Èhàwo 40
40
Àkpedodo be èhà
1David be Èhà kè wo ɖè lè hàsìnɔ̀ gãa be xoma mè.
2Mù sɔ ŋùɖo nyèa kpata dà ɖo Tɔhonɔ̀ ji:
E bɔ̀bɔ̀ èto ɖo ji nyè, e sè àpe àvigbea.
3E ɖè mù to lè ègũ tito mè, so bàba kpɛ̃tɛ̃ mè.
E li àpe àfɔ̀wo ɖo àkpã ji,
gbà le àzɔ̃lì nyèa ɖotè.
4E sɔ èhà yeye do ènu mè na mù,
na miabe Mawu ŋutɔ be kàfù kafu.
Àmè fuu la kpɔ ekèa, wo la sɔ bùbu kè jèa na
Tɔhonɔ̀ eye wo la dojì ɖo e ŋuti.
5Jɛ̀jrɛ̀ na àmè kè sɔ yebe ŋùɖo ɖo Tɔhonɔ̀ jia.
Mu kplɔ̀nà ègòyitɔwo do, kaka la do èha kudo àjèɖàtɔwo ò.
6Tɔhonɔ̀ Mawu, wò ɖè sùsu àdodoe ku ŋùdãdɔ
kèwo àmè ɖe mu la teŋu wɔ̀ òa, na mi.
Mù jro la kɔ ègbè yì ji la gblɔ̃ ɛ̀, gbà gblɔ̃ ɛ̀ ke.
Vɔ̀a, wo to gbɔ̃gblɔ̃ ŋuti.
7Wò na mù nya be wò mu ji vɔsa àlo ènunanawo ò.
Wò mu biɔ ènumème vɔ̀sawo
kaka jè èvuɛ̃ kèke vɔ̀sawo ji ò.
8Nène a ye mù gblɔ̃ be: “Kpɔɖa, mù gbãnà gbɔ wò.
Mù kpɔ ènu kè mù ɖo la wɔ̀a, lè èse xoma a mè.”
9Mawu nyè, mù ji la wɔ̀ ènu kè jɔ̀nàjì na wòa.
Èse wòa lè èjì mè ɖaa na mù.
10Àmèha gã dòmè, mù do àŋɛ̀ nyuɛ̃ kèa lè be:
“Tɔhonɔ̀ ye nana vòvo.”
Wò nya be nyè mu la gbe è gbɔ̃gblɔ̃ ò, Tɔhonɔ̀.
11Wò na mù vò. Nyè mu la wla ɛ̀ ɖo àpe èjì mè ò.
Eye mù gblɔ̃ be: “Ànùkua Tɔhonɔ̀ ye hlùɛ̃ mi gã”.
Nyè mu la wla àpo lɔ̃lɔ̃ kudo
àpo ànùkua lè àmèha gã be ŋùkɔ̀ ò.
12Tɔhonɔ̀, wò mu la gbe àpo àdɔ̀mè nyuɛ̃ wɔ̀wɔ na mù ò,
àpo lɔ̃lɔ̃ kudo ànùkua la kpàsà mù do tɛ̀gbɛ̀.
*
13Ɛ̃ɛ, àhovì mà teŋu hlɛ̃wo pòhla do mù.
Àgɔ̀jèje nyèwo cɔ̃ mù kaka nyè mu gbà teŋu le kpɔ ènu nyuɛ̃ ɖe ò.
Wo sùgbɔ wu èɖà kè lè èta na mù a; eye mù gbɔjɔ keŋu-keŋu.
14Tɔ̀ wò jɔ̀ Tɔhonɔ̀, hlùɛ̃ mù gã.
Tɔhonɔ̀ va xɔ̀ na mù kaba.
15Na ŋùkpɛ̃ ne le àmè kèwo le ji èvuɛ̃ na mù a.
Nyà àmè kèwo le ji àpe èkua, ne bùbu ne dɛ̃ wo.
16Na ŋùkpɛ̃ ne bla ènu na àmè kèwo le ɖè àlɔmè
lè ŋuti nyè be: “Ha! Ha! Ha!” Awo.
17Vɔ̀, àmè kèwo keŋu le ji wòa, wo ne ɖu jìjɔɛ be èwè ɖo àpo nyikɔ ŋuti.
Àmè kèwo keŋu lɔ̃, èwò kè hlùɛ̃nà gãa, wo ne nɔ gblɔ̃ be: “Tɔhonɔ̀ lòlò”.
18Mù nyi ènuwɔ̀donɔ̀, gbà ci àgba co, Tɔhonɔ̀ ɖona ŋùku ji nyè.
Wò nyi àpe àlɔ̀do, gbà nyi àpe hlùɛ̃gã. Mawu nyè, va kaba!
Currently Selected:
Èhàwo 40: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
