Èhàwo 88
88
Àgbè nyèa le gɛ̃ ɖo èku mè
1Koreà be èviwo be Èhà na hàsìnɔ̀ gãa. Almàhalat Lè-Anɔ̀t. Hemàn, Ezràtɔa be ènufiɔfiɔ.
2Aò, Tɔhonɔ̀, Mawu, hlùɛ̃tɔ nyè!
Èzã ku kedèa, mù le fã yɔ wò.
3Àpe kuefã ne va ɖo kaka gbɔ wò.
Pu èto ànyi na àlenana nyèa jro!
4Ɖoa, èkla nyè titɔ keŋu-keŋu,
eye àpe àgbèa yì ɖo èkudonu.
5Wo bù mù ɖo àmè kèwo be àgbèa ɖo vɔ̀vɔnua mè.
Mù jo lè sìgbè àmè kè mu ɖo ŋusɛ̃ òa nène.
6Wo gble mù ɖo àmèkukuwo dòmè,
sìgbè àmè kèwo wo wù sɔ mlɔ̃ èyɔ̀domèa nène.
Àmè kèwo ma jo lè ŋuti wò, kèwo wò ŋlɔ̀be vɔ̀a nène.
7Wò dà mù ɖo èdo yìgũa mè.
Ègũ kè gòglò, do vìvìtia mè.
8Àpo àdãwɔ̀wɔ be kpɛ̃kpɛ̃ jè e ji nyè.
Àdɔ̀mèze be àsrɔ̀kewo keŋu cɔ̃ ji nyè. Ènu bɔ̀ kpoo
9Wò nyà èxlɔ̃ nyè veveawo jo lè ŋuti nyè.
Eye wò sɔ mù wɔ̀ ènunyɔŋu na wo.
Wò tu èhɔ̃ do mù, eye tòto mu lè na mù ò.
10Vevesèse gbɔjɔ ŋùku nyèwo,
Tɔhonɔ̀, mù kè àlɔ̀ ɖoɖa gbɔ wò,
eye mù fã yɔ wò gbè sia gbè.
11Àmèkukuwo ye wò la wɔ̀ ŋùdãnu na fifìa?
Àmèkukuwo la fɔ̃ va kafu wòa? Ènu bɔ̀ kpoo
12Èyɔ̀dòmè wo la ɖè àpo àdɔ̀mè nyuɛ̃ wɔ̀wɔ fiɔ lèa?
Èyɔ̀mè ye wo la teŋu kafu àpo ànùkua wɔ̀wɔ lèa?
13Vìvìti mè ye wo la jèsi àpo ŋùdãnuwo lèa?
Eye lè ènu-ŋlɔ̀be be èdù mèa, wo la kpɔ jɔ̀jɔɛsòso wòa jèsia?
14Vɔ̀a ènyè yaa, mù le fã yɔ wò, Tɔhonɔ̀!
So fɔ̃fɔ̃mè kea, mù sɔ kuefã nyè ɖo ŋùku wò mè.
15Aò, Tɔhonɔ̀, nukɛ ŋuti wò tù àsi èkla nyè dãŋùgbe ɖo,
eye wò trɔ ŋùgbe do mù ò?
16So ɖèvimè ke, mù lè àyàɖùɖu mè, kaka lili èku.
Àpo vɔ̃vɔ̃dodo na àmè titɔ mù kaka mù gbɔjɔ.
17Àpo àdɔ̀mèze veku-vekua to ji nyè,
àpo vɔ̃vɔ̃dodo na àmè crɔ̃ mù keŋu-keŋu.
18Gbè sia gbèa, wo cɔ̃na mù sìgbè èsì nène.
Wo pòxla mù keŋu-keŋu kpedo.
19Wò kãkã àmè nyanyawo ku èxlɔ̃wo keŋu jo lè ŋuti nyè.
Vìvìti ye mù gblɔ̃nà àpe àdɔ̀mè be ènyà na fifì.
Currently Selected:
Èhàwo 88: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
