Èhàwo 51
51
Kuefã na sɔsɔkè
1Na hàsìnɔ̀ gã, David be Èhà. 2Wàlɛbɛ kè gblɔ̃ɖɛtɔ Natàn yì kpɔ ɛ̀, ekè David dɔ̃ ku Bat-Cebà, Urì be èsrɔ̃ vɔ̀a.
3Aò Mawu, ku ŋuzĩzĩ na mù, lè àpo àdɔ̀mè nyuɛ̃ wɔ̀wɔ mè,
eye, zɔ̃ ɖo àpo xòmèfa gãa jia, tutu àpe àgɔ̀jèjewo keŋu jo.
4Lè èsì na mù keŋu-keŋu lè àpe èkunyànyrã mè,
eye kɔ̀ ŋuti nyè so àpe èvuɛ̃ mè.
5Ɖoa, mù jèsi àgɔ̀jèje nyèwo,
eye àpe nuvuɛ̃ gbà lè ŋùmè na mù gãa, wè sia wè.
6Èwò kpò, èwò ɖèka kpò ye mù jè àgɔ̀ do,
eye ènu kè nyi ènu màɣe lè àpo ŋùmèa, ye mù wɔ̀.
Ne wò yì nupo pò gbea, tɔ̀ wò la jɔ̀.
Eye ŋùmèkãkã mu lè àpo ènyà sòso ŋuti ò.
7Kpɔɖa! Àgɔ̀jèje mè ye wo jì mù ɖo,
eye nuvuɛ̃ mè ye ènɔ̀ nyè fɔ àpe èfu lè.
8Kpɔɖa! Nyàwo kè lè èjì mèa, ye wò jina.
Ekèa ŋutia, fiɔ mù ènunya lè èjì mè!
9Sɔ kpatima lè mù keŋu-keŋu, ne ma ɖì.
Lè èsì na mù, ne ma ɣe wu ɖètifu.
10Na ma sè jìjɔɛ ku àyosòso be ènyà,
ne èpu kèwo wò ŋɛ̃awo ne ɖɔ ku jìjɔɛ.
11Ɖè èkɔ̀ lè èvuɛ̃ nyèwo ŋuti,
ne wòa tutu àgɔ̀jèje nyèwo keŋu!
12Aò Mawu! Wɔ̀ èjì kɔ̀kɔ̀ɛ ɖo mè nyè!
Gbìgbɔ̀ sɔ èjro nyuɛ̃ be gbɔ̃gbɔ̃ yeye ɖo mè nyè!
13Mù gbà sɔ mù dãŋùgbe lè ŋùku wò mè ò!
Mù gbà xɔ̀ Gbɔ̃gbɔ̃ Kɔ̀kɔ̀ɛ wòa lè àsì nyè ò!
14Gbà na, ma kpɔ jìjɔɛ be wò hlùɛ̃ mù gã,
eye sɔ èjro nyuɛ̃ be gbɔ̃gbɔ̃ le mù ɖotè.
15Nène a, mù la teŋu fiɔ èmɔ̃ wòwo àgɔ̀jètɔwo,
eye èvuɛ̃ wɔ̀tɔwo la trɔ èdɛ̃, la gbɔ̀ va gbɔ wò.
16Aò Mawu, àpe hlùɛ̃gã be Mawu! Jo mù lè èhlɔ̃dãdã si mè,
eye àɖe nyè la jì èhà sɛ̃sɛ̃ɖe, sɔ ɖè àpo jɔ̀jɔɛwɔ̀wɔ fiɔ.
17Tɔhonɔ̀, hũ ènu na mù, eye ènu nyè la kafu wò.
18Ɖoa, wò mu jina àkpedo be vɔsa ò.
Ne mu nyi nène òa, mù la kè hɛ̃ ɛ̀ va.
Ènumème be vɔsa cã mu jènà ŋùmè na wò ò.
19Aò Mawu, vɔsa kè jènà ŋùmè na wòa, ye nyi
vevesèse be èjì kè do jèsìdo yebe vuɛ̃ a.
Aò, Mawu! Wò mu la gbe èjì kè gbã,
ekè sè vève ɖo yebe èvuɛ̃wo taa ò.
20Lè àpo màje mèa, aò Mawu, wɔ̀ ɖàgbè na Ziɔ̀n.
Gbìgbɔ̀ li Yèruzàlɛm be èglìawo.
21Ekèa yomè ye wò la lɔ̃ jɔ̀jɔɛwɔ̀wɔ be vɔ̀sawo,
ènumème vɔ̀sawo ku vɔsa blibowo la jè ŋùmè na wò.
Ekèa yomè ye wo la sɔ ènyì-suwo savɔ lè vɔsakpe wòa ji.
Currently Selected:
Èhàwo 51: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
