Èhàwo 73
73
Xoma Ètɔ̃gɔ̃a
(So Èhàw 73 yì 89)
Ne e ze sìgbè ènu le nyɔ na àmè vuɛ̃ nène a
1Àsaf be Èhà
Ɛ̃ɛ, Mawu kɔ̀nà àdɔ̀mè ɖo Izràɛlviwo ŋuti nyàwo!
Ɛ̃ɛ, e kɔ̀nà àdɔ̀mè ɖo àmè kèwo be èjì mè kɔ̀a ŋuti!
2Gãkea, ènyè yaa, àfɔ̀ nyèwo ɖiɖi kloe!
Kpɔ̀tɔ̀ viɖe kpò, ne ma trã èmɔ̃ keŋu-keŋu!
3Ɖoa, mù hùãŋu do àdègbèpòtɔwo,
wàlɛbɛ kè mù kpɔ be ènu le nyɔ na àmè vuɛ̃woa.
4Wo mu sènà vève ɖekpe, kaka va sɛ̃ èku mè ò.
Woabe pòdowo do àmì.
5Wo mu kpena èfũ sìgbè àmè buwo nène ò,
eye àyàɖùɖuwo tona woa ŋuti va yì.
6Ekèa na be jajra zũ jònu lè èkɔ̀ na wo,
Eye èhũnyànyrã trɔ zũ àwù wo dona.
7Woabe ŋùkuviwo hɔ̃ lè àkpà do àmìwo mè,
Eye èvuɛ̃ mà-ɖo sɛ̃pe kè lè woabe èjìwo mèa,
le klɛ̃ lè woa mè.
8Wo sɔ vivisèse le ɖè àlɔmè so èvuɛ̃ wɔ̀wɔ ŋuti,
Eye wo sɔ ègòyiyi le kã àtãŋu be yèwo la zĩ àmè ɖo ànyi.
9Wo sɔ ènu le dovlo Mawu lè jiŋùkusi,
Wo sɔ àɖe le gble xixea.
10Ekèa ŋuti ye woabe àmèwo trɔ ɖoɖa woa gbɔ ɖo,
Eye wo kè èvemè, le nù èsì glùglùglù.
11Wo gblɔ̃nà be: “Àleke ye Mawu la wɔ̀, nya ò?
Àleke Èji hũitɔa la nya ɖo ò?”
12Kpɔɖa, lekea ye àmè vuɛ̃wo lè,
wo vò, bɔ̀ àdɔ̀kùnu ɖo àdɔ̀kùnu ji!
13Vɔ̀a, ènyè yaa, nyàwo be nyi be mù le èjì nyè ɖɛ kɔ̀kɔ̀ɛɖe gbalo gbalo,
eye mù klɔ àlɔ̀ nyèwo ɖɛ, èvuɛ̃ mà-ɖo.
14Gãkea, mù kpenafũ gbè sia gbè,
eye ètodɔ̃ lè na mù, ŋùdekɛ̃nyɛ sia ŋùdekɛ̃nyɛ.
15Ne mù gblɔ̃ be: “Nyè cã, mù la pò nupo sìgbè woawo ke nènea”,
kpɔɖa, e la kè nyi àgɔ̀jèje na mù, lè èvi wòwo be jìjimèviwo dòmè.
16Wàlɛbɛ kè mù jè àgbàgba be ma sè ekèawo keŋu gɔ̃mèa,
e jo nyi tamèbùbu gã ɖe na mù,
17Kaka na gà kè mè mù la gɛ̃ ɖo Tɔhonɔ̀ be Nɔ̀pe Kɔ̀kɔ̀ɛ,
gbɔ̀xue mù la va mɔ̀nu jè woabe ènuwuwu ŋuti.
18Nyàwo be nyi be tèpe kè le ɖiɖia, ye wò dà wo ɖo.
Wò sɔ wo xla ɖo ànyi, ne woa crɔ̃.
19Leke ye àvò pò wo, eye, zè ɖèka kpòa, wo crɔ̃!
Vɔ̃vɔ̃ na wo crɔ̃ gbidi-gbidi!
20Wàlɛbɛ kè wò sitèa, Oò, Tɔhonɔ̀!
Wo bu keŋu-keŋu, sìgbè èdrɔ̃ kè àmè ku,
eye èŋù kèa nène.
21Wàlɛbɛ kè vevesèse ɖɔ èjì nyè mè,
eye èkla nyèa ɖɔ ku àkpɔ̃a;
22ènyè, àmètia, mù titɔ,
eye, sìgbè ègbemèlã lè àpo ŋùku mè nènea,
nyè mu le sè ènu ɖekpe gɔ̃mè ò!
23Gãkea, ŋuti wò kpò mù gbà kù ɖo,
eye wò le ɖùsi-lɔ nyè ɖo àsi.
24Wò sɔ ètopòɖo le fiɔ mù àfɔ̀ɖope,
eye, memlɛ̃nua, wò la xɔ̀ mù ku gogo.
25Àmè kɛ ye lè àsi nyè lè jiŋùkusi, tovò lè ŋuti wò ò?
Wàlɛbɛ kè mù lè ku wòa,
nyè mu le ji ènu ɖekpe lè ànyigbã ji ò.
26Àpe ŋutilã ku àpe susu teŋu gbɔjɔ,
gãkea Mawu ye nyi àpe èjì be ŋusɛ̃,
Mawu ye nyi àpe ècrɔ̃nu kòkòɖàbì.
27Ɖo kpɔɖa, àmè kèwo gble wò ɖɛawo be dòmè la gble,
eye wò la crɔ̃ àmè kèwo keŋu trɔ lè yo wò mèa.
28Vɔ̀a, ènyè yaa, àpe nyɔna ye nyi be ma nɔ̀ àpe Mawu gbɔ.
Tɔhonɔ̀ Mawu ye mù sɔ wɔ̀ àpe bèbèpe,
àleke be, ma ɖè yebe èdɔwɔ̀wɔ kpata fiɔ.
Currently Selected:
Èhàwo 73: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
