Èhàwo 89
89
Èhàjìji ku kùefã na Mawu wɔ̀ ànùkua
1Ezrà ŋusù, Etàn be Èhàlo.
2Mù la sɔ Tɔhonɔ̀ be lɔ̃lɔ̃ gãa nɔ jì èhà tɛ̀gbɛ̀.
Ènu nyè la nɔ ɖè àpo ànùkua wɔ̀wɔ sia, so jìjimè yì jìjimè.
3Ɛ̃ɛ, mù la gblɔ̃ ɛ̀ be àpo màjea likè tɛ̀gbɛ̀,
eye wo li àpo ànùkua wɔ̀wɔa ɖo jiŋùkusi ke.
4Wò gblɔ̃ be: “Mù ɖùzò ku àpe àmè cãcã,
mù tà ènu na David, sumɔ̃vi nyèa be:
5'Mù le ɖo wò ɖo hɛ̃nu wò be èfìɔzìkpea ji kaka sɔ yì.
Mù li èfìɔzìkpe wòa ɖotè, so jìjimè yì jìjimè'”. Ènu bɔ̀ kpoo
6Tɔhonɔ̀, jiŋùkusi le kafu àpo ŋùdãdɔwo,
ku àpo ànùkua wɔ̀wɔ lè àmè kɔ̀kɔ̀ɛwo be èhabɔ̀bɔ mè.
7Ɖoa, àmè kɛ ye, lè jiŋùkusi, la teŋu sɔ ye ɖokoe, sɔ̀ ku Tɔhonɔ̀ ò?
Àmè kɛ ye lè jiŋùkusi be ènusɛ̃sɛ̃wo dòmè, kè ɖì Tɔhonɔ̀ ò?
8Lè àmè kɔ̀kɔ̀ɛwo be èhabɔ̀bɔ mèa, vɔ̃vɔ̃ gã ɖe lè Mawu ŋuti.
Yebe vɔ̃vɔ̃a sɛ̃ŋu wu àmè kèwo keŋu trɔdo èa tɔ̀.
9Oò Tɔhonɔ̀, Mawu Ŋusɛ̃kpatatɔ!
Àmè kɛ ye ɖo ŋusɛ̃ sɔ̀ ku wò ò?
Wò sɛ̃ŋu, eye èfìɔɖùɖu ku ànùkua ye pòxla wò.
10Èwò ye ɖo àcɛ̀ ɖo àpù be ègòyiyi ji.
Ne yebe àsrɔ̀kewo hɔ̃a, èwò ye fana wo.
11Èwò ye gbã èta na Ràhab#89.11 Ràhav: Àpù mè be èdã gã ɖe, lè èyɔ̀mè. Wo gbà sɔna nyikɔ ŋua na Ejiptè be èfìɔdua.
kè lè sìgbè àmè kè xɔ̀ èkubi nènea,
èwò ye sɔ àlɔ̀ sɛ̃sɛ̃ wòa kãkã kɛ̃tɔ wòwo hlɛ̃.
12Tɔ̀wò ye nyi jiŋùkusi, eye tɔ̀wò ke ye nyi ànyigbã cã.
Xixea ku ènu kèwo keŋu lè e mèa, èwò ye ɖo woa kpata.
13Èwò ye ɖo èvègo, èwò ye ɖo àpùgo.
Tabɔ̀r ku Hɛrmɔ̀n be ètowo sònà àyo ɖo nyikɔ wòa ŋuti.
14Èwò si ye àlɔ̀ sɛ̃sɛ̃ lè, àbɔ wò tɔ̀ ye nyi ŋusɛ̃.
Ɖusi-lɔ sɛ̃ŋu wòa ye yì ji!
15Jɔ̀jɔɛwɔ̀wɔ ku jɔ̀jɔɛsòso ye nyi èfìɔzìkpe wò be dodoe.
Màje ku ànùkua lè ŋùkɔ̀ na wò.
16Sìtu ɖèɖe ye e nyi na dùkɔ̃ kè nya àleke be ɖo la nɔ mlã wò ɖoa.
Tɔhonɔ̀, wo la nɔ zɔ̃ lè àpo ŋùmè be kɛ̃klɛ̃ nu!
17Wo la nɔ sò àyo, lè àpo nyikɔ mè, gbè sia gbè.
Eye wo la nɔ kafu àpo ànùkua wɔ̀wɔ.
18Ɖoa, èwò ye nyi woabe gogo ku woabe ŋusɛ̃.
Èwò ye kɔna miabe àzò, miabe ŋusɛ̃a yì ji.
19Miabe àkpoxɔ̀nua, Tɔhonɔ̀ tɔ̀ ye.
Eye miabe èfìɔ ye nyi Izràɛl be kɔ̀kɔ̀ɛtɔa.
20Gbè ɖèkaa, wò gblɔ̃ na àpo ànùkuamèwo be:
“Mù na àlɔ̀do nyè kãlìwɔ̀tɔ ɖe, ɖo,
mù do ɖèkajɛ ɖe ɖo ji, lè dùkɔ̃ nyèa mè.
21Mù kpɔ David, sumɔ̃vi nyèa
eye mù sì àmì kɔ̀kɔ̀ɛ nyèa na ɛ̀.
22Àlɔ̀ sɛ̃sɛ̃ nyèa la likè è,
eye àbɔ sɛ̃ŋu nyèa la do è ŋusɛ̃.
23Kɛ̃tɔ ɖekpe mu la teŋu xixa ɛ̀ ò.
Nène a ke ye àmè nyrãku ɖe mu la teŋu tɛ ɛ̀ ɖo èto ò.
24Ɖoa mù la gbã yebe kɛ̃tɔwo le ŋùkɔ̀ na ɛ̀.
Eye mù la pò àmè kèwo crìa pu ànyi.
25Àpe ànùkua ku àpe màje la kplɔ̀ ɛ̀.
Eye àpe nyikɔ la kɔ ɛ̀ yì ji.
26Yebe àlɔ̀ la sù àpù ji,
eye yebe ɖùsi-lɔ la sù ètɔ̀ sàsrawo ji.
27E ya la fã yɔ mù be: “Àta, Mawu nyè!
Àkpã ke nyi àpe hlùɛ̃tɔa!”
28Eye ènyè ya, mù la ɖo è, ŋùkɔ̀gbevi nyè,
èfìɔ kè la wugã ànyigbã ji be èfìɔwo keŋuã.
29Ànùkua be màje nyèa la kplɔ̀ ɛ̀ kaka sɔ yì.
Àpe zòɖùɖua la nɔ ku ì, màgble màgble.
30Mù la li yebe hɛ̃nu ɖo èfìɔzìkpea ji, sɔ yì mà-vɔ mè,
eye yebe èfìɔɖùɖu ku jiŋùkusi be ŋùkèkèwo la sɔ̀.
31Ne èviawo trɔ ŋùgbe do èse nyèwo,
eye wo mu zɔ̃ ɖo ɖoɖo nyèwo ji òa,
32ne wo gble kɔ̀do nyèwo
eye wo gbe ègbè sèse na mù a,
33mù la sɔ èkpò dɔ̃ èto na wo, ɖo woabe àglajèjea ŋuti.
Eye mù la do èba na wo, ɖo woabe àgɔ̀jèjea ŋuti.
34Gãkea, nyè mu la xɔ̀ màje nyèa lè woa si ò.
Nyè mu la gbe ènu lè ànùkua nyèa ŋuti ò.
35Nyè mu la dà zòɖùɖu nyèa ji, àlo,
la trɔ ènyà kè to lè ènu mè na mù a ò.
36Zè ɖèka kpò, mù tà àpe kɔ̀kɔ̀ɛnyinyia.
Gbèɖe! Nyè mu la ɖàjè na David ò!
37Yebe hɛ̃nu la nɔ̀ ànyi tɛ̀gbɛ̀,
eye yebe èfìɔɖùɖua la nɔ̀ ŋùkɔ̀ na mù, sìgbè èwè nène.
38E la likè, kaka sɔ yì, sìgbè wètri
kè nyi ànùkua be ɖàsèfo lè lilikpowo mèa nène. Ènu bɔ̀ kpoo
39Vɔ̀a, èwò ya, wò gbe, eye wo crɔ̃ àpo àmè sìamìnaa.
Èwò ye do àdɔ̀mèze hɛlĩ do è.
40Wò gbã èzò kè wò ɖù ku sumɔ̃vi wòa.
Wò dà yebe èfìɔkukua ɖo ànyigbã, eye wò dovlo è.
41Wò gbã yebe èglìkpawo keŋu,
eye wò kãkã yebe àgbògbòawo.
42Àmè kèwo zɔ̃ va le yìa, va hlà ɛ̀ keŋu.
Eye be trɔ zũ ènu kòkò na yebe àxuekɔ̀tɔwo.
43Wò na ŋusɛ̃ yebe kɛ̃tɔwo be àbɔ.
Wò na àmè kèwo keŋu crìa, wo kpɔ jìjɔɛ.
44Wò na yebe èwuia nu kpò,
eye wò mu do è àlɔ̀ lè àhùagbe ji ò.
45Wò na yebe kɛ̃klɛ̃a nu ci,
eye wò sɔ yebe èfìɔzìkpea xla ɖo ànyi.
46Wò ɖè yebe ɖèkajɛmè ŋùkèkèwo ji kpɔ̀tɔ̀,
eye wò sɔ ŋùkpɛ̃ cɔ̃ èta na ɛ̀. Ènu bɔ̀ kpoo
47Aò, Tɔhonɔ̀! Kaka na hùe kɛ nu ò?
Wò la kpɔ̀tɔ̀ nɔ wla ɖokoe wò kòkòkòa?
Aò, kaka na hùe kɛ nu ye wò la na àdɔ̀mèze wòa
la kpɔ̀tɔ̀ nɔ bì sìgbè èzò nène ò?
48Ɖoŋù àlekè àgbè nyèa kpòkpòe ɖoa,
kù àlekè wò ɖo àgbètɔ be èviwo, ènu gbalo ɖoa!
49Àmè kɛ ye la nɔ̀ àgbè, eye mu la ku ò?
Eye be la teŋu hlùɛ̃ yebe èkla lè èkuwode ò? Ènu bɔ̀ kpoo
50Aò, Tɔhonɔ̀! Fikɛ àpo sã xoxo be àdɔ̀mè nyuɛ̃ wɔ̀wɔ,
kè wò sɔ tà àpo ànùkua wɔ̀wɔ na David, sumɔ̃vi wòa lè ò?
51Tɔhonɔ̀, ɖoŋùku àlekè wo pòɖi wò ɖoa,
ɖoŋùku àlekè mù xɔ̀ dùkɔ̃wo keŋu be èvlo dodo ɖo àkɔa!
52Tɔhonɔ̀, ɖoŋùku àlekè kɛ̃tɔ wòwo dovlo wo ɖoa!
Ɖoŋùku àlekè kɛ̃tɔ wòwo dovlo
àpo àmè sìamìna be àfɔ̀ɖèɖe ɖe sia ɖe.
53Woa kafu Tɔhonɔ̀ tɛ̀gbɛ̀, kaka sɔ yì.
Àmèn! Ɛ̃ɛ, Àmèn!
Currently Selected:
Èhàwo 89: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
