Èhàwo 45
45
Èhà na Èfìɔ be èsrɔ̃ɖèɖe
1Hàsìnɔ̀ gãa be Èhàlo. Koreà be èviwo be ènufiɔàmè-nya. Lɔ̃lɔ̃ be èhà kè wo la jì ɖo 'sepòpo ɣe' be èhà be ègbè ɖìɖi ji.
2Ènyà nyuɛ̃ viviwo le fìɔ wlàwlàwlà lè èjì nyè mè.
Wàlɛbɛ kè mù le jì èhà na èfìɔa, àɖe nyè trɔ zũ àɖàŋù-hàkpàtɔ!
3Wò jɔ̀ àmè wu àgbètɔ be èviwo keŋu.
Wo kɔ̀ màje ɖo ènu mè-nya wòwo ji,
ɖoa, Mawu tu sì na wò kaka sɔ yì.
4Tà èwui wòa ɖo àkpa ɖèka,
kãlìwɔ̀tɔ! Sɔ ènyiɖìɖi ku gogo ɖo àcɔ!
5Nɔ̀ àpo ènyiɖìɖi mè, ne wòa sɔ èjiɖùɖu yì ŋùkɔ̀ lè nyàwototo,
ɖokoebɔ̀bɔ, ku jɔ̀jɔɛwɔ̀wɔ mè. Ɖùsi-lɔ wòa la ɖè ŋɔjinuwo fiɔ wò.
6Àpo àŋùti ɖaɖa ne trɔ̃ èjì na èfìɔ be kɛ̃tɔwo;
dùkɔ̃wo ne jè ànyi lè àfɔ̀ gɔ̃mè na wò.
7Oò Mawu! Àpo èfìɔɖùɖu la nɔ̀ ànyi tɛ̀gbɛ̀.
Àpo èfìɔɖùpe be àtikplɔa la nyi jɔ̀jɔɛwɔ̀wɔ be àtikplɔ.
8Wò lɔ̃ jɔ̀jɔɛwɔ̀wɔ eye wò crì èvuɛ̃.
Ekèa ŋuti ye Mawu,
àpo Mawu a do jìjɔɛ be àmì èta na wò,
sɔ wò ɖo èhavi wòwo nu ɖo.
9Àpo àwùwo keŋu le huɛ̃ fiofio ku lifi,
sukɔ̃nì ku àbɛyɛ èkàsãŋùgu be èhà viviwo
le so èfìɔsa kèwo wo ɖo àcɔ na ku ènyìɖuawo mè,
le do jìjɔɛ na wò.
10Èfìɔwo be èvi nyɔ̃nùwo lè nyɔ̃nùvi
kèwo le do bùbu ŋuti wòawo dòmè.
Èfìɔsrɔ̃a do Ɔ̀firò be sìkanu, lètè ɖo ɖùsimè na wò.
11Ɖo èto, nyɔ̃nùvi! Dè ŋùgblè, ne wòa pu èto ànyi!
Àpo ŋùku ne jo lè dùkɔ̃ wòa yomè,
àpo ŋùku ne jo lè ètɔ wò be àxue yomè.
12Na ne àpo tùgbɛ̀jɛ jèjea ne le èjì na èfìɔa.
Cɔ̃ ŋùmè ànyi lè ŋùkɔ̀ na ɛ̀.
Ɖoa, e ye nyi àpetɔ wò.
13Eye Tirò be èdùmètɔwo la hɛ̃ ènunanawo va na wò.
Nène a ke ye dùkɔ̃a be àdɔ̀kùnɔ̀wo
la jro be yèwoa jè ŋùmè na wò.
14Èfìɔvi nyɔ̃nùa do àwù kè ŋuti wo lɔ̃ sìka ɖoa,
ku gogo ɖèɖe, lè yebe èxɔ̀a mè.
15Lè yebe àcɔwua mèa,
wo kplɔ̀ ɛ̀ le yì èfìɔa gbɔ, nyɔ̃nùvi lè ègbèji
kèwo lè e ŋutiawo kplɔ̀ ɛ̀ do.
Wo kplɔ̀ wo gbãnà na wò.
16Wo ɖo èfìɔsaa mè, wo kplɔ̀ wo ɖo èfìɔsa mè.
Wo kplɔ̀ wo ɖo e mè ku jìjɔɛ, ku àyosòso.
17Ŋusùvi wòwo la nɔ̀ ètɔ wòwo tèpe,
wò la ɖo wo èfìɔvi lè ànyigbã a keŋu ji.
18Mù la ɖoŋù nyikɔ wò na jìjimèwo keŋu,
nènea, dùkɔ̃wo la nɔ kafu wò kaka sɔ yì.
Currently Selected:
Èhàwo 45: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
