Èhàwo 7
7
Tɔhonɔ̀ xɔ̀ mù lè kɛ̃tɔwo si
1David be èfũlòha. E jì ì na Tɔhonɔ̀ ɖo hɛ̃nu kè so Bɛnyamìn be kɔ̀ta mèa ta.
2Tɔhonɔ̀ Mawu nyè, èwò ye nyi àpe ètabèpe.
Hlùɛ̃ mù gã, ɖè mù to lè àmè kèwo le tĩ yo nyè mèawo si.
3Mu nyi nène òa, wo la trɛ̃ mù sìgbè àlekè jãŋùta trɛ̃na ènu nène.
Ne wo sɔ mù yìa, àmè ɖekpe mu la teŋu va hlùɛ̃ mù ò.
4Tɔhonɔ̀ Mawu nyè, mù wɔ̀ ènu bàɖà ɖe a?
Mù wɔ̀ màjɔ̀ màjɔ ɖe ɖo àmèwo ŋutia?
5Mù sɔ àlɔ̀ ŋùgbe sɔ do àkpe na àmè kèwo wɔ̀ ènyuɛ̃ na mù a?
Mù tĩ yomè na àmè kè do àyà na mù àgɔ̀ ɖe màjea?
6Ne mù wɔ̀ ekèawoa, eŋuã na ne kɛ̃tɔ ne tĩ yo nyè mè, gbà le mù.
Ne bèa ɖiki àgbè nyèa eye bèa dɔ̃ bùbu nyèa lè ɖiɖɔɛ mè.
7Tɔhonɔ̀ sitè, ne wòa ɖè àdɔ̀mèze wòa fiɔ.
Sitè ɖo kɛ̃tɔ nyèwo be jìbi ŋuti.
Èwò kè ɖo jɔ̀jɔɛ ànyi a, fɔ̃ ne wòa xɔ̀ na mù.
8Dùkɔ̃wo ne bɔ̀ trɔ do wò gòdò.
Eye so èjia, ɖè àpo ŋusɛ̃ fiɔ wo lè èdò.
9Tɔhonɔ̀ èwò kè ɖona kòjo na dùkɔ̃woa,
sò ènyà na mù. Mù wɔ̀ ànùkua na wò
eye mù nyi ɖemànyatɔ.
10Nɔ̀tè ènu bàɖà kè àmè nyrãhũwo le wɔ̀a.
Èwò ye jrònà àmè be susu kudo èjrowo mè kpɔ,
èwò ànùkua Mawu, do ŋusɛ̃ àmè kè le sè ètonu na wòa.
11Mawu ye nyi àkpoxɔ̀nu kè cɔ̃ èji nyèa.
E hlùɛ̃nà àmè kè ɖo èjìmè kɔ̀kɔ̀ɛ.
12Mawu ɖona kòjo lè ànùkua mè,
vɔ̀a, e teŋu do àdɔ̀mèze gbè sia gbè.
13Ne kɛ̃tɔa mu trɔ yebe àgbè nɔ̀nɔ òa,
e le ɖa yebe èwuia, e le xa yebe àŋùdàtia eye e jɔ̀ ɛ̀ ɖotè.
14E le jrà èlãnu kèwo wùnà àmèawo ɖo ɖɛ,
e le do èzò àŋùti kèwo la yì ɖè èzò do ènuwo mèawo nu.
15Kpɔɖa, ènu bàɖà wɔ̀wɔ be èfu le ɖù ì,
e fɔ bùsu be èfu, eye e la jì àjèɖàɖa.
16E le kù èdo wɔ̀ ègũ ɖe,
vɔ̀ e la jè èmɔ̃ kè ye ŋutɔ tre dà ɖɛa mè.
17Ènu bàɖà kè e jràɖo ɖɛa, la trɔ jè ye ŋutɔ be èta ji,
yebe èkunyànyrã la trɔ kɔ̀ ɖo ye ŋutɔ be ètatrè ji.
18Mù la do àkpe na Tɔhonɔ̀, ɖo e nyi ànùkuamè,
mù la mlã Tɔhonɔ̀, èji hũitɔa be nyikɔ.
Currently Selected:
Èhàwo 7: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
