Èhàwo 55
55
Àmè kè wo ɖè àmaa be kuefã
1David be Èhàlo kè wo ɖè lè Hàsìnɔ̀ gã be xoma mèa. Wo la pò èkàsãŋùgu ɖo e ŋuti. Ɖo David be ègbè do àsi ji.
2Aò, Mawu! Ɖo èto àpe kuefã!
Mù gbà ɖè èkɔ̀ le àpe kuefã màtɔtèa ŋuti ò!
3Trɔ kpɔ gbɔ nyè, ne wòa tɔ̀ na mù.
Susu nyè titɔ, mù le na àle, eye mù le dã pòxla,
4Ɖoa, àpe kɛ̃tɔ be àdã le do vɔ̃vɔ̃ na mù.
Wo ɖo ènu vuɛ̃ ɖo ŋuti nyè,
eye wo sɔ àdɔ̀mèze le dohùɛ do mù.
5Èjì nyè ɖɔ ku àkpɔ̃ lè ètù mè na mù.
Èku be àdìka le sò mù.
6Àdìka le sò mù, eye mù le pò tìtìtì.
Mù ɖɔ ku vɔ̃vɔ̃ gã ɖe.
7Ekèa ŋuti mù gblɔ̃ be:
“Aò ne àwàda lè àsi nyè, sìgbè àhɔ̃ne nènea,
mù la kè zrò jo, la yì gbɔ̃jɛ̃.
8Ɛ̃ɛ, mù la kè si jo yì dìdìpe,
eye mù la yì ci zògbè ji. Ènu bɔ̀ kpoo
9Mù la ɖèbla yì àpe bèbèpe,
boo lè àya gble ènu ku yebe àdã wɔ̀wɔ nu”
10Aò, Tɔhonɔ̀, titɔ kɛ̃tɔ nyèwo,
Caka woabe ènyà gbɔ̃gblɔ̃wo.
Ɖo, mù kpɔ tùkaɖa ku àjrèwɔ̀wɔ lè èdùa mè.
11Èzã ku kedèa, wo le trɔ do è, lè yebe èglìawo ji.
Àhovì ku èhũnyànyrãwo ye lè e mè.
12Ènugbegble kpò ye lè e mè.
Zigìdi ku àmè bèble mu dɛ̃na lè yebe èmɔ̃wo ji ò.
13Ne kɛ̃tɔ nyè ɖe ye le zũ mù a,
mù la kè dojì la xɔ̀ ɛ̀.
Ne àmè kè crì mù a ye sitè ɖo ŋuti nyèa,
mù la kè bè do è.
14Vɔ̀a, èwò, àgbètɔ, sìgbè ènyè ke nène ye,
èhavi nyè, èxlɔ̃ nyè veve.
15Mia ku àmè kè dòmè ènyà viviwo nɔ̀ kpɔ,
wàlɛbɛ kè mi zɔ̃nà ku àmèhaa,
lè Mawu be àxuea mèa ye!
16Èku kpàtà ne sò kɛ̃tɔ nyèwo!
Wo ne yì àvlì mè àgbè-àgbe!
Ɖoa, èhũnyànyrã sò àxue ɖo woabe èjì mè.
17Vɔ̀a, ènyè yaa, mù fã yɔ Mawu,
eye Tɔhonɔ̀ hlùɛ̃ mù gã.
18Mù sɔ àkpɔ̃ na àle, fìɛ̃si,
ŋùdekɛ̃nyɛ ku dɔ̃ŋùkusu,
eye be ɖo èto àpe ègbè.
19E jo mù blibo, lebè na mù kɛɖɛ,
so àmè kèwo kpe àhùa ku mù a si.
Ɖoa, àmè kèwo xa mù a, wo sùgbɔ ŋutɔ.
20Mawu ne sè è, ne bèa ɖiɖi wo ɖo ànyi.
E ye kè nyi Mawu lè,
le ɖùfìɔ so kaka gɔ̃mèjèje kea! Ènu bɔ̀ kpoo
Wo mu la trɔ èdɛ̃ gbèɖe ò,
ɖo wo mu sina Mawu ò.
21Èhavi do àlɔ̀ ɖoɖa yebe èxlɔ̃
kèwo be lè ŋuti fàfa mè kudo woa gbɔ.
E gble èkɔ̀do na yebe èzòɖùɖua.
22Yebe ènyàgbɔ̃gblɔ̃ fa sìgbè èsì nène,
vɔ̀a, àhùa ye lè èjì mè na ɛ̀.
Yebe ènu mè be ènyàwo vivi sìgbè ànyisì nène,
vɔ̀a, èwui ɖaɖa ye wo nyi.
23Dro àgbã wòa ɖo Tɔhonɔ̀ ji, eye e la le wò ɖotè.
Mu la ɖè àsi lè àmè jɔ̀jɔɛ ŋuti, ne bèa jè ànyi ò.
24Vɔ̀a, èwò Mawu!
Wò la ɖiɖi àmè vuɛ̃ a ɖo kaka gbegble be ègũ mè ke!
Àmè nyrãku ku àmè flùtɔwo mu la nɔ̀ àgbè,
lè woabe àgbè-zãwo be mamã mè ò.
Gãkea, ènyè ya, mù dojì ɖo ŋuti wò.
Currently Selected:
Èhàwo 55: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
