Èhàwo 66
66
Kafu na Mawu, àmèhlùɛ̃tɔa
1Hàsìnɔ̀ gã be Èhà. Kafu-ha.
Mì, ànyigbã jitɔwo kpata mì pò àsikpe sɔ kafu Mawu!
2Mì jì èhà sɔ kafu yebe nyikɔa be gogo!
Mì sɔ kàfù kafu na ɛ̀ gogo!
3Mì gblɔ̃ na Mawu be: “Àpo wɔ̀nawo ɖìnyi loò!
Àpo ŋusɛ̃ lòlò, àleke be kɛ̃tɔ wòwo vivina ènu mè na wò!
4Ànyigbã jitɔwo keŋu sɔna ŋùmè cɔ̃ ànyi, lè ŋùkɔ̀ na wò.
Wo jìnà èhà na wò, wo sɔna nyikɔ wò jìnà kafu-ha Ènu bɔ̀ kpoo
5Mì va kpɔ ènu kèwo Mawu wɔ̀a ɖa!
Àleke yebe kãlĩnuwo sò àdìka na àgbètɔwo ɖoa ɖa!
6E trɔ àpù zũ ànyigbã pupu.
Àmèwo zɔ̃ àfɔ̀ sò ètɔ̀. Ekèa ŋuti mi la sòayo ɖo.
7E sɔ yebe ŋusɛ̃ le ɖùfìɔ tɛ̀gbɛ̀do.
Yebe ŋùkuviwo lè dùkɔ̃wo ji,
àglajètɔ ɖekpe mu gbà sitè ɖo e ŋuti ò! Ènu bɔ̀ kpoo
8Aò dùkɔ̃wo, mì kafu miabe Mawu a,
eye yebe kàfù kafu ne ɖì.
9E ye le miabe èklawo ɖo àgbè.
Eye mu ɖè èkɔ lè àfɔ̀ gɔ̃mè na mi ò.
10Ɖoa, wò do mi kpɔ, Aò Mawu.
Wò kɔ̀ mi, sìgbè àlekè wo kɔ̀nà klòsalòa nène.
11Wò kplɔ̀ mi ɖo ègàxɔ mè,
eye wò dro èfũ-gbã kpɛ̃kpɛ̃ ɖo ètù mè na mi.
12Wò na, mia havi, àgbètɔwo do mi sìgbè èsɔ nène.
Mi to èzò mè, mi to èsì mè.
Gãkea, wò ɖè mi to, sɔ mi dà ɖo tèpe nyuɛ̃ ɖe.
13Mù la va nɔ̀pe kɔ̀kɔ̀ɛ wòa kudo vɔ̀sawo.
Mù la tu àpe àjɔ̀gbè fìãfiã be èfɛ̃ na wò.
14Àjɔ̀gbè kè mù fìã ku ènuyu nyèwo.
Àjɔ̀gbè kè mù fìã, wàlɛbɛ kè mù lè èhiã mèa.
15Mù la sɔ èlã doàmìwo bɔ̀ ɖo ègbɔsu ku ènyì-suwo ŋuti,
eye woabe àzìzɔ la tù va ɖo kaka gbɔ wò. Ènu bɔ̀ kpoo
16Mì, àmè kèwo keŋu sina Mawu a, mì va ɖo èto ne mìa sè.
Mù la gblɔ̃ ènu kèwo keŋu be wɔ̀ na mù a.
17E ye mù do àpa, fã yɔ;
eye àpe àɖe gli ku kafuhawo.
18Ne mù ɖo èvuɛ̃ ɖe ɖo èjì mèa,
Tɔhonɔ̀ mu la kè ɖo èto mù ò.
19Vɔ̀a, Mawu ɖo èto mù nyàwo!
E le èto ɖo àpe kuefã be ègbèa ŋuti.
20Mawu tɔ̀ ye nyi kàfù kafu,
Mu ɖè èkɔ̀ lè àpe kuefã ŋuti ò.
Mawu kè mu tè mù yebe màje òa.
Currently Selected:
Èhàwo 66: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
