Romàtɔwo 8
8
Gbɔ̃gbɔ̃ Kɔ̀kɔ̀ɛ be àmè ɖèɖe
1So fifìa, hùɛgbledo ɖekpe mu gbà lè na àmè kèwo lè Yesù Kristò mè ò. 2Đo Gbɔ̃gbɔ̃ Kɔ̀kɔ̀ɛ be *èse kè nana àgbè lè Yesù Kristò mèa, na mi vò lè èvuɛ̃ kudo èku be èsea si. 3Ènu kè glo èsea, wàlɛbɛ kè ŋutilã xɔ̀ ŋusɛ̃ lè e sia, Mawu ya wɔ̀ ɛ̀. Đo ènuvuɛ̃ ŋutia, E dɔ̃ ye ŋutɔ Èvia ɖoɖa, be sɔ miabe èvuɛ̃ be ŋutilãa be nɔ̀nɔmè. E gblehùɛ do ènuvuɛ̃ lè ŋutilã mè, 4ne jɔ̀jɔɛnyinyi kè jè na èsea, bèa zɔ̃ sù lè mi, àmè kèwo mu zɔ̃nà lè ŋutilã be èse gɔ̃mè ò, vɔ̀ lè Gbɔ̃gbɔ̃ Kɔ̀kɔ̀ɛ tɔ̀a mè. 5Nyàwo ye be nyi be, àmè kèwo lè ŋutilã be èse gɔ̃mèawo jènà ŋutilã be ènuwo yomè, vɔ̀a àmè kèwo lè Gbɔ̃gbɔ̃ Kɔ̀kɔ̀ɛ a be *èse gɔ̃mèawo jènà Gbɔ̃gbɔ̃ a be ènuwo yomè. 6Ŋutilãnuwo yomè jèje a nyi èku, vɔ̀, Gbɔ̃gbɔ̃ Kɔ̀kɔ̀ɛ mè-nuwo yomè jèje a nyi àgbè kudo fàfa. 7Đo ŋutilã be èjrowo nyi àglajèje ɖo Mawu ŋuti; mu lɔ̃nà bɔ̀bɔ̀nà ɖo Mawu be èse gɔ̃mè ò. Mu la teŋu ì ŋutɔ cã ò. 8Lè ŋutilã be èse gɔ̃mèa, àmè ɖekpe mu la teŋu jè Mawu be ŋùmè ò.
9Vɔ̀a, mìawo yaa, mì mu lè ŋutilã be èse gɔ̃mè ò, kè#8.9 Ŋɔ̀ŋlɔ̃ ɖewo gblɔ̃ be: ne Mawu be Gbɔ̃gbɔ̃ a lè mìa mè nyàwo a. Mawu be Gbɔ̃gbɔ̃ lè mìa mèa. Mawu be Gbɔ̃gbɔ̃ be èse gɔ̃mè ye mì lè. Ne àmè ɖe mu ɖo Kristò be Gbɔ̃gbɔ̃ òa, àmèa mu nyi Kristòtɔ̀ ò. 10Ne Kristò lè mìa mèa, nyàwo be nyi be mìabe ŋutilãa la ku ɖo ènuvuɛ̃ ŋuti, vɔ̀a Gbɔ̃gbɔ̃ Kɔ̀kɔ̀ɛ a ye nyi mìabe àgbè ɖo jɔ̀jɔɛ nyinyi ŋuti. 11Ne Mawu kè fɔ̃ Yesù Kristò so èkuwodea be Gbɔ̃gbɔ̃ lè mìa mèa, Mawu kè fɔ̃ Yesù Kristò so àmè kukuwo dòmèa la na àgbè mìabe ŋutilã kukuwo, to yebe Gbɔ̃gbɔ̃ kè lè mìa mèa ji.
12Ye ŋutia, nɔ̀viwo, èfɛ̃ lè mia ŋuti; vɔ̀ mi mu ɖù èfɛ̃ do ŋutilã, ne mia nɔ nɔ̀ àgbè lè ŋutilã mè ò. 13Đo ne mì lè àgbè lè ŋutilã mèa, mì la ku. Vɔ̀a ne, to Gbɔ̃gbɔ̃ a be ŋusɛ̃ ji, mì wù ŋutilã be nuwɔ̀nàawoa, mì la nɔ̀ àgbè. 14Àmè kèwo Mawu be Gbɔ̃gbɔ̃ le kplɔ̀awo ye nyi Mawu be èviwo. 15Mu nyi Gbɔ̃gbɔ̃ kè la sɔ mì wɔ̀ kluviwo, la trɔ sɔ vɔ̃vɔ̃ va mìa mèa ye mì xɔ̀ ò. Vɔ̀a Gbɔ̃gbɔ̃ kè sɔ mì wɔ̀ èviwo, eye be le na mì ŋusɛ̃, be mia do àpa be: “Abà, Àta!” 16Gbɔ̃gbɔ̃ kèa ŋutɔ ɖù ɖase na miabe gbɔ̃gbɔ̃ be, mi nyi Mawu be èviwo. 17Ne mi nyi èviwoa, mi nyi ècrɔ̃ɖùtɔwo cã. Mawu be ècrɔ̃ɖùtɔwo, ècrɔ̃ɖùtɔwo kudo Kristò, ɖo ne mi ɖù àyà kudo èa, mi la kpɔ gomè lè yebe gogoa cã mè.
Gogo kè la ɖɛ vaa
18Mù susu be xixe kèa mè be àyàɖùɖuwo mu sù ne woa sɔ wo sɔ̀ ku gogo kè wo la va ɖè fiɔ lè mia mèa ò. 19Đo a, Mawu be ènuɖoɖowo le nɔ̀tè veve ɖe kpɔ Mawu be èviwo be ɖèɖèfiɔ, 20ekè wo sɔ ènuɖoɖoawo ɖo ènumàɖìnuwo be èse gɔ̃mè, mu nyi lè ènuɖoɖoawo ŋutɔ be lɔ̃lɔ̃ nu ò, vɔ̀a, lè àmè kè do wo àsia be ŋusɛ̃ mè, ènuɖoɖoawo cã le kpɔ èmɔ, 21ɖo wo la ɖè woawo cã to lè gbegble be kluvi nyinyi mè, ne woawo cã woa kpɔ mamã lè Mawu be èviwo be vòvò be gogo mè. 22Ɛ̃ mi nya ɛ̀ be Mawu be ènuɖoɖowo kpata le ŋɛ̃, eye wo le le èku, kaka va na fifì. 23Mu nyi woawo ɖèɖe kpò ye ò: mi, àmè kèwo ɖo Gbɔ̃gbɔ̃ Kɔ̀kɔ̀ɛ be èkusɛ̃sɛ̃ cucugbã tɔ̀awo cã, mi le ŋɛ̃ lè miabe èjì mè, le nɔ̀tè kpɔ miabe èvinyinyi, miabe ŋutilã be hlùɛ̃gã. 24Đo a, wo hlùɛ̃ mi gã, gãkea lè ŋùɖo mè ye. Vɔ̀a, ne wo le kpɔ ènu kè wo lè ŋùɖo mè naa, mu gbà nyi be wo lè ŋùɖo mè ke ò. Ènu kè wo le kpɔa, àleke wo la gbà teŋu nɔ̀ ŋùɖo mè na ɛ̀ ɖo ò? 25Vɔ̀a, ne mi le ɖoŋù ɖo ènu kè mi mu le kpɔ òa ŋutia, mi le nɔ̀tè kpɔ ɛ̀ kudo veve do ènu.
26Nène a ke ye Gbɔ̃gbɔ̃ Kɔ̀kɔ̀ɛ a cã va dona àlɔ̀ mi, lè miabe gbɔ̀jɔ̀gbɔjɔ mè, ɖo, mi mu nya àlekè mi ɖo la nɔ̀ fãkue ɖo ò. Gbɔ̃gbɔ̃ a ŋutɔ blìbɔ̀nà ɖo mia ta kudo àlenana kè wo mu teŋu gblɔ̃ òa. 27Eye àmè kè kãnà àmèwo kpata be èjì mè kpɔa, nya Gbɔ̃gbɔ̃ Kɔ̀kɔ̀ɛ a be susu, ɖo Gbɔ̃gbɔ̃ a blìbɔ̀nà ɖo àɖèsãmewo ta, zɔ̃ ɖo Mawu be èjro ji.
28Mi gbà nya cã be ènu sia ènu hɛ̃nà ènyuɛ̃ vana na àmè kèwo lɔ̃nà Mawu a, àmè kèwo be yɔ, zɔ̃ ɖo yebe ɖoɖo nua. 29Àmè kèwo bè jèsi ɖɛawo, e cã wo ɖɛ ne woa nɔ̀ sìgbè Èvia be ŋùfɛ̃ nène, ne bèa nyi ŋùkɔ̀gbevi na nɔ̀vi sùgbɔ. 30Àmè kèwo be cã ɖɛawo ye be gbà yɔ. Àmè kèwo be yɔawo ye be gbà ɖè kunù na. Àmè kèwo be ɖè kunù naawo ye be gbà na gogo.
Mawu be lɔ̃lɔ̃ lòlò loò
31Ènyà kɛ ye mi la gbà gblɔ̃ ò? Ne Mawu lè mia jia, àmè kɛ ye la sitè ɖo mia ŋuti ò? 32Àmè kè mu gbe ye ŋutɔ be Èvi sɔsɔ na ò, vɔ̀ e sɔ ɛ̀ na fàa, ɖo mia kpata mia taa, leke wɔ̀ ye, mu la sɔ ènuwo keŋu kpe ɖo e ŋuti na mi ò? 33Àmè kɛ ye la dohùɛ do Mawu be àmè cãcãwo ò? Mawu ye ɖènà kunù! 34Àmè kɛ ye la gblehùɛ do wo ò? Yesù Kristò ku, wu ekèa, e fɔ̃ so èku, eye be lè Mawu be ɖùsi mè, le blìbɔ̀ ɖo mia ta#8.34 Ŋɔ̀ŋlɔ̃ ɖewo gblɔ̃ be: Yesù Kristò kè kua? Wu ekèa…! 35Àmè kɛ ye la klã mi jo lè Kristò be lɔ̃lɔ̃ a ŋuti ò? Èfũkpekpe, àlo veve sèse ye à? Yomètĩtĩ àlo àdɔ̀ wù àmè ye à? Èhiã, àfɔ̀ku àlo èku ye à? 36Sìgbè lekè wo ŋlɔ̀ ɛ̀ ɖɛ be:
“Èwò ŋuti ye wo le wù mi ɖo,
so ŋùkèkè yì ŋùkèkè.
Wo bù mi kpò sìgbè àlɛ̃
kèwo wo kplɔ̀ yìnà wùwùgbea nène.”
37Lè ekèawo keŋu mèa, mi wu èjiɖùtɔwo ŋutɔ cã, to àmè kè lɔ̃ mia ji. 38Ɛ̃ɛ, mù kã ɖo e ji be èku, àlo àgbè, àtikplɔtɔwo, àlo jiɖùɖuwo, ènu kèwo lè fifìawo, àlo ekèwo la ɖɛ vaawo, ŋusɛ̃wo, 39ekèwo lè èji hũi, àlo ekèwo lè ègũwo be ètù mè, àlo ènuɖoɖo buwo, ènu ɖekpekpe mu la teŋu klã mi jo lè Mawu be lɔ̃lɔ̃ kè be ɖè fiɔ lè mia Tɔhonɔ̀ Yesù Kristò mèa ŋuti ò!
Mina Bible © Bible Society of Togo, 2014.