yì, ɖoɖɛ kè zɔ̃ ɖo ye ŋutɔ be èjro ji, 12mu nyi lè èdɔwɔ̀wɔ mè ò, vɔ̀a so Àmè kè le yɔa gbɔa, wo gblɔ̃ na ɛ̀ be: “Àmègãxoa la sumɔ vifɛ̃a.” 13Sìgbè àlekè wo ŋlɔ̀ ɛ̀ ɖɛ nènea be:
“Mù lɔ̃ Yakɔb, vɔ̀a mù crì Esaò ya.”
14Nukɛ mi la gblɔ̃ so ekèa ŋuti ò? Be Mawu cã wɔ̀nà ènu màjɔ̀màjɔa? Aò! Gbèɖe! 15Đo e gblɔ̃ na Mosè be: “Àmè kè mù ji be ma ku ŋuzĩzĩ na a, ye mù la ku ŋuzĩzĩ na, eye kɔ̀bɛ la bà mù ɖo àmè kè ŋuti mù jro be kɔ̀bɛ ne bà mù ɖoa ŋuti.” 16Nène a be, mu nyi àmè ɖe be èjro, àlo yebe àgbàgba jèje ŋuti ye cãcãa kù ɖo ò, vɔ̀ bòhũ, àlekè Mawu kuna ŋuzĩzĩ na àmè ɖoa ŋuti be kù ɖo. 17Nène a, Ŋɔ̀ŋlɔ̃ a gblɔ̃ na Faraɔ̀n be: “Ènu kè ŋuti koŋu ye mù sɔ wò ɖo èfìɔ ɖoa ye nyi be, mù la to ji wò, la ɖè àpe ŋusɛ̃ fiɔ, àleke be àpe nyikɔ ne gbãkpe ànyigbã bliboa kpata ji.” 18Ye ŋutia Mawu kuna ŋuzĩzĩ na àmè kè be jro be yèa ku ŋuzĩzĩ na a, eye e trìnà èjì na àmè kè be jro be yèa trì èjì na a.
Mawu dona àdɔ̀mèze gãke kuna ŋuzĩzĩ na àmè
19Àmè ɖe la biɔ mù be: “Ne e lè nènea, eŋuã nukɛ ŋuti Mawu gbà donahùɛ do àmè ɖo ò? Àmè kɛ ye la teŋu sitè ɖo yebe èjro ŋuti ò?” 20Èwò àgbètɔ, àmè kɛ wò nyi, ne wòa pò nupo ɖo Mawu ŋuti nènea ò? Ènu kè wo wɔ̀a la teŋu biɔ àmè kè wɔ̀ ɛ̀a be: “Nukɛ ŋuti wò wɔ̀ mù àlekea ɖo ò a?” 21Èzemètɔa#9.21 Èzemètɔ: àmè kè wɔ̀nà èze kudo ànyikɔa. mu kpɔ èmɔ la sɔ ànyikɔ, kè be nyà, eye be mlìa, la sɔ mè ènu kè be jro òa? Mu la teŋu sɔ ànyikɔ kè be nyàa, eye be mlìa be ɖe, la mè èze tɔ̀xɛ ɖe, kè la nya kpɔkpɔ, vɔ̀a e la sɔ ekè kpɔ̀tɔ̀a mè èzè ɖe kpò cã òa?
22Ne e nyi be Mawu la ɖè àdɔ̀mèze ku ŋusɛ̃ fiɔ àmè kèwo ŋuti be do àdɔ̀mèze ɖo, kèwo la crɔ̃ godoo, vɔ̀a, e gbà gbɔ̃ èjì ɖɛ blɛ̀wù, eye be le wo ɖotè, hùenu dìdì ɖe a, ènyà kɛ ye lè àsi wò ò? 23To ekèa mèa, Mawu ji be yèa ɖè àdɔ̀kùnu kèwo lè yebe gogo mèawo be èɖe fiɔ mi, àmè kèwo be kuna ŋuzĩzĩ naawo jè ŋùkɔ̀; 24mi àmè kèwo ye ŋutɔ yɔ so Yudàviwo kudo àmè kèwo mu nyi Yudàvi òawo dòmè, eye e jrà mi ɖo ɖɛ, be mia va xɔ̀ gogo kèa. 25E gblɔ̃ lè Òzea be xoma mè be:
“Dùkɔ̃ kè mu nyi dùkɔ̃ nyè òa ye mù la yɔ be
dùkɔ̃ nyè.
Àmè kèwo nyè mu lɔ̃ ò a, wo ye mù la yɔ be
lɔ̃lɔ̃tɔ nyèwo.
26Àfi kè wo gblɔ̃ na wo lè be:
'Mì mu nyi dùkɔ̃ nyè ò a',
funua ke ye wo la yɔ wo lè be
Mawu àgbèagbèa be èviwo.”
27Izràɛl ŋuti ye Ezayà do àpa ɖo be: “Ne Izràɛlviwo sùgbɔ sìgbè àpùtakɔ nène ŋutɔ cã a, àmè vi ɖe kpò ye wo la hlùɛ̃ gã lè woa dòmè, 28ɖo Tɔhonɔ̀ la ɖo kòjo na àmè kèwo kpata lè ànyigbã jiawo pɛpɛpɛ kudo àlɔ̀ sɔ̀sɔɛ.” 29Ezayà gbà gblɔ̃ ɛ̀ ɖɛ be:
“Ne Àhùadù Tɔhonɔ̀a mu gble
jìjimèvi ɖewo ɖɛ na mi òa,
mi kè trɔ sìgbè Sodɔ̀m
be èdùa nène, eye mi kè ɖì Gòmɔrà be èdùa.”
Hlùɛ̃gãa mu nyi Izràɛlviwo ɖèɖe tɔ̀ ò
30Nukɛ ŋutɔ ye mi la gblɔ̃ ò? Be dùkɔ̃ bu#9.30 Àgbàlè: àmè kèwo mu nyi Yudàvi òawo. kèwo mu le jè àgbàgba be yèwoa wɔ̀ ènu jɔ̀jɔɛ òawo va trɔ zũ àmè jɔ̀jɔɛwo, ɖo xɔ̀sè kè lè woa sia ŋuti. 31Vɔ̀ Izràɛlvi kèwo le jè àgbàgba be yèwoa wɔ̀ ɖo èsea ji, la nɔ̀ jɔ̀jɔ̀ɛawo mu teŋu wɔ̀ ɖo e ji ò. 32Nukɛ ŋuti ye ò? Đo wo mu sɔ xɔ̀sè, sɔ ji ènu kè wo jia ò, vɔ̀ bòhũa, wo dojì ɖo woa ŋutɔwo be àgbàgba jèje ŋuti. Nène a, wo klɛ̃ èkpe#9.32 Klɛ̃ èkpe: klɛ̃ àfɔ̀ àlo jè ànyi., 33sìgbè àlekè wo ŋlɔ̀ ɛ̀ ɖɛ nènea be:
“Kpɔɖa, mù ɖo àfɔ̀klɛ̃kpe, àkpã
kè àmè la klɛ̃, la jè ànyia ɖo Ziɔ̀n.
Àmèwo la klɛ̃ èkpe kèa, la jè ànyi.
Vɔ̀, àmè kèwo xɔ̀ e ji sèawo
mu la ɖù ŋùkpɛ̃ ò.”
Mina Bible © Bible Society of Togo, 2014.