Èhàwo 44
44
Tɔhonɔ̀, wò la gbe mia?
1Hàsìnɔ̀ gãa be Èhàlo. Koreà be èviwo be ènufiɔàmè-nya.
2Aò, Mawu, mia ŋutɔwo mi sè ku miabe ètowo.
Mia tɔwo tùxo so ènu jɔ̀ àsu kè wò wɔ̀, lè woabe hùenu,
lè blèmà hùenua, ŋuti na mi.
3Wò sɔ àpo àlɔ̀ nyà dùkɔ̃wo jo, eye wò sɔ mia tɔgbewo ɖo woa tèpe.
Wò gbìdì dùkɔ̃wo, wò gbã wo, eye wò na dùkɔ̃ wòa vũvlũ.
4Mu nyi woabe èwuiwo ye wo sɔ ɖù ànyigbã ŋuawo ji ò.
Mu nyi woabe àbɔwo ye wo sɔ wɔ̀ àhùa, xɔ̀ wo ò.
Vɔ̀a, àpo ɖùsi-lɔ sɛ̃sɛ̃, àpo àbɔ,
ku àpo ŋùmè be kɛ̃klɛ̃ lè woa dòmè ye, ɖo wò lɔ̃ wo.
5Oò, Mawu! Èwò kè nyi èfìɔ nyèa, gbe ɖè ègbè kpò!
Yakɔb be jìjimèviwo la ɖùji.
6Èwò ye mi sɔ puna miabe kɛ̃tɔwo ànyi.
Àpo nyikɔ ye mi sɔ ɖona àfɔ̀
àmè kèwo sɔ ènyà ɖo mia ŋutiawo ji.
7Mu nyi àŋùdàti nyèa ŋuti ye mù dojì ɖo ò.
Mu nyi èwui nyèa ye nana mù èjiɖùɖu ò.
8Èwò, Mawu ye na mi ɖù miabe kɛ̃tɔwo ji,
eye wò ɖìgbɔ àmè kèwo kpe ènyà ku mia.
9Mi jìnà èhà, kafuna Mawu, gbè sia gbè,
eye mi dona àpo nyikɔ ɖoji, wè sia wè.
10Gãke fifìa, wò sɔ mi dàŋùgbe, eye wò do mi ŋùkpɛ̃.
Wò mu gbà le kplɔ̀ miabe àhùakɔ̃wo yì àhùagbe ji ke ò.
11Wò na mi tè yì ŋùgbe lè miabe kɛ̃tɔwo be ŋùkɔ̀,
eye kɛ̃tɔawo hlà miabe ènunɔ̀amèsiwo.
12Wò do mi àsi, sìgbè àlɛ̃vi kèwo wo la yì wùa nène,
eye wò kã mi hlɛ̃ ɖo dùkɔ̃wo dòmè.
13Wò sà dùkɔ̃ wò kpɔ̀kpɔ, eye wò mu kpɔ àlè ɖe lè e mè ò.
14Wò sɔ mi wɔ̀ èvlodonu na miabe àxuekɔ̀tɔwo,
àlɔmèɖènu ku ènu ɖì kòkoe na àmè kèwo pòxla mia.
15Wò na mi trɔ zũ èhàkpànyà lè dùkɔ̃wo dòmè,
eye àmèwo hũhũna èta, ne wo kpɔ mia.
16Àpe èvlododo lè ŋùmè na mù, gbè sia gbè,
eye ŋùkpɛ̃ cɔ̃ ŋùmè na mù.
17Wàlɛbɛ kè mù le sè kɛ̃tɔ kèwo sɔ ènyà ɖo ŋuti nyèa be èzũwo,
bùsunyawo, àmècrìnyawo, ku èhlɔ̃dãnyawo be nyikɔa.
18Ènu kèawo keŋu jɔ̀ ɖo mia ji, to e gbɔ be mi mu ŋlɔ̀be wò ò;
Eye mi mu gble èzòɖùɖu wòa ò.
19Miabe èjìwo mu trɔ lè yo wò mè ò.
Miabe àfɔ̀wo mu trã èmɔ̃, jo lè àpo àfɔ̀mɔ ji ò.
20Gãkea, wò tùkù mi hãnyàhãnyà ɖɛ, ɖo gbètewo dòmè.
Eye wò sɔ èku be vìvìti cricri cɔ̃ mia ji.
21Ne mi kè ŋlɔ̀be miabe Mawu be nyikɔ,
eye mi vlũ àlɔ̀ ɖoɖa èdù bu mètɔwo be vòdua,
22Mawu mu la nya ɛ̀ òa?
Ɖoa, E nyana ènu kè wla ɖo èjì be gòglòpea.
23Gãkea, èwò ŋuti mi xà ɖo, jè ŋùkɔ̀ èku, wè sia wè.
Eye wo le kplɔ̀ mi, sìgbè àlɛ̃vi kèwo wo la yì wùawo nène.
24Fɔ̃, Tɔhonɔ̀! Fɔ̃! Nukɛ ŋuti wò le dɔ̃ àlɔ̃ ɖo ò?
Fɔ̃, eye mù gbà sɔ mi dàŋùgbe gbidi ò!
25Nukɛ ŋuti wò le wla àpo ŋùmè do mi ɖo ò?
Wò le ŋlɔ̀be miabe àyàɖùɖu ku àlekè wo le tɛ mi ɖo toa?
26Ɖoa, wo zĩ miabe pòdo tɛ ɖo ànyigbã,
eye gbɔ̃gbɔ̃ cipò na mi.
27Sitè, ne wòa xɔ̀ na mi!
Hlùɛ̃ mi gã, ɖo àpo lɔ̃lɔ̃ màgblàa ŋuti!
Currently Selected:
Èhàwo 44: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
