Èhàwo 78
78
Izràɛl be èxotùnya nyi ènufiɔàmè
1Àsaf be ènufiɔ-hà.
Dùkɔ̃ nyè, ɖo èto àpe ènufiɔfiɔ.
Pu èto ànyi ɖo àpe ènu mè-gbe ŋuti.
2Mù la kè ènu, la do èlo;
mù la gblɔ̃ blèmànya wawlawo.
3Ènu kè mi sè, eye mi nyaa;
ènu kèwo mia tɔwo gblɔ̃ na mia,
4mi mu la wla wo do woabe jɔ̀jɔmèviwo ò.
Vɔ̀a, mi la gblɔ̃ ŋùdãnu jè na kafu kèwo
Tɔhonɔ̀ wɔ̀a ku yebe ŋusɛ̃dɔwo na jìjimè
kèwo la va jɔ̀ a.
5E wɔ̀ ɖoɖowo ɖɛ na Yakɔb be jìjimèviwo,
e do èsewo ɖɛ na Izràɛlviwo,
eye be ɖè ègbè na mia tɔgbewo
be wo ne fiɔ èse kèawo woabe tɔgbeyɔviwo.
6Àleke be jìjimè kè la kplɔ̀ wo do a ne nya wo,
eye jìjimè kè la gbà va ŋutɔ cã
ne fiɔ woabe èvi kèwo wo la jìa.
7Àleke be woa dojì ɖo Mawu ŋuti,
ne wo mu gbà ŋlɔ̀be yebe kãlì dɔwo ò,
vɔ̀a, woa le yebe èseawo ɖo àsi.
8Nène a, wo mu la gbà ɖì woa tɔgbewo, jìjimè kè bè èkɔ̀ lìa,
jìjimè jè àgla, jìjimè kè be èjì mu likè ɖo Mawu ji ò,
jìjimè kè mu donajì ɖo Mawu ŋuti òa ò.
9Ne Efràyim be jìjimèviwo, àmè kèwo nyi àŋùtudàtɔ àdodoewo,
bla àkpà nyuɛ̃ ɖe, wu àmè sia àmè, vɔ̀a, gbè kè gbè àhùa jɔ̀ a, wo si.
10Wo mu wɔ̀ ɖo Mawu be èzòɖùɖua ji ò,
eye wo trɔ ŋùgbe do yebe èsea.
11Wo ŋlɔ̀be Mawu be kãlì dɔwo,
Ku ŋùdãdɔ kèwo be ɖè fiɔ woa.
12Mawu wɔ̀ ŋùdãnuwo lè woa tɔgbewo be ŋùkumè,
lè Ejiptè be ànyigbã ji, lè Soàn be àgowo ji.
13E fɛ̃ àpùa, eye be na wo va yì.
E ma èsìa ɖo èvè, le wo ɖotè sìgbè èglìwo nène.
14Ŋùkèkè mèa, e kplɔ̀nà wo ku lilikpo,
eye, èzã bliboa, e kplɔ̀nà wo ku èzò be kɔ̀kɔ̀ɛ.
15E fɛ̃ àkpãwo lè zògbèa ji,
sɔ na wo èsì wo nù gbãŋu-gbãŋu,
so kaka ànyigbã be èsìjɔ̀pe ke.
16E na ètɔ̀ sàsrawo zrò to lè àkpã mè,
eye be na èsìa srà sìgbè ètɔ̀ gãwo nène.
17Gãkea, wo gbà kpɔ̀tɔ̀ le wɔ̀ ènu vuɛ̃ ɖo Mawu ŋuti,
Gbà kpɔ̀tɔ̀ le jè àgla lè zògbèa ji ɖo Èjihũitɔa ŋuti.
18Wo nya vɔ̀, tè Mawu kpɔ lè woabe èjìwo mè
sɔ biɔ ènuɖùɖu kè jro woa.
19Wo pò nupo ɖo Mawu ŋuti, gblɔ̃ be:
“Mawu la teŋu na mi ènuɖùɖu lè zògbè jia?
20Nyàwo be nyi be, ekè e pò àkpãa,
èsìa ɖùɖù, eye be zũ ètɔ̀ kè srà gbãŋu-gbãŋu.
Vɔ̀a ɖe, e la teŋu na mi ènuɖùɖu cã a?
E la teŋu na èlã yebe dùkɔ̃a la ɖù a?”
21Ekèa ŋuti ye, ekè Tɔhonɔ̀ sè èa,
e bijì ŋutɔ, eye yebe àdɔ̀mèze be èzò le Yakɔb be jìjimèviwo.
E do àdɔ̀mèze ɖo Izràɛlviwo ŋuti veveɖe ŋutɔ.
22Ɖoa, wo mu dojì ɖo Mawu ŋuti ò,
Eye wo mu xɔ̀sè be e la teŋu xɔ̀ na yèwo ò.
23Gãkea, e ɖè ègbè na lilikpowo lè èji,
eye be hũ jiŋùkusi be àgbowo.
24E na manà jà na àmèhaa be ɖù,
e na wo jiŋùkusi be ènuɖùɖu.
25Eye àgbètɔwo ɖù Mawu be àtikplɔtɔwo be ènuɖùɖu.
Mawu na wo ènu kèwo keŋu wo la teŋu ɖù la ɖɔpòa.
26E na èwèzɛ̃pe be àya mè gbɔjɔ lè jiŋùkusi,
eye e sɔ yebe ŋusɛ̃ kplɔ̀ àpùgo be àya va.
27E na èlã cã hlɛ̃ kɔ̀ ɖo woa ji sìgbè èkɔsawɛ nène,
xèviwo fuu sìgbè àpùtakɔ nène.
28E na xèviawo gɛ̃ jè woa dòmè,
eye wo pòxla woabe gòxɔwo.
29Nène a, wo ɖù, eye wo ɖɔpò nyuɛ̃ ɖe,
ɖoa Mawu wɔ̀ ɖo ènu kè wo jro a ji.
30Vɔ̀a, woabe ènu ɖù mà-ɖo kɔpea, mu kpɔ vɔ̀ hàɖe ò,
eye èlã gbà kpɔ̀tɔ̀ lè ènu mè na wo
31Wàlɛbɛ kè Mawu be àdɔ̀mèze gbã ble woa,
eye e wù hùɛ̃yiawo lè woa dòmè,
eye e pò Izràɛl be ɖèkajɛwo pu ànyi.
32Ekèa keŋu jɔ̀ gãkea, wo gbà kpɔ̀tɔ̀ le wɔ̀ èvuɛ̃.
Wo mu xɔ̀ Mawu be ŋùdãdɔwo ji sè ò.
33Ènu kèa ŋuti, Mawu trɔ woabe àgbènɔ̀ ŋùkèkèwo zũ gbalo.
Eye woabe èpèwo zũ àyàɖùɖu ku vɔ̃vɔ̃.
34Àleke be wàlɛbɛ kè Mawu le crɔ̃ woa,
wàlɛbɛ ŋuã ye woa yaa, wo trɔna jènà ŋùkɔ̀ ɛ̀,
wàlɛbɛ ŋuã ye wo jina Mawu veveɖe.
35Wàlɛbɛ ŋuã ye wo ɖonaŋùku be Mawu nyi yèwo be àkpã.
Wàlɛbɛ ŋuã ye wo nyananu be Èjihũitɔa nyi yèwo be hlùɛ̃tɔ.
36Vɔ̀a, wàlɛbɛ ŋuã ye wo sɔna woabe ènuwo, vivina numè na Mawu,
Wàlɛbɛ ŋuã ye wo sɔna woabe àɖewo ɖànà àjè na ɛ̀.
37Woabe èjìwo mu le wɔ̀ ànùkua ɖo Mawu ŋuti ò.
Wo mu dojì ɖo yebe zòɖùɖua ŋuti ò.
38Vɔ̀a Mawu yaa, e ye kè nyi ŋuzĩzĩkutɔ gãa,
sɔna woabe èvuɛ̃wo kènà wo, eye mu crɔ̃na wo ò.
Eji-ejia, e ɖona àsi yebe àdɔ̀mèzea ji.
Mu hũnà ènu lè yebe àdãwɔ̀wɔa kpata nu ò.
39Ɖoa, e ɖonaŋù be ŋutilã gbalo kè kunaa kpò ye wo nyi.
Àya kè pònà, yìnà eye mu gbà trɔna va òa, ye wo nyi.
40Zè nenè ye wo mu jè àgla ɖo e ŋuti lè zògbèa ji,
Eye wo mu do àdɔ̀mèze na ɛ̀ lè zògbè pupuia ji ò?
41Eji-ejia, wo gbà tènà Mawu kpɔ ke.
Wo nana Izràɛl be kɔ̀kɔ̀ɛtɔa binajì!
42Wo mu gbà ɖonaŋù ŋusɛ̃dɔ kèwo yebe àlɔ̀ sɛ̃sɛ̃a wɔ̀,
gbè kè gbè e hlùɛ̃ wo gã so àmè kè le zĩ wo ɖotoa si ò.
43Gbè kè gbè e ɖè yebe ŋùdã jèsìwo fiɔ lè Ejiptè-nyigbã jia ò.
Yebe ŋùdãnu kèwo e wɔ̀ lè Soàn be àgowo jia.
44E trɔ woabe ètɔ̀wo ku woabe ètɔ̀ sàsrawo zũ èhũ,
ne wo mu gbà teŋu nù woabe èsìwo ò.
45E ɖo tɔ̀bɔ̀suwo ɖoɖa woa dòmè ne woa ɖù wo,
ku àbìtowo ne woa do àyà na wo.
46E sɔ woabe àgblèmè be ènukuwo do àsi na hùesuviwo.
Eye e sɔ woabe ènumìɔ̃miɔ̃wo na èbɔ̀wo.
47E sɔ èsìkpe jàja gble woabe vɛ̃-gblewo,
eye woabe ègbotiwo trɔ zũ èsìkpe.
48E gble woabe èlãwo ɖo èsìkpe mè,
eye èjiɖègbè wù woabe èlãhawo.
49E hũ ènu lè yebe àdɔ̀mèze kaɖi kaɖia nu,
Eye àdãwɔ̀wɔ, èjìbibi, ku gbɔ̃gbɔ̃cipò
ye Mawu be gbledo be àtikplɔtɔwo hɛ̃ va woa ji.
50Ekè Mawu hũ èmɔ̃ na yebe àdɔ̀mèzea,
mu gbà hlùɛ̃ wo gã lè èku si ò, vɔ̀ bòhũa,
e gble woabe àgbèwo ɖo àsi na èdɔ̀ vuɛ̃.
51E crɔ̃ Ejiptètɔwo be ŋùkɔ̀gbeviwo keŋu,
ŋusù nyinyi be ènuku cucugbãawo lè Cam be gòxɔwo mè.
52Gãkea, e kplɔ̀ yebe dùkɔ̃a to,
sìgbè lekè wo kplɔ̀nà èlãhaa nène,
e kplɔ̀ wo sìgbè àlɛ̃ha nène lè zògbèa ji.
53E kplɔ̀ wo ku kãkãɖoji, eye vɔ̃vɔ̃ mu ɖo wo,
wàlɛbɛ kè àpù va cɔ̃ woabe kɛ̃tɔwo ò.
54Eye e kplɔ̀ wo va yebe ànyigbã kɔ̀kɔ̀ɛa ji,
va èto kè e sɔ yebe ɖùsi-lɔ sɔ xɔ̀a ji.
55E nyà dùkɔ̃wo jo lè ŋùkɔ̀ na wo,
eye e sɔ dùkɔ̃ kèawo be ànyigbã wɔ̀ ècrɔ̃nu, sɔ ma na wo,
eye e na nɔ̀pe Izràɛl be kɔ̀tawo ɖo woabe gòxɔwo mè.
56Gãkea, Izràɛlviwo tè Mawu, Èjihũitɔa kpɔ.
Wo jè àgla, eye wo mu zɔ̃ ɖo yebe ɖoɖowo ji ò.
57Wo to woa tɔwo be àfɔ̀tope ku ànùkua mà-wɔ̀.
Sìgbè àŋùtu bàɖà nènea, wo yì ŋùgbe,
eye àmè ɖe mu teŋu dojì ɖo woa ŋuti ò.
58Wo sɔ woabe vɔsakpewo do àdɔ̀mèze na ɛ̀,
eye woabe legbawo hɔ̃ yebe ŋuhuã.
59Ekè Mawu sè ekèa, e bijì ŋutɔ,
eye e gbe Izràɛlviwo keŋu-keŋu.
60E gble Zòɖùɖu-Ɖakà kè lè Silòa ɖɛ.
E gble gòxɔ kè e tù ɖo àgbètɔwo dòmèa ɖɛ.
61E gble yebe ŋusɛ̃ be Zòɖùɖu-Ɖakà ɖo gàtɔnugbe.
E jo yebe gogoa ɖo kɛ̃tɔwo si.
62E gble yebe dùkɔ̃a ɖo èwui nu.
E bijì do ècrɔ̃nu kè e ɖoɖɛa.
63Èzò fiɔ̃ woabe ɖèkajɛwo, nyɔ̃nù kpekpe
be èhà mu gbà ɖì na woabe tùgbɛ̀jɛviwo ò.
64Woabe hũbonɔwo ci èwui nu,
eye woabe àhòsìwo mu gbà teŋu làmɔɛ̃ ò.
65Wàlɛbɛ kèa ye Tɔhonɔ̀ so kplà!
Sìgbè àmè kè fɔ̃ so àlɔ̃ mè nènea,
e sitè sìgbè ŋusù kãlìwɔ̀tɔ kè àhà do èzò lãmè na a nène.
66E pò yebe kɛ̃tɔ kèwo le sia,
e wù wo, sɔ do wo ŋùkpɛ̃ mà-vɔ.
67Ekèa yomè a, e gbe Yosɛ̀f be xòmèa,
e gbe be yè mu la cã Efràyim be kɔ̀taa ò.
68Eye e cã Yudà be kɔ̀taa.
E cã Ziɔ̀n be èto kè be lɔ̃a,
69Funua ye e tù yebe kɔ̀kɔ̀ɛpea ɖo.
E yìji sìgbè fìɔsa gãwo nène.
E tù ì sìgbè ànyigbã kè e li ɖɛ kaka sɔ yìa nène.
70E cã David yebe sumɔ̃via,
e ɖè è jo lè àlɛ̃kpawo gbɔ.
71E kplɔ̀ ɛ̀ jo lè àlɛ̃wo yomè va,
eye be sɔ ɛ̀ ɖo àlɛ̃kplɔ̀tɔ na Yakɔb
be èviwo na Izràɛlviwo, yebe crɔ̃nu.
72Eye David sɔ èjì jɔ̀jɔɛ sɔ kplɔ̀ wo,
e sɔ ènunyatɔ be àlɔ̀ sɔ kplɔ̀ wo.
Currently Selected:
Èhàwo 78: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
