Èhàwo 68
68
Èhà sɔ do wòezɔ̃ na Mawu, èjiɖùtɔa
1David be Èhà, wo ɖè è lè Hàsìnɔ̀ gã be xoma mè.
2Mawu ne sitè gbà! Ne yebe kɛ̃tɔwo ne kãhlɛ̃,
àleke be àmè kèwo crì ìa, wo ne si lè ŋùkɔ̀ na ɛ̀.
3Sìgbè àleke àzìzɔ sina lè àya nu nènea, Tɔhonɔ̀, plu wo ɖoɖa.
Sìgbè àlekè ànyiwo be àgbà srènà lè èzò nu nènea,
àmè vuɛ̃wo la crɔ̃ lè Mawu be ŋùkɔ̀.
4Vɔ̀a, àmè jɔ̀jɔɛwo ne kpɔ jìjɔɛ,
ne woa sòayo, ne woa jɔ̀jì,
lè Mawu be ŋùkɔ̀.
5Mì jì èhà na Mawu! Mì jì èhà kafu yebe nyikɔ!
Mì na gogo àmè kè dona lilikpowo sìgbè èsɔ nènea!
Yebe nyikɔ ye nyi Tɔhonɔ̀. Mì gli ku jìjɔɛ lè yebe ŋùkɔ̀!
6Ècɔɛviwo be ètɔ, àhòsìwo be ènyà xɔ̀ ɖo àkɔtɔ,
ye Mawu nyi lè yebe Nɔ̀pe Kɔ̀kɔ̀ɛ.
7Mawu dona xòmè na àmè kèwo ci àkòŋùgòa.
E jona ègàkpamènɔ̀tɔwo ku jìjɔɛ.
Vɔ̀a, àglajètɔwo ya cina èkuɖìnyigbãwo ji.
8Oò Mawu, wàlɛbɛ kè wò lè ŋùkɔ̀ na dùkɔ̃ wòa,
wàlɛbɛ kè wò kplɔ̀ ɛ̀ to zògbè jia, Ènu bɔ̀ kpoo
9ànyigbã hũhũ, jiŋùkusi ŋutɔ cã hũ.
Eye be kɔ̀ èji gã ɖe ɖɛ,
lè ŋùkɔ̀ na wò, Sìnayì-To be Mawu.
Lè ŋùkɔ̀ na wò, Izràɛl be Mawu.
10Aò Mawu, wò na èji sùgbɔ jà,
sɔ na àgbè àpo ècrɔ̃nu kè gbɔjɔa.
11Àpo ànyigbã kè ji wò li dùkɔ̃ wòa ɖoa,
èwò Mawu ye ɖo è, eye,
lè àpo àdɔ̀mè nyuɛ̃ wɔ̀wɔ gã mèa,
wò ɖo èhiãwo tèpe na wɔ̀amènɔ̀wo.
12Tɔhonɔ̀ ɖè ègbè, eye nyɔ̃nù kèwo yì do àŋɛ̀nyuɛ̃ a,
wo sùgbɔ sìgbè àhùakɔ̃wo nène.
13Èfìɔwo ku àhùakɔ̃wo kãhlɛ̃ keŋu-keŋu.
Nyɔ̃nù kèwo ci àxuea, wo ma àmɔ̀nyɔ̀nuawo.
14Wàlɛbɛ kè mì lè àlɔ̃ mè lè àsàɖa be èzò gbɔ cã a,
Àhɔ̃ne be àwàdawo ɖo àcɔ ku klòsalò,
yebe èfuwo ɖo àcɔ ku sìka hɛ̀ɛ.
15Wàlɛbɛ kè Ŋusɛ̃kpatatɔa kã èfìɔwo hlɛ̃a,
e na èsì-wɔ fàfa jà lè èto do vìvìtia ji.
16Ètowo be èto ye Bacàn be ètoa nyi,
èto gã kè be tamè wɔ̀ càklì càklì
sùgbɔa ye Bacàn be ètoa nyi.
17Èto gã càklì càklì, nukɛ be ŋù wò le bìa?
Nukɛ be ŋù wò le bìa, eye wò le zìɔ̃ èto kè ji Mawu cã be yèa ɖùfìɔ lèa ò?
Ɛ̃ɛ, àfi kè Tɔhonɔ̀ ŋutɔ be yèa nɔ̀ kaka sɔ yìa ye!
18Mawu be àhùakèkevi hotu àtɔ̃ tèpe èkàwìvɔàtɔ̃
tèpe nenè ɖe ye lè yebe àhùakɔ̃wo mè.
Tɔhonɔ̀ lè woa dòmè,
so Sìnayì-toa ji, va ɖo yebe kɔ̀kɔ̀ɛpea.
19Wàlɛbɛ kè wò yì ètoa jia, ekè wò kplɔ̀ àhùalewo vɔ̀a,
wò xɔ̀ ènunanawo lè àgbètɔwo si,
wò xɔ̀ lè àglajètɔwo ŋutɔ cã si, ne èwò Tɔhonɔ̀, wòa nɔ̀ funua!
20Sìtu ye nyi Tɔhonɔ̀ tɔ̀ gbè sia gbè!
Mawu, miabe hlùɛ̃tɔ, wò xɔ̀nà na mi gbè sia gbè. Ènu bɔ̀ kpoo
21Miabe Mawu ye nyi Mawu kè hlùɛ̃nà àmè gãa,
Tɔhonɔ̀ Ŋusɛ̃kpatatɔa si èmɔ̃nu lè, la hlùɛ̃ mi, lè èku si.
22Nyàwo ye be nyi be Mawu la fɔtɔ èta na yebe kɛ̃tɔwo.
E la tùkù àzòdòmè na àmè kèwo
kpɔ̀tɔ̀ le nɔ̀ àgbè lè woabe vuɛ̃wo mèa.
23Tɔhonɔ̀ gblɔ̃ be: “Mù la kplɔ̀ wo so Bacàn,
mù la kplɔ̀ wo so àpù be ègũwo mè,
24àleke be wòa sɔ àfɔ̀ gbìdì wo lè èhũ mè,
Wàlɛbɛ kè àpo àvũwo be àɖe la kpɔ ègo mè lè
kɛ̃tɔwòwo be èlã ɖùɖu mè.”
25Oò Mawu, àmèwo kpɔ gogo kè wò sɔ toa, Mawu nyè be gogo!
Èfìɔ nyè be gogo kè kplɔ̀ ɛ̀ ɖo kɔ̀kɔ̀ɛpea.
26Hàsìnɔ̀wo lè ŋùkɔ̀, èhũpòtɔwo kplɔ̀ wo do.
Tùgbɛ̀jɛwo le pòhũ trɔ do wo.
27Mì kafu Mawu lè bɔ̀bɔ gãwo mè,
mì kafu Tɔhonɔ̀ lè Izràɛl be jɔ̀sope.
28Bɛnyamìn, àdɔ̀mlɛ̃via be hɛ̃nu le kplɔ̀ wo,
Yudà be hɛ̃nu be èfìɔviwo be àmèhaa kplɔ̀ wo do.
Eye Zabulɔ̀n ku Neftalì tɔwo lè woa yomè.
29Ɖè ègbè sɔ ɖè ŋusɛ̃ wòa fiɔ, Oò Mawu!
Ɖè ŋusɛ̃ kpata kè wò sɔ hlùɛ̃ mi sãa fiɔ, Oò Mawu!
30So àpo mawuxɔ, kè pòta na Yèruzàlɛm be èdùa mè,
àfi kè èfìɔwo hɛ̃nà ènunanawo va na wò lèa.
31Kã ŋùmè na Ejiptè, èlãwɔ̀adã ŋuã kè lè àplatiwo dòmèa,
ènyì-suwo be èha ŋuã kè lè dùkɔ̃wo be ènyìwo dòmè,
le ɖiɖi woa ɖokoewo ɖo ànyi, ɖo klòsalò-kɔ̃wo ŋutia.
Kã dùkɔ̃ kèwo lɔ̃nà àhùawɔ̀wɔa wo hlɛ̃!
32Àmèdɔ̃dɔ̃wo la so Ejiptè va.
Etiopìaviwo la kɔ àlɔ̀ yìji, la sɔ woa ɖokoe na Mawu.
33Mìa ànyigbã ji be fìɔdumèviwo, mì jì èhà na Mawu!
Mì jì èhà sɔ kafu Tɔhonɔ̀!
34So kaka blèmà kea, e le do lilikpowo sìgbè èsɔ nènea,
yebe ègbè ɖìnà sìgbè èji-ɖè-ègbè nène. Ènu bɔ̀ kpoo
35Mì mlã Tɔhonɔ̀ be ŋusɛ̃a,
yebe ŋusɛ̃ be nyiɖìɖi lè Izràɛl be dùkɔ̃a ji.
Yebe ŋusɛ̃ lè jiŋùkusi!
36Aò Mawu, wò ɖo vɔ̃vɔ̃ lè kɔ̀kɔ̀ɛpe wòa loò!
Izràɛlviwo be Mawu a nana hɔ̃hlɔ̃ ku ŋusɛ̃ yebe dùkɔ̃a.
Mawu ye jè na kafu!
Currently Selected:
Èhàwo 68: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
