Èhàwo 71
71
Fifì kè mù ku àmègãa, mù gbà gble mù ɖɛ ò
1Aò, Tɔhonɔ̀, èwò ye mù sɔ wɔ̀ bèbèpe.
Mù gbà na èŋù ne kpɛ̃ mù, kaka sɔ yì ò!
2Xɔ̀ na mù, ne wòa sɔ jɔ̀jɔɛwɔ̀wɔ wòa hlùɛ̃ mù!
Bɔ̀bɔ̀ èto ɖoɖa gbɔ nyè, ne wòa hlùɛ̃ mù gã.
3Nyi àkpã kè la nɔ wla mù,
kè gbɔ mù la nɔ si yì wè sia wèa.
Ɖè ègbè, ne wòa hlùɛ̃ mù gã,
ɖoa, èwò ye nyi àkpã ku àgbògbò na mù.
4Aò, Mawu nyè, xɔ̀ mù lè àmè vuɛ̃wo si.
Ɖè mù lè àmè nyrãkuwo simè.
Hlùɛ̃ mù so àmè kpòtoewo si.
5Ɖo Tɔhonɔ̀, èwò Mawu ye nyi àpe ŋùɖo,
so kaka àpe ɖèvi mèa, èwò ɖèka ŋuti kpò ye mù donajì ɖo.
6So kaka ènɔ̀ nyè be àdɔ̀mè kea,
èwò ye mù sɔ àpe jìdo na.
Èwò kè ɖè mù to lè ènɔ̀ nyè be àdɔ̀ mèa,
mù la nɔ̀ kafu wò tɛ̀gbɛ̀!
7Àmè sùgbɔ sɔ mù wɔ̀ àhovì be kpɔwɛ,
vɔ̀a, èwò ye nyi àpe bèbèpe àdodoe.
8Ènu nyè mè ɖɔ ku àpo kafu,
eye mù la nɔ mlã àpo gogo gbè sia gbè.
9Mù gbà gble mù ɖɛ, fifì kè mù sĩa ò.
Wàlɛbɛ kè ŋusɛ̃ nyèwo le gble mù ɖɛa,
èwò yaa, mù gbà gble mù ɖɛ ò.
10Ɖo, kɛ̃tɔ nyèwo le gblɔ̃ àpe ènyà.
Àmè kèwo le ɖia hùenu kè wo la ɖè àpe àgbè joa,
wo le blase ɖo ŋuti nyè.
11Wo le gblɔ̃ be: “Mawu gble è ɖɛ! Mì doxa na ɛ̀, ne mìa le è!
Àmè ɖekpe mu la yì xɔ̀ na ɛ̀ ò!”
12Aò Mawu, mù gbà dɔ̃ yì àzɔ̀ge lè ŋuti nyè ò!
Aò Mawu nyè, ɖèbla va xɔ̀ na mù!
13Àmè kèwo jro la crɔ̃ àgbè nyèa nu ne ci, ɖo ŋùkpɛ̃ mè.
Àmè kèwo le ji èvuɛ̃ na mù a ne ci èvlododo ku ègbɔɖìɖi mè.
14Ènyè yaa, èmɔ̃kpɔkpɔ lè àsi nyè kòkòkò!
Eye mù la gbà nɔ mlã àpo kàfù kafu ɖo ji kpe è!
15Ènu nyè la nɔ ɖè àpo jɔ̀jɔɛwɔ̀wɔ fiɔ,
to e gbɔ be nyè mu nya woabe ègbɔsùsu ò cã a,
ènu nyè la nɔ kãkã àpo hlùɛ̃gã, ŋùkèkèwo kpata!
16Mù la kpɔ gomè lè Tɔhonɔ̀ be wɔ̀na gãwo mè,
mù la ɖè gbèfã àpo jɔ̀jɔɛwɔ̀wɔ ɖèka pɛɛ kpò.
17Aò Mawu, so kaka àpe ɖèvimè kea, wò kpla mù.
Eye, kaka va na egbèa, mù la ɖè àpo ŋùdãnu wɔ̀wɔwo fiɔ.
18To e gbɔ be mù sĩ, eye mù fũ èwà cã a,
aò Mawu, mù gbà gble mù ɖɛ, kaka na hùenu kè,
mù la ɖè àpo ŋusɛ̃ fiɔ jìjimè kèwo la vaa,
kaka na hùenu kè, mù la ɖè àpo èdɔ gãgãwo fiɔ jìjimè
kèwo keŋu la jè woa yomè a ò.
19Oò Mawu, èwò kè wɔ̀ ènu gãwoa,
àpo jɔ̀jɔɛwɔ̀wɔ lòlò kaka tɔ jiŋùkusi boo.
Oò Mawu, àmè kɛ ye la teŋu sɔ̀ ku wò?
20To e gbɔ be wò na mù kpefũ veveɖe,
eye mù ɖù àyà sùgbɔ cã a,
èwò ŋutɔ kpò ye la gbà gbɔ̀ mù àgbè,
eye wò la gbà ɖè mù to va ji,
so ànyigbãa be ètùmè ke.
21Wò la gbà do bùbu, bùbu ji na mù,
eye wò la gbà fa àkɔ na mù.
22Eye mù la sɔ sãŋùgu, la jìhà, sɔ kafu àpo ànùkuawɔ̀wɔ.
Oò Mawu nyè, mù la jìhà, sɔ mlã àpo ànùkuawɔ̀wɔ.
Oò èwò, Izràɛl be kɔ̀kɔ̀ɛtɔa!
23Ènyè kè be àgbè wò hlùɛ̃a, ènuyu nyèwo la sò àyo,
la do àpa, sɔ jì jìjɔɛ-ha, sɔ kafu wò!
24Ɛ̃ɛ, àɖe nyè la nɔ pò nupo gbè sia gbè,
so àpo jɔ̀jɔɛwɔ̀wɔ ŋuti.
Ɖoa, àmè kèwo ye le ji èvuɛ̃ na mù a
wo titɔ, eye wo ɖù ŋùkpɛ̃.
Currently Selected:
Èhàwo 71: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
