Èhàwo 39
39
Àgbètɔ nyi ènu gbalo lè Mawu gbɔ: Àgbèa kpòkpòe
1David be Èhà kè wo ɖè lè hàsìnɔ̀ gã Yedutùn be xoma a mè.
2Mù gblɔ̃ sã be: “Mù la kpɔ ɖokoe nyè ji,
ne nyè mu gbà dà lè àɖe mè ò.
Mù la dogà àpe ènu, lè àmè bàɖà be ŋùkɔ̀.”
3Eye mù le àpe àɖe ɖotè kpoo, nyè mu le kè fĩfĩ ò.
Mù bɔ̀nu tototo, vɔ̀ nyè mu kpɔ àlè ɖe ò:
Vevesèse nyèa gbà yì e ji kpe è.
4Èjì nyè le èzò lè àdɔ̀mè na mù, èhùɛjèjewo trɔ zũ vevesèse.
Eye mù tɔ ènupo pòpo gblɔ̃ be:
5“Tɔhonɔ̀, na ma nya àpe àgbèa be vɔ̀vɔnu.
Ɛ̃ɛ, na ma jèsi hùenu kè kpɔ̀tɔ̀ na mù fifìa.
Nène a, mù la nya be nyè mu nyi ènu ɖekpe ò.
6Kpɔ, wò wɔ̀ àgbè zã nyèa sìgbè àlɔ̀gba ɖèka be dìdì mè nène.
E lè sìgbè ènu gbalo nène lè ŋùku mè na wò.
Ne àgbètɔ gbà lè àgbè cã a, e nɔ̀nà sìgbè àya pòpo nène.
7E yìnà gbɔ̀nà, vɔ̀ vɔ̃vɔ̃lì kpò be ɖìnà.
E dona tùkaɖa na ye ɖokoe sùgbɔ,
vɔ̀, ènu sia ènu vɔ̀nà keŋu. E bɔ̀nà ènunɔ̀amèsiwo,
vɔ̀a, àmè kɛ ye la va zã wo ò? Mu gbà nya eŋuã ya ò.
8Fifìa Tɔhonɔ̀, nukɛ ye mù le tɔtè kpɔ ò?
Mù kã ɖo ji wò.
9Ɖè mù lè àgɔ̀jèje nyèwo mè.
Mù gbà na ne ma ɖì kòkoe na yɛ̀yìnɔ̀wo ò.
10Fifìa, mù trɔ àmumui,
nyè mu kè àpe ènu ò; ɖo àpo wɔ̀wɔ ye.
11Tàsi mù pòpo. Àpo àlɔ̀ kpɛ̃kpɛ̃a be èkpò ɖè ŋusɛ̃ nyèa jo.
12Ne wòa sɔ gbe ènyàa, wò dɔ̃ èto na àgbètɔ ɖo yebe àgɔ̀jèje ŋuti.
Wò gble yebe ènunɔ̀amèsi àdodoea dòmè sìgbè àlekè èŋɔvi ɖùnà ènu nène.
Ɛ̃ɛ, àgbètɔwo nyi ènu gbalo.
13Ɖoto àpe kuefã, Tɔhonɔ̀.
Kè èto ɖo àpe àvigbea ŋuti. Kpɔ àpe àvifãfãwo.
Àmèjro ye mù nyi lè gbɔ wò,
èmɔ̃zɔ̃tɔ sìgbè tɔgbe nyèwo ke nène.
14Tàsi mù ɖɛ viɖe, ne ma teŋu kpɔ jìjɔɛ
gbɔ̀xue ne ma yì,
gbɔ̀xue ne ma bu keŋu-keŋu.
Currently Selected:
Èhàwo 39: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
