Èhàwo 50
50
Mawu va la sò kòjo
1Àsaf be Èhà.
Ŋusɛ̃kpatatɔa, Tɔhonɔ̀ Mawu le pò nupo.
E le yɔ xixea kpata, so èwèzɛ̃pe, sɔ yì èwèɖoxɔ̀pe.
2So kaka Ziɔ̀n, èdù kè be nyɔnyɔ pò èta na nyɔnyɔwo keŋuã mè,
Mawu le klɛ̃ sìgbè dɔ̃ŋùkusu nène.
3Miabe Mawu a gbãnà, eye yebe vavaa, mu lè kpoo ò.
Ɖoa, èzò le bì ènuwo lè ŋùkɔ̀ na ɛ̀, eye èzĩ le tɔ̀ pòxla ɛ̀.
4Mawu yɔ jiŋùkusi ku ànyigbã ne woa va kpɔ ènu tèpe,
na àlekè ye e la ɖo kòjo na yèbe dùkɔ̃a ɖoa.
5E gblɔ̃ be: “Mì bɔ̀ àpe àmè kɔ̀kɔ̀ɛ
kèwo ye sɔ woa ɖokoewo savɔ,
sɔ ɖùzò ku mùawo na mù!”
6Jiŋùkusi le ɖè yebe jɔ̀jɔɛwɔ̀wɔ fiɔ,
ɖoa, Mawu ŋutɔ ye le ɖo kòjoa! Ènu bɔ̀ kpoo
7E gblɔ̃ be: “Pu èto ànyi, dùkɔ̃ nyè!
Mù la pò nupo, ne wòa sè, Izràɛl dùkɔ̃!
Mù la sɔ ènyà ɖo ŋuti wò!
Ènyè ye nyi Mawu, Mawu kè wò sɛ̃nàa!
8Nyè mu le kã ŋùmè na wò,
ɖo àpo vɔ̀sawo ŋuti, àlo, ɖo àpo ènu mèmevɔsa
kèwo wò kpɔ̀tɔ̀ le wɔ̀ na mù a ŋuti ò!
9Nyè mu hiã ènyì-su ɖe so àpo àxomè ò.
Nène a ke nyè mu hiã ègbɔ-su so àpo ègbɔkpa mè ò.
10Ɖoa, èlã kèwo keŋu lè àvewo mèa, tɔ̀ nyè wo nyi.
Sɔ kpe ɖo èlãha gbogbo kèwo lè ètokɔ̃ɛwo jia ŋuti.
11Mù jèsi ètoji-xèvi ɖe sia ɖe,
eye ègbemè-lãwo kpataa, tɔ̀ nyè ye wo nyi.
12Ne àdɔ̀ wù mù a, mu nyi èwò ye mù la gblɔ̃ ɛ̀ na ò.
Ɖoa, xixea ku ènu kèwo keŋu lè e mèa, tɔ̀ nyè ye wo nyi.
13Ènyì-suwo be èlã ye mù ɖùnàa?
Àlo, ègbɔ-suwo be èhũ ye mù nùnàa?
14Sɔ kafu-hàwo wɔ̀ àkpedo-vɔsa na Mawu bòhũ,
eye nɔ wɔ̀ ɖo àjɔ̀gbè kèwo wò fìã na Jihũitɔa ji.
15Ekèa yomè a, yɔ mù lè àpo èfũzã-gbè.
Mù la hlùɛ̃ wò gã, eye wò la na mù gogo.”
16Vɔ̀a, Mawu le gblɔ̃ na àmè vuɛ̃ a be:
“Èmɔ kɛ ye wò kpɔ, la nɔ hlɛ̃ èse nyèwo lè èta mè,
àlo, la le èzòɖùɖu nyèa ɖo ènu ò?
17Wò crì ètopòɖo nyèwo,
eye wò sɔ ènyà nyèwo dàŋùgbe.
18Ne wò kpɔ fiãfìtɔa, wò wɔ̀nà ɖèka kudo è,
eye wò dona èha ku àhasìwɔ̀tɔwo.
19Wò do ègà ènu na ɖokoe wò ɖo èvuɛ̃wɔ̀wɔ ŋuti, eye wò ɖànà àjè kpò.
20Wò bɔ̀bɔ̀ nɔ̀ ànyi, le àmègblenya gbɔ̃gblɔ̃ mè,
eye wò pònàɖi ènɔ̀ wò be èvi ŋutɔ cã.
21Ènu kèawo keŋu ye wò le wɔ̀, gãkea, nyè mu kè ènu ò.
Ekèa ŋuti ye wò susu be mù lè sìgbè èwò nène.
Vɔ̀a, fifìa, mù le kãŋùmè na wò, le sɔ ènyàa ɖo ŋùmè na wò!
22Mì, àmè kèwo ŋlɔ̀be Mawu a, mì bù ekèa ŋuti kpɔ nyuɛ̃ ɖe!
Ne mu nyi nène òa, mù la trɛ̃ mì hãnyà-hãnyà,
eye àmè ɖekpe mu lè, la teŋu hlùɛ̃ mì gã ò!
23Àmè kè wɔ̀ àkpedodo be vɔsa na mù a,
àmè ŋua ye do bùbu ŋuti nyè.
Àmè ŋua ye mù la fiɔ Mawu be hlùɛ̃gã be èmɔ̃a.
Currently Selected:
Èhàwo 50: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
