Èhàwo 69
69
Lɔ̃lɔ̃ kè mù ɖo na mawuxɔ wòa
1David be Èhà. Na hàsìnɔ̀ gãa. Ɖo sepòpo ɣe be èhàa be ègbè ɖìɖi ji.
2Aò Mawu, hlùɛ̃ mù gã! Ɖoa, mù le nyrɔ̃,
eye èsìa va ɖo èhlò gbɔ na mù.
3Èbà mà-ɖo gɔ̃mè ɖe le mì mù eye ètètɔpe hùe do àfɔ̀ nyèwo.
Mù le nyrɔ̃ lè èsì wɔ̀gũa mè, eye èsìa le bu èta na mù.
4Mù do àpa be woa xɔ̀ na mù, kaka gbɔjɔ, eye ègbè nyè xa.
Mù kpɔ èmɔ̃ na Mawu nyè, kaka ŋùkuvi nyèwo le ci.
5Àmè kèwo crì mù, àgɔ̀ ɖe màjèa
wo sùgbɔ wu èɖà kèwo lè èta na mù a.
Àmè gbogbo ɖewo sɔ mù wɔ̀ kɛ̃tɔ gbalo.
Wo sɛ̃ŋu, eye wo jro be yèwo la crɔ̃ mù.
Àleke ye mù la teŋu trɔ ènu kè nyè mu fĩ òa, na ɖo ò?
6Aò, Mawu, wò nya àleke mù flù ɖoa,
eye àgɔ̀jèje nyèwo mu lè wawla do wò ò.
7Mù gbà na ma nyi ŋùkpɛ̃ na
àmè kèwo le kpɔ èmɔ̃ na wòa ò.
Aò, Tɔhonɔ̀ Mawu, Ŋusɛ̃kpatatɔ,
mù gbà na àmè kèwo le ji wòa
woa xà ɖo ŋuti nyè, woa ɖìgbɔ wo ò.
Aò, Izràɛl be Mawu!
8Èwò ŋuti mù xà ɖo, le xɔ̀ èzũwo, ènu màkè.
Èwò ŋuti mù xà ɖo, lɔ̃, ŋùkpɛ̃ cɔ̃ ŋùmè na mù.
9Eye mù va trɔ zũ àmèjro, na nɔ̀vi nyèwo,
eye mù va trɔ zũ àmè màjèsi na ènɔ̀ nyè be èviwo.
10Èzò kè mù sɔ le lebè na àpo àxuea le fiɔ̃ èjì mè na mù.
Eye àmè kèwo le dovlo wòa be èzũwo le jè e ji nyè.
11Ekè mù fãvi, eye mù blanua, e trɔ zũ àgɔ̀ ye mù jè.
12Ekè mù tà kòtòkua, Ekèa cã gbà trɔ zũ ènyà na mù.
13Àmè kèwo nɔ̀ ànyi lè àgbonua, le gblɔ̃ àpe ènyà,
eye mù trɔ zũ èhàkpanyà na àmè kèwo le nù àhàa.
14Vɔ̀a, ènyè yaa, mù le fãkue na wò,
Tɔhonɔ̀, lè àpo ɖàgbèwɔ̀wɔ hùenu.
Ɛ̃ɛ, lè àpo lɔ̃lɔ̃ gãa mèa, Aò Tɔhonɔ̀,
sɔ àpo kãkã ɖo ji be hlùɛ̃gãa ɖo kuefã nyèa ŋuti jro!
15Hlùɛ̃ mù to lè bàba mè jro!
Mù gbà ɖè àsi lè ŋuti nyè, ne ma nyrɔ̃ ò!
Xɔ̀ mù lè àmè kèwo crì mù a si!
Hlùɛ̃ mù gã so èsì wɔ̀ ègũa mè!
16Mù gbà tàsi èsì wɔ̀ àdãa, bea kplɔ̀ mù jo ò!
Mù gbà tàsi ègũ bea mì mù ò!
Mù gbà tàsi èdoa, bea miɔ̃ ènu ɖo èta na mù ò!
17Aò, Tɔhonɔ̀, sɔ àpo ànùkua be lɔ̃lɔ̃ a ɖo kuefã nyèa ŋuti jro!
Sɔ àpo màje gã kèa trɔ jè ŋùkɔ̀ mù.
18Eye mù gbà wla àpo ŋùmè do ènyè kè nyi sumɔ̃vi wòa ke ò!
Ɖo kuefã nyèa ŋuti kaba jro! Ɖoa, mù lè tùkaɖa mè!
19Dɔ̃ gogo èkla nyè, ne wòa hlùɛ̃ mù gã!
Xɔ̀ mù lè kɛ̃tɔ nyèwo si!
20Wò nya àleke wo le zũ mù ɖoa,
wò nya àleke wo le dovlo mù ɖoa,
wò nya àleke wo le do mù ŋùkpɛ̃ ɖoa,
eye kɛ̃tɔ nyèwo lè ŋùmè na wò.
21Èvlo do àmèa gbã èjì na mù; eye be do mù èdɔ̀.
Mù ji àmè kè la do bàbà na mù a,
gãkea, nyè mu kpɔ àmè ɖekpe ò.
Mù ji àmè kè la ɖo àsi àkɔ na mù a,
gãke, nyè mu kpɔ àmè ɖekpe ò.
22Wo do àɖi ènuɖùɖu mè na mù,
eye, ekè èsìkɔ tì mù a,
wo kpe àhà sɛ̃sɛ̃ vesì na mù.
23Woa ŋutɔ be ènuɖùɖuwo ne trɔ zũ àfɔ̀ku na wo,
eye vɔsa be àzãɖùɖuwo ne trɔ zũ gàmɔ, sɔ le wo ku woa xlɔ̃wo!
24Woabe ŋùmè ne cɔ̃, ne wo mu gbà kpɔ ènu ke ò!
Eye woabe àlì ne gli, ne woa xa gòbà kaka sɔ yì!
25Kɔ̀ àpo àdɔ̀mèze ɖo woa ji,
eye àpo èjìbibi hɛli-hɛli be èzò ne fiɔ̃ wo!
26Woabe nɔ̀pewo ne ci àgba,
eye àmè ɖekpe mu gbà nɔ̀ woabe gòxɔwo mè ò.
27Ɖoa, wo le tĩ àmè kè wò pòa yomè,
eye àmè kè ŋuti wò do àbìa be vevesèse trɔ zũ àseŋu na wo.
28Dohùɛ do wo ku èvuɛ̃ lè èvuɛ̃ ji!
Eye mù gbà na woa kpɔ gomè lè àpo jɔ̀jɔɛwɔ̀wɔa mè ò!
29Wo ne tutu wo jo lè àgbè xoma a mè.
Ne wo mu gbà ŋlɔ̀ woabe nyikɔwo
ɖo àmè jɔ̀jɔɛwo dòmè ò!
30Vɔ̀a ènyè yaa, wo le dovlo mù, eye mù lè èfũkpekpe mè.
Aò, Mawu, àpo àmè hlùɛ̃gã kpò ye la teŋu fɔ̃ mù ɖotè.
31Eye mù la teŋu jì èhà, kafu Mawu be nyikɔ,
eye mù la sɔ àkpedodo na ɛ̀ gogo.
32Ekèa la jè ŋùmè na Tɔhonɔ̀ wu ènyì-su,
wu ènyì-su kè ɖo àzòa be vɔsa.
33Ne àmè kèwo mu ɖo ŋusɛ̃ ɖekpe òa kpɔ ekèa, wo la jɔ̀jì.
Mìabe èjìwo ne gbɔ̀ àgbè, mì, àmè kèwo le ji Mawu a!
34Ɖoa, Tɔhonɔ̀ ɖona èto èhiãnɔ̀wo,
eye mu ɖènà èkɔ̀ lè àmè kèwo nyi ye tɔ̀a ŋuti,
wàlɛbɛ kè wo lè ègà mèa ò.
35Jiŋùkusi ku ànyigbã, àpù ku ènu
kèwo keŋu le hùã lè e mèa, mì kafu ì!
36Ɖoa, Mawu la hlùɛ̃ Ziɔ̀n gã,
eye be la gbìgbɔ̀ tù Yudà be èdùwo.
Àmèwo la va nɔ̀ funua, eye be la nyi woa tɔ̀.
37E la nyi ècrɔ̃nu na Mawu be sumɔ̃viwo be jìjimèviwo
eye àmè kèwo lɔ̃ Mawu a, la nɔ̀ funua.
Currently Selected:
Èhàwo 69: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
