Èhàwo 56
56
Àmè kè yomè wo tĩa, le kpɔ Mawu sinu
1Na hàsìnɔ̀ gãa. Ɖo 'Àhɔ̃ne ɖe lè logòti ɖe ji lè dìdìpe' be ègbè ɖìɖi ji. David be Èhà. Wàlɛbɛ kè Filistìtɔawo le è lè Gat-nyigbã jia.
2Aò Mawu, ku ŋuzĩzĩ na mù!
Ɖoa, àmèwo le tĩ yo nyè mè.
Gbè sia gbèa, wo le pò àvũ ku mù àdãtɔ̀.
3Kɛ̃tɔ nyèwo lè yo nyè mè, wè sia wè.
Wo sùgbɔ le doxa na mù, le kɔ woa ɖokoe yì ji.
4Ne vɔ̃vɔ̃ ɖo mù a, ŋuti wò ye mù la dojì ɖo.
5Mù le kafu Mawu na yebe ènyà kè e gblɔ̃a.
Mawu ŋuti ye mù le dojì ɖo, nyè mu la vɔ̃ ò.
Nukɛ ye àgbètɔ kè nyi ŋutilãa, la teŋu wɔ̀ ku mù ò?
6Wo le ɖèfũ na mù, gbè sia gbè,
woabe susu kpò ye nyi be yèwoa wɔ̀ èvuɛ̃ ku mù.
7Wo blase, le doxa na mù,
le le ŋùkuvi ɖo àfɔ̀tope nyèwo ŋuti,
ne woa ɖè àpe àgbèa jo.
8Wo la teŋu si, kè wo wɔ̀ ènu kèawo keŋu vɔ̀a?
Aò, Mawu! Lè àpo àdɔ̀mèze gã mèa,
sɔ dùkɔ̃ kèa pu ànyi!
9Èwò yaa, wò hlɛ̃ àpe àlenanawo.
Wò xɔ̀ àɖàsì nyèwo ɖo ègò wòa mè.
Wò ŋlɔ̀ wo ɖo àpo xoma mè.
10Ekèa ŋuti, kɛ̃tɔ nyèwo la dɔ̃ yì ŋùgbe,
wàlɛbɛ kè mù la fã yɔ wòa,
eye mù nya be Mawu lè ji nyè.
11Mù le kafu Mawu na yebe ènyà kè e gblɔ̃a.
Ɛ̃ɛ, mù le mlã Tɔhonɔ̀ be ènyà.
12Mawu ŋuti ye mù le dojì ɖo, nyè mu la vɔ̃ ò.
Nukɛ ye àgbètɔ la teŋu wɔ̀ na mù ò?
13Aò Mawu, mù ɖù àjɔ̀gbè be èfɛ̃ do wò.
Mù la sɔ àkpedodo be vɔsa tu ì na wò.
14Ɖoa, wò hlùɛ̃ èkla nyè gã so èku mè.
Wò ɖè àfɔ̀klɛ̃nuwo jo lè àfɔ̀nu na mù,
àleke be mù la teŋu zɔ̃ lè Mawu be ŋùmè,
lè àgbè be kɛ̃klɛ̃ nu.
Currently Selected:
Èhàwo 56: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
