Èhàwo 72
72
Kuefã ne Mawu ne tu sì na èfìɔa
1Salomɔ̀n be Èhà.
Aò Mawu, sɔ àpo jɔ̀jɔɛsòso do àsi na èfìɔa,
eye sɔ àpo jɔ̀jɔɛwɔ̀wɔ do àsi na èfìɔvia.
2Ne bea sɔ jɔ̀jɔɛwɔ̀wɔ kplɔ̀ dùkɔ̃ wòa,
eye bea le àpo àyàɖùviwo, àleke e jèa.
3Ètowo ne hɛ̃ ɖàgbè va na dùkɔ̃ wòa,
eye ètokɔ̃ɛwo ne hɛ̃ jɔ̀jɔɛwɔ̀wɔ be nuku va na ɛ̀.
4Ne xɔ̀ ènyà ɖo dùkɔ̃a mè be àyàɖùviwo nu,
eye ne hlùɛ̃ èhiãtɔnɔ̀wo be èviwo gã.
Ne tùkù àyàdonamètɔa hãnyà hãnyà!
5Kaka kè èwè ku wètri la gbe nɔ klɛ̃ kpòa,
wo la nɔ si wò, so jìjimè yì jìjimè!
6Èfìɔa ne nɔ̀ ɖiɖi sìgbè èji kè jà kɔ̀ ɖo ègbe wɛwlɛ jia nène,
sìgbè àhũ kè le wusì ànyigbã a nène.
7Lè yebe èfìɔ ɖùɖu zãwo mèa, àmè jɔ̀jɔɛwo la jì ɖo ji,
Kaka na hùenu kè wètri mu la gbà nɔ̀ ànyi òa!
8Ne ɖùfìɔ, so àpù ɖe gbɔ, yì àpù bu gbɔ!
Ne ɖùfìɔ, so Efratà be ètɔ̀a gbɔ, yì ànyigbã be nukpòpewo!
9Zògbè ji nɔ̀tɔwo la jèɖɛ̀ na ɛ̀,
yebe kɛ̃tɔwo la sɔ ŋùmè tù èkɔ mè.
10Tarsìs be èfìɔwo ku èfìɔ kèwo lè dìdìpe be ètɔ̀dòmèkɔ̃ɛ̃wo jia,
la hɛ̃ nunanawo va na ɛ̀.
Sabà ku Sebà be èfìɔwo la hɛ̃ ènunanawo va na ɛ̀.
11Èfìɔwo kpata la va bɔ̀bɔ̀ lè ŋùkɔ̀ na ɛ̀,
dùkɔ̃wo kpata la va sumɔ ɛ̀.
12Ɖo, e la xɔ̀ na èhìãtɔ kè le na àlea.
Ɛ̃ɛ, e la xɔ̀ na àmè kè lè vevesèse mè,
vɔ̀a, mu ɖo xɔ̀namètɔ òa.
13E la ku ŋuzĩzĩ na èhìãtɔ ku àmè kè mu ɖo ŋusɛ̃ òa.
E la hlùɛ̃ èhiãtɔwo ku wɔ̀amènɔ̀wo be àgbè gã.
14E la hlùɛ̃ èta na wo, lè àmè kèwo zĩna àmè ɖoto
ku àmè kèwo sɛ̃natamèawo si.
Ɖoa, woabe èhũ xɔ̀ àsì na ɛ̀.
15Èfìɔa ne nɔ̀ àgbè dìdi!
Wo ne sɔ Sebà be sìka va na ɛ̀!
Àmèwo ne nɔ fãkue ɖo e ta tɛ̀gbɛ̀,
eye woa nɔ tu sì na ɛ̀ gbè sia gbè!
16Èlù ne gbã ble èdùa be ànyigbã a keŋu ji!
Èlùgbleawo ne ɖɔ ètowo tamè, ne woa nɔ hizi!
Woabe ènukuwo be èsepòpowo ne jè, ne woa hũ.
Woa ɖo àcɔ, sìgbè àlekè Libàn be ànyigbã a nya kpɔkpɔa nène!
Ènukuawo ne ɖɔ lè èdùawo mè, sìgbè ègbe lè ànyigbã ji nène!
17Yebe nyikɔ ne nɔ ɖì tɛ̀gbɛ̀,
eye kaka kè èwè gbe le hũ kpòa, ne nɔ sĩ ɖo ji.
Dùkɔ̃wo keŋu la xɔ̀ sìtu to e ji,
eye woa keŋu, wo la nɔ yɔ ɛ̀ be sìtume.
18Woa kafu Tɔhonɔ̀ Mawu, Izràɛl be Mawu a!
Mawu ɖèka kè wɔ̀nà ŋùdãnuwoa!
19Sìtu ɖèɖe ye nyi yebe gogo be nyikɔa tɛ̀gbɛ̀!
Ànyigbã bliboa ne ɖɔ ku yebe gogo! Àmèn, Ɛ̃ɛ ne va e mè!
*
20David, Jesè be èvia be kuefãawo vɔ̀ ɖo fikèa.
Currently Selected:
Èhàwo 72: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
