Èhàwo 79
79
Mi ci àsi! Va xɔ̀ na mi jro
1Àsaf be Èhà.
Aò Mawu, àgblìnɔ̀wo va bɔ̀ cɔ̃ àpo ècrɔ̃nua.
Wo dovlo àpo mawuxɔ kɔ̀kɔ̀ɛa
eye wo gbã Yèruzàlɛm be èdùa.
2Wo sɔ sumɔ̃vi wòwo be ŋutilã kukuwo na jiŋùkusi be xèviwo ne woa ɖù.
Wo sɔ ànùkuamè wòwo be àmèkpòtiwo na ànyigbã ji-lãwo ne woa ɖù.
3Eye wo kɔ̀ woabe èhũ ɖɛ sìgbè èsì nène trɔ do Yèruzàlɛm be èdùa.
Eye àmè ɖekpe mu lè, la ɖì wo ò.
4Mi ɖìgbɔ lè miabe àxuekɔ̀tɔwo be ŋùmè.
Eye mi ɖì kòkoe na àmè kèwo trɔ do mia.
5Aò, Tɔhonɔ̀, kaka na gà kɛ mè ò?
Àdɔ̀mèze dodo ji kpò ye wò la nɔ̀a?
Kaka na hùe kɛ nu, àdɔ̀mèze kaɖi kaɖi wòa
la kpɔ̀tɔ̀ nɔ bì, sìgbè èzò nène ò?
6Kɔ̀ àdɔ̀mèze wòa ɖo àgblìnɔ̀ kèwo mu jèsi wò òa ji.
Kɔ̀ ɛ̀ ɖo vòdusɛ̃tɔwo be èfìɔɖùpe kèwo mu yɔna nyikɔ wò òa ji.
7Ɖoa, wo crɔ̃ Yakɔb be jìjimèviwo, eye wo gbã woabe èdùa.
8Aò, mù gbà sɔ mia tɔgbewo be èvuɛ̃wo be èba, pò mi ò.
Aò ɖèbla ne wòa ɖè ŋuzĩzĩkuku wòa fiɔ mi!
Ɖoa, mi gbɔjɔ keŋu-keŋu, eye wɔ̀na vɔ̀ lè mia ŋuti.
9Aò, Mawu, miabe hlùɛ̃tɔ!
Na àpo nyikɔ be gogoa, va xɔ̀ na mi!
Hlùɛ̃ mi gã, ne wòa tutu miabe èvuɛ̃wo jo,
Ɖo àpo nyikɔa be bùbu ŋuti.
10Nukɛ ŋuti àgblìnɔ̀wo la nɔ gblɔ̃ be:
“Fikɛ ye woabe Mawu a lè ò?”
Na ne dùkɔ̃wo ne nya lè miabe ŋùmè be,
wò biɔna sumɔ̃vi wò kèwo be èhũ wo kɔ̀ ɖɛa, be èhlɔ̃.
11Ègàmènɔ̀tɔwo be àlenanawo ne ɖo gbɔ wò jro!
Sɔ àpo àlɔ̀ sɛ̃sɛ̃a hlùɛ̃, àmè kèwo wo sò èku kòjo na a, ɖo àgbè jro!
12Tɔhonɔ̀, ɖo èvlo kè miabe àxuekɔ̀tɔwo do wòa,
tèpe zè adrɛ̃, na wo!
13Ekèa yomè a, mi, àmè kèwo nyi àpo dùkɔ̃a,
mi, àmè kèwo nyi èlãha lè àpo èlãkpamèa,
mi la nɔ mlã wò tɛ̀gbɛ̀, eye mi la jì àpo kafu-ha,
so jìjimè yì jìjimè.
Currently Selected:
Èhàwo 79: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
