Èhàwo 77
77
Lè gbledo mèa, mù ɖonaŋù àpo ŋùdãnuwo
1Àsaf be Èhà, na hàsìnɔ̀ gãa. Wo la jì ì ɖo Yedutùn be ègbè ɖìɖi ji.
2Mù do àpa fã yɔ Mawu, be ne sè àpe ègbè.
Mù do àpa, fã yɔ Mawu, be ne xɔ̀ na mù.
3Wàlɛbɛ kè àgbɔ̃ ciji na mù a, mù ji èmɔ̃ na Tɔhonɔ̀.
Ne èzã do a mù kɔna àbɔ yì ji, èjɛ̃ màgbɔ̃,
eye èkla nyè gbena be wo mu gbà fa àkɔ na yè ò.
4Mù bùnà àpo èta mè, aò Mawu! Eye mù ŋɛ̃nà.
Ne mù le dèŋùgblèa, sùsu nyè gbà titɔna kpe è. Ènu bɔ̀ kpoo
5Wo le ŋùku nyèwo ɖotè.
Mù titɔ àleke be ènu pòpo glo mù.
6Mù bù gbèɖegbè ŋuti kpɔ,
mù bù blèmà be èpèwo ŋuti kpɔ.
7Ne èzã do a, mù ɖonaŋù àpo èhà,
èjì nyè yìnà ye ɖokoe mè kpɔ.
Eye sùsu nyè biɔna ye ɖokoe sè be:
8Eŋuã Tɔhonɔ̀ la sɔ mi dãŋùgbe godoa?
Mu la gbà ɖè yebe àdɔ̀mè nyuɛ̃ fiɔ gbèɖe òa?
9Eŋuã yebe ànùkua wɔ̀wɔ màgũa bu gbidia?
Yebe àjɔ̀gbèa gũ kaka sɔ yìa?
10Eŋuã Mawu ŋlɔ̀be be yè la ku ŋuzĩzĩa.
Àlo àdɔ̀mèze be sɔ tu àgbo do yebe èjìa? Ènu bɔ̀ kpoo
11Ɛ̃ɛ, mù le gblɔ̃ ɛ̀ be: ekèa mè ye vevesèse nyèa so,
ɖoa, Èji hũitɔa be àlɔ̀ trɔ lè yo nyè mè!
12Gãkea, mù la gbà nɔ ɖoŋù Tɔhonɔ̀ be wɔ̀na gãwo!
Ɛ̃ɛ, mù la nɔ ɖoŋù àpo gbèɖegbè be wɔ̀na gãwo!
13Mù la nɔ dèŋùgblè so àpo kãlĩdɔwo keŋu ŋuti,
eye mù la nɔ hlɛ̃ wo kpɔ ɖèka-ɖèka.
14Aò Mawu, èmɔ̃ wòwo lè kɔ̀kɔ̀ɛ loò!
Vòdu kɛ ye lòlò, la teŋu sɔ̀ ku miabe Mawu ò?
15Èwò ye nyi Mawu kè wɔ̀ nùdãnuwoa.
Wò ɖè ŋusɛ̃ wò fiɔ lè dùkɔ̃wo dòmè.
16Wò sɔ àpo àlɔ̀ sɛ̃sɛ̃a jo dùkɔ̃ wò,
kè nyi Yakɔb ku Yosɛ̀f be jìjimè viwoa. Ènu bɔ̀ kpoo
17Aò Mawu, ètɔ̀wo kpɔ wò. Ɛ̃ɛ, ekè ètɔ̀awo kpɔ wòa,
Mawu, vɔ̃vɔ̃ jè woa ji eye wo titɔ gbà hũhũ!
Ègũ cicri kèwo lè gɔ̃mè na woa ŋutɔ cã titɔ!
18Liliwo ɖùɖù èsì kplòkplòkplò kɔ̀ ɖo ànyi.
Èji ɖè ègbè lè lilikpowo mè,
eye àpo àŋùtiwo le kè èzò kãkã ɖo ègbe.
19Ekè èji wòa ɖè ègbèa, bìɖàwo kè èzò lè xixea mè,
àdìka sò ànyigbã a eye e hũhũ!
20Àpo àfɔ̀wo ɖè èmɔ̃ to àpùa mè.
Àpo àfɔ̀topewo zɛ̃ èsì gãawo, gãkea,
àmè ɖekpe mu teŋu jèsi àpo àfɔ̀ɖope ò.
21Mosè ku Arɔ̀n ji wò to, eye wò ŋutɔ wò kplɔ̀ àmèha wòa
sìgbè àleke wo kplɔ̀nà èlãha nène.
Currently Selected:
Èhàwo 77: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
