Èhàwo 62
62
Mawu gbɔ ye mù lè fàfa mè lè
1David be Èhà, na hàsìnɔ̀ gãa. Ɖo Yedutùn tɔ̀ ji.
2Mawu gbɔ kpò ye èkla nyè kpɔ gbɔ̃jɛ̃ lè.
E ye gbɔ ye àpe hlùɛ̃gã so.
3Ɛ̃ɛ, e ye kpò ye nyi àpe àkpã ku hlùɛ̃gã.
E ye nyi àpe àgbògbò, nyè mu la teŋu hùã ò!
4Kaka na gà kɛ mè ye mìa kpata
mì la nɔ lũ ɖo àmè ɖèka ji,
be yèwoa mù ì pu ànyi,
sìgbè èglì kè zã ɖo àkpa ɖèkaa nène,
àlo èglìkpa kè le hũhũa nène ò?
5Ɛ̃ɛ, mì ɖo è be yèwo la ɖiɖi ì pu ànyi,
lè yebe nyiɖìɖia mè.
Àjèɖàɖa vivina na mì,
mì tunasì na àmè ku ènu,
vɔ̀a, sɛ̃nakpɛ̃ na àmè lè èjì mè.
6Ɛ̃ɛ, èkla nyè kpɔ gbɔ̃jɛ̃ lè Mawu gbɔ kpoo!
Ɖoa, ye gbɔ ye àpe ŋùɖo lè.
7Ɛ̃ɛ, e ye kpò ye nyi àpe àkpã ku hlùɛ̃gã.
E ye nyi àpe àgbògbò, nyè mu la teŋu hùã ò!
8Àpe hlùɛ̃gã ku gogo lè Mawu si.
E ye nyi àpe àkpã sɛ̃ŋu ku àpe bèbèpe.
9Mì, dùkɔ̃wo keŋu,
mì dojì ɖo e ŋuti wè sia wè.
Mì sɔ mìabe sùsu ɖo yebe ŋùmè,
ɖoa, Mawu ye nyi miabe bèbèpe. Ènu bɔ̀ kpoo
10Ɛ̃ɛ, àyapòpo kpò ye àgbètɔwo nyi,
hùɛ̃yiwo nyi àjè sɔ̃ŋu.
Ne wo dà woa keŋu kpɔa,
wo mu ɖo kpɛ̃kpɛ̃mè ɖekpe ò.
Àyapòpo kpò ye wo nyi.
11Mì mu gbà dojì ɖo èhlɔ̃dãdã ŋuti ò,
eye mì mu gbà sɔ pàtàpa yigò ò.
Ne mìabe àdɔ̀kùnuwo le sùgbɔ ɖo ji cã a,
mì mu gbà dojì ɖo woa ŋuti ò.
12Mawu gblɔ̃ ènyà ɖèka,
vɔ̀a ènyà èvè ye mù sè lè e mè:
Ekèa be: Mawu tɔ̀ ye nyi ŋusɛ̃.
13Ku ekèa be: Ɛ̃ɛ, Tɔhonɔ̀,
tɔ̀ wò ye nyi ànùkua wɔ̀wɔ.
Ɖoa, wò ɖona e tèpe na àmè sia àmè,
zɔ̃ ɖo àmè sia àmè be èdɔwɔ̀wɔ nu.
Currently Selected:
Èhàwo 62: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
