Yɔb 42

Yɔb do jèsi yebe ènumànya

1Nène a, Yɔb ɖo e ŋuti na Tɔhonɔ̀ gblɔ̃ be:

2“Mù nya be ènu ɖekpe mu glo wò ò,

wò sɔ̀gbè la wɔ̀ ènu kè wò jro a.

3Wò gblɔ̃ ɛ̀ be: Mù hɛ̃ tìtɔ̀ titɔ va àpo ɖoɖowo mè

wàlɛbɛ kè mù le pò nupo sìgbè sùkunɔ̀ nènea.

Ɛ̃ɛ, mù do è jèsi be: Mù gblɔ̃ ènu ɖìnyi kèwo

wu gã mù a, eye nyè mu nya wo sã ò.

4Wò gblɔ̃ na mù be: “Ɖoto ne ma pò nupo.

Mù la biɔ wò ènyà eye wò la na mù ènu-mè ɖèɖewo.”

5Kaka na fifìa, mù nya wò to ènu kèwo àpe èto sènàa ji kpò.

Vɔ̀ fifìa, mù kpɔ wò àgbãŋùgbà.

6Ekèa ŋuti mù le ɖèkuku ɖo ènu kè mù gblɔ̃a ta.

Mù le blìbɔ̀ eye mù do jèsi àpe dàdaa.”

Tɔhonɔ̀ trɔ nyɔ̃na va na Yɔb

7Tɔhonɔ̀ gblɔ̃ ènyà kèawo kpata na Yɔb. E yomè a, e gblɔ̃ na Elifaz so Temàn be: “Wò na àdɔ̀mèze nyèa le bì ɖo èwò kudo èxlɔ̃ wò èvè kpɔ̀tɛawo ŋuti. Nyàwo a, mì mu to nyàwo so ŋuti nyè sìgbè lekè sumɔ̃vi nyè Yɔb wɔ̀ ɛ̀a nène ò. 8Eye fifìa mì sɔ ènyì-su adrɛ̃ kudo àgbò adrɛ̃, eye mì yì sumɔ̃vi nyè Yɔb gbɔ. Mì la yì wɔ̀ ènumème vɔsa ku èlã kèawo na mìa ɖokoe. Wàlɛbɛ ŋua, Yɔb la fãkue ɖo mìa ta, eye mù la xɔ̀ yebe kuefãa. Nène a, nyè mu la do mì ŋùkpɛ̃ ò. Co mì mu to nyàwo so ŋuti nyè sìgbè sumɔ̃vi nyè Yɔb nène ò.”

9Elifaz so Temàn, Bildàd so Cuhà kudo Sofàr so Naamà, wo yì wɔ̀ ènu kè Tɔhonɔ̀ gblɔ̃ na woa. Eye Tɔhonɔ̀ lɔ̃ xɔ̀ Yɔb be kuefãa.

10Wàlɛbɛ kè Yɔb le fãkue ɖo èxlɔ̃awo taa, Tɔhonɔ̀ trɔ sɔ yebe àdɔ̀kùnuwo na ɛ̀. E gbà na ɛ̀ wu sãa, zè gbɔ̀ zè èvè. 11Eye Yɔb be nɔ̀vi ŋusùwo, nɔ̀vi nyɔ̃nùwo, àmè kèwo keŋu jèsi ì sã va yìa, wo va ji ì kpɔ. Wo ɖùnu kudo è, ɖè woabe lɔ̃lɔ̃ fiɔ ɛ̀ eye wo do bàbà na ɛ̀ ɖo jɔ̀gbèvuɛ̃ kè kpe èa ta. Àmè sia àmè na ɛ̀ ègà kudo sìka lɔ̀gàvi.

12Tɔhonɔ̀ ɖùɖù sìtu kɔ̀ ɖo Yɔb ji lè yebe àgbènɔ̀-zã kpɔ̀tɛawo mè. Nyàwoa, Yɔb ɖo ègbɔ sù hotu adrɛ̃, èsɔ èkpotɔnɔ̀ sù hotu ètɔ̃, ènyì kèwo dànà àgblèa hotu ɖèka kudo èsɔ àkɛtɛ hotu mamã mè. 13E gbà jì èvi ŋusù adrɛ̃ buwo kudo nyɔ̃nùvi ètɔ̃. 14E ɖo nyikɔ na nyɔ̃nùvi cucugbã tɔ̀a be “Àhɔ̃ne”, èvègɔ̃a be “Kanèl be sepòpo” eye ètɔ̃gɔ̃a be “Ŋùkuvi be vɔ̃vɔ̃lì” 15Lè èdùa kpata mèa, nyɔ̃nù ɖe mu lè kè jètùgbɛ̀jɛ sɔ̀ kudo Yɔb be èvi nyɔ̃nùawo ò. Woa tɔ Yɔb na wo ècrɔ̃nu sìgbè ŋusùviawo ke nène.

16Lè eŋuã yomè a, Yɔb gbà nɔ̀ àgbè èpè èkà ètɔ̃ takpo. E teŋu kpɔ èviawo kudo woabe tɔgbe tɔ̀gbè yɔviwo kaka xɔ̀ jìjimè ènè sɔ̃ŋu. 17E yomè a, e ku lè sĩsĩ mè, wàlɛbɛ kè be nɔ̀ àgbè dìdi ɖe a.

Currently Selected:

Yɔb 42: GEN

Highlight

Copy

Compare