Èhàwo Kpɔ̀kplɔ̀sɔyìemè
Kpɔ̀kplɔ̀sɔyìemè
Wo yɔna xoma kèa sã be Psalmòwo. Vɔ̀a, èhà jìji be ènyàtiwo ye lè e mè. Ekèa ŋuti ye mi le yɔ ɛ̀ ɖo fifì be Èhàwo sìgbè Izràɛlviwo ke nène. Lè woabe èxotùnya kpata mèa, Izràɛlviwo gblɔ̃nà ènyà na Mawu sɔ ɖènà woabe xɔ̀se kudo Mawu nyanya fiɔna. Vɔ̀ wo gbà ɖènà woabe nukui dodo kudo àglajèje cã fiɔna.
Pòposè ku Mawu be ènyàwo vana emè to kuefã ku èhà jìjimè. Èhà nyi, so gɔ̃mè jèjea, ènyàti kè le to ku èhàgbè gbɔ̃gblɔ̃ kudo èhàjìnuwo. Èhàwo nyi kuefã àlo mɔɛ̃làla be èhà kèwo Izràɛlviwo jìnà na Mawu so blèmà. Wo lè èkà ètɔ̃ takpo ci èwo àlo àlɔ̀ ɖèka kàciwo lè xoma a mè.
Wo ma Èhà àlɔ̀ ɖèka kàciwo kèawo ɖo xoma gãgã àtɔ̃ mè: (so 1 yì 41; 42 yì 72; 73 yì 89; 90 yì 106, kudo 107 yì 150). Ekèa, sɔ̀ kudo èse be xoma àtɔ̃ kèwo ye lè Biblìa mè, lè yebe gɔ̃mèjèje a.
Èhàwo ɖo èhà jìji àɖàŋùtɔ̀ be nɔ̀nɔmè. Wo lè àlɔ̀kpà àlɔ̀kpà.
Èɖewo nyi kafu-ha na Mawu be gogo ku àdɔ̀mè nyuɛ̃ màkpɔ ŋùgbe; Èɖewo nyi Izràɛl, Mawu be dùkɔ̃a be xɔ̀se. Èbuwo nyi Mawu be kafu sìgbè Izràɛl be Èfìɔ ku Xixea be Èfìɔ nène. Èbuwo cã nyi èmɔ̃ɛ̃làla be èhà ɖo vɔ̃vɔ̃ kudo àdìkasoe lè kãkãɖoji mà-ɖo mè na àmè kè lè gbledo ɖe mèa.
Èhà ɖewo nyi kuefã na èfìɔ àlo èfìɔa be kuefãwo. Izràɛlviwo jìnà èɖewo sɔ yìnà mawuxɔa mè. Èbuwo lè na èmɔ̃zɔ̃zɔ̃ yì Yèruzàlɛm (àlo èkpo lialia be èhà). Èɖewo lè kèwo ye nyi ènufiɔfiɔwo ku èxotùnyawo kudo ŋusɛ̃dodo sɔ lebè na Tɔhonɔ̀ be èseawo. Kloea, wo nyi kuefã sɔ biɔ Tɔhonɔ̀ àlɔ̀do.
Èhùɛjèje kudo yɔyɔ na Tɔhonɔ̀ be àlɔ̀do, xɔ̀ àkpa ɖèka lè ètɔ̃ mè na Èhàwo. Biɔbiɔ fuwo nɔ̀nà èhùɛjèje kèawo mè: Tɔhonɔ̀, nukɛŋuti ye ò? Kaka va na gà kɛ mè ò? Nukɛ ye mù wɔ̀ ò? Ènyè kpò ye à?
Ne gbledo ku vìvìtimè ŋusɛ̃wo le ɖùji nènea, e wɔ̀nà kpò be Mawu mu gbà lè ò, àlo e le ɖèkɔ̀ lè àmè ŋuti nène. Eye kuefã ɖewo biɔna be: Nukɛ wò le wɔ̀ ò? Àlo fɔ̃ ne wòa ɖè àbɔ sɛ̃sɛ̃ wòa fiɔ! Va nyà kɛ̃tɔwo jo. Ɖo kɛ̃tɔ nyèwo trɔ zũ àpo kɛ̃tɔwo. Wo gbà le nyi àfɔ̀klɛ̃ na àgbètɔ be àmènyinyi.
Èhùɛjèje-kuefã kpò ye nyi mɔnukpɔkpɔ ɖèka kè kpena ɖo àmè kè to èfũkpekpewo mèa be mu gbà jo lè Mawu gbɔ ò. Eji-eji lè Èhàwo mèa, èhùɛjèje nana kafu-hawo. Lè ŋùɖo gbɔjɔ mèa, kuefã nana kãkãɖoji eye wo gbà teŋu dona àkpe na Mawu.
Èhàwo le ɖèfiɔ kpò be kuefã nyi àvũdɛ̃drɛ̃, eye kafu-ha ku èhùɛjèjewo cã lè veveɖe na kàdodo nyuɛ̃ ku Mawu.
Èhàwo nyi nupo pòpo ku Mawu to àgbètɔ be hùenuwo kpata mè. Wo le nyi xɔ̀sètɔwo be hiãhiãwo lè gà ɖekpekpe gàmè.
Mamã ɖewo bɔ̀ kuefã èvè ɖodu. Ekèa na hɛ̃hlɛ̃mè èvè lè àkpa ɖewo.
Xoma mè-nyàwo
Wo bɔ̀ èhà 150 kèwo mi le yɔ be Èhàwo, àlo Psalmòwo a ɖo ɖoɖo àtɔ̃ mè. Mi le yɔ ɖoɖo kèawo be xomawo. Woawo ye nyi:
Èhàwo (1–41)
Èhàwo (42–72)
Èhàwo (73–89)
Èhàwo (90–106)
Èhàwo (107–150)
Currently Selected:
Èhàwo Kpɔ̀kplɔ̀sɔyìemè: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.