Romàtɔwo 10
10
1Nɔ̀viwo, ènu kè mù le ji veku-veku so èjì mè, eye ekè ŋuti mù le ɖè kuku na Mawu ɖoa ye nyi be woa hlùɛ̃ Izràɛl cã gã. 2Mù la teŋu ɖù ɖase so woa ŋuti be wo dona veve Mawu sùmɔ̀-sumɔ vɔ̀, ɖe kpò wo mu nya ènu so àlekè wo la sumɔ ɛ̀a ŋuti nyuɛ̃ ɖe ò. 3Đo ekè wo dã Mawu be jɔ̀jɔɛnyinyia, eye wo le ji la sɔ woa ŋutɔwo be jɔ̀jɔɛnyinyia ɖotèa, wo mu bɔ̀bɔ̀ èta ɖo Mawu be jɔ̀jɔɛnyinyia gɔ̃mè ò. 4Đo Kristò ye va xɔ̀ ŋusɛ̃ lè èsea si, ne woa bù àmè ɖekpekpe àmè kè gbe xɔ̀sè kpòa, àmè jɔ̀jɔɛ.
Xɔ̀sè ye la na hlùɛ̃gãa
5Ènu kè Mosè ŋlɔ̀ ɖɛ, sɔ kù ɖo lekè wo la teŋu nɔ̀ jɔ̀jɔɛ ɖo, sɔ zɔ̃ ɖo èsea jia, ye nyi: “Àmè kè wɔ̀nà ɖo èsea jia la nɔ̀ àgbè, to èsea ji.” 6Vɔ̀a jɔ̀jɔɛnyinyi kè so xɔ̀sè mèa gblɔ̃ be: “Mù gbà gblɔ̃ lè àpo èjì mè be: àmè kɛ ye la yì jiŋùkusi ò?” (Ekèa la nyi be woa yì kplɔ̀ Kristò va); 7àlo be: “Àmè kɛ ye la ɖì yì èkuwode ò?” (Ekèa la nyi be woa yì kplɔ̀ Kristò to lè àmè kukuwo dòmè va). 8Vɔ̀, ènyà kɛ ŋùkumè ye be le gblɔ̃ ò? E be: “Mawu be ènyàa mu dìdì lè gbɔ wò ò; e lè àpo ènu mè kudo àpo èjì mè.” Eye nyi xɔ̀sè kè be àŋɛ̀ mi le do a. 9Ne wò hũ e mè ku àpo ènu be Yesù ye nyi Tɔhonɔ̀a, eye ne wò xɔ̀sè lè àpo èjì mè be, Mawu fɔ̃ ɛ̀ so àmè kukuwo dòmèa, wo la hlùɛ̃ wò gã. 10Đo èjì mè ye xɔ̀sè sona, eye Mawu nana jɔ̀jɔɛ àmè kè xɔ̀sèa. Eye ènu ye wo sɔ hũnà e mè, eye Mawu hlùɛ̃nà àmè kè xɔ̀sèa gã. 11Đo Ŋɔ̀ŋlɔ̃ a gblɔ̃ be: “Àmè sia àmè kè xɔ̀ e ji sè a, mu la ɖù ŋùkpɛ̃ ò.” 12Vòvò toto ɖekpe mu lè Yudàvi kudo àmè#10.12 Grik: àgbàlè. kèwo mu nyi Yudàvi òawo dòmè lè ègo kèa mè ò, ɖo Tɔhonɔ̀ ɖèka kpò ye lè woa kpata si, eye e wɔ̀nà nyuɛ̃ na àmè kèwo keŋu fã yɔ ɛ̀awo. 13Eye, mawunya gbà gblɔ̃ be: “Àmè sia àmè kè la fã yɔ Tɔhonɔ̀ be nyikɔa, wo la hlùɛ̃ ɛ̀ gã.”
14Vɔ̀a, àleke ye wo la wɔ̀ la fã yɔ àmè kè ji wo mu xɔ̀sè ò? Àleke ye wo la wɔ̀ la xɔ̀ àmè kè be nyikɔ wo mu sè kpɔ òa ji sè ò? Àleke ye wo la wɔ̀, la sè yebe nyikɔ, ne wo mu do àŋɛ̀a na wo ò? 15Àleke ye wo la wɔ̀ la do àŋɛ̀a, ne wo mu dɔ̃ àmè ɖoɖa ò? Wo ŋlɔ̀ ɖo mawunyaa mè be: “Àmè kèwo lè do àŋɛ̀nyuɛ̃ awo be àfɔ̀ nya kpɔkpɔ loò!” 16Vɔ̀ mu nyi àmèwo kpata ye wɔ̀ ɖo àŋɛ̀nyuɛ̃ a ji ò. Ezayà gblɔ̃ be: “Tɔhonɔ̀, àmè kɛ ye xɔ̀ àŋɛ̀ kè mi do a ji sè ò?” 17Eŋuã, xɔ̀sèa so ènyàa mè, eye ènyàa so Kristò be ègbè ɖèɖèa mè.
18Vɔ̀a, mù la biɔ sè be: ɖe ye àmèwo mu sè ènyà òa? Wo sè è. Đo mawunya gblɔ̃ ɛ̀ be:
“Àŋɛ̃dotɔwo be ègbè ɖì, kpe do xixea,
eye ènyà kè wo sɔ do àŋɛ̀a yì ànyigbã be
nukpòpewo.”
19Mù la gbà biɔ sè be: eŋuã Izràɛl be dùkɔ̃a mu sè àŋɛ̀ kè wo do a gɔ̃mè òa? Jèŋùkɔ̀a, Mosè gblɔ̃ be:
“Mù la na mì la hùãŋu dùkɔ̃
kè mu nyi dùkɔ̃ òa;
eye mù la na mì la do àdɔ̀mèze ɖo dùkɔ̃
mànyanu ŋuti.”
20Ezayà gblɔ̃ ŋutɔ cã be:
“Àmè kèwo mu ji mù òawo
ye va kpɔ mù.
Mù ɖè ɖokoe nyè fiɔ àmè kèwo mu
biɔ mù ènu ɖekpekpe òawo.”
21Vɔ̀, e gbà gblɔ̃ ɖo Izràɛl ŋuti be:
“Mù vlũ àlɔ̀ gbè sia gbè ɖoɖa
dùkɔ̃ kè mu sènà ètonu ò, eye be jè
àglaa.”
Mina Bible © Bible Society of Togo, 2014.