Èhàwo 37
37
Ètopòɖo na àgbènɔ̀nɔ nyuɛ̃
1David tɔ̀.
Mù gbà do àdɔ̀mèze ɖo àmè bàɖà ŋuti ò.
Mù gbà hùãŋu ènudrãwɔ̀tɔ ò.
2Wo la yrɔ̀ kaba sìgbè àmà nène,
wo la pu sìgbè ègbewo nène.
3Dojì ɖo Tɔhonɔ̀ ŋuti, ne wòa wɔ̀ ènu kè nyɔa kpò;
Eŋuã, wò la nɔ̀ ànyigbã ji lè ŋuti fàfa mè.
4Kpɔ jìjɔɛ lè Tɔhonɔ̀ mè, e la na wò ènu kè wò le jia.
5Sɔ àgbè wòa do àsi na Tɔhonɔ̀.
Dojì ɖo e ŋuti eye e la wɔ̀ kè jèa.
6E la ɖè àpo èɖemànya fiɔ, sìgbè ŋùkèkè be kɛ̃klɛ̃ nène,
kudo àpo jɔ̀jɔɛsòso, sìgbè dɔ̃ŋùkusu jàse nène.
7Bɔ̀nu kpoo lè Tɔhonɔ̀ be ŋùkɔ̀, ne wòa kpɔ e sinu.
Mù gbà bijì ɖo àmè kè le ɖùjia ŋuti ò,
ɖo àmè kè le wɔ̀ ènu drã ŋuti ò.
8Ɖè àsi lè èjìbibi ŋuti, èjì mu gbà ku wò ò.
Tàsi àdɔ̀mèze, gbledo kpò e hɛ̃nà va.
9Ɛ̃ɛ, wo la tutu vuɛ̃wɔ̀tɔwo jo. Eye àmè kèwo
le nɔ̀tè kpɔ Tɔhonɔ̀ sinua, la ɖù ànyigbã be ècrɔ̃.
10E kpɔ̀tɔ̀ viɖe ye àmènyrãkuwo la dɛ̃.
Eye ne wò ɖè èkɔ̀ kpɔ fikè wo nɔ̀ sãa,
wò mu la gbà kpɔ àmè ɖe ò.
11Vɔ̀a, hòmèfanɔ̀wo ye la nɔ̀ ànyigbã ji.
Eye wo la nɔ̀ ànyi lè ŋuti fàfa blibo mè.
12Àmè bàɖàa, nɔ̀nà àjòha mè na
àmè kè le wɔ̀ ɖo Tɔhonɔ̀ be èjro jia,
eye e ɖùnà àɖuklui ɖo e ŋuti cã.
13Vɔ̀a, Tɔhonɔ̀ kònà àmè bàɖà,
ɖo e le kpɔ yebe kòjoɖoɖo zãa gbãnà.
14Àmè bàɖàwo lìɔ woabe èwui to lè àku mè.
Wo jrà woabe àŋùdàtiwo ɖo,
ne woa sɔ te ènuwɔ̀donɔ̀ ku wɔ̀amènɔ̀wo pu ànyi.
Ne woa wù àmè kè lè èmɔ̃ nyuɛ̃a jia.
15Vɔ̀a, woabe èwuia la trɔ̃ woa ŋutɔwo
be èjì eye woabe àŋùdàtia la ŋɛ̃.
16Àmè kè le sètonu na Mawu a be èhiã
nyɔ wu àmè bàɖà be ènunɔ̀amèsi.
17Ɛ̃ɛ, àmè bàɖà be ŋusɛ̃a nu la ci kplò.
Tɔhonɔ̀ la do ŋusɛ̃ àmè kè sènà ètonu na ɛ̀a.
18Tɔhonɔ̀ nya ànùkuamèwo be ŋùkèkèwo,
eye woabe ècrɔ̃-nyigbã la nɔ̀ ànyi kaka sɔyì.
19Èŋù mu la kpɛ̃ wo lè nyrãdo be gàmè ò;
eye lè àdɔ̀toto be hùenua, ènu la sù woa si.
20Ɛ̃ɛ, àmè bàɖàa la ku.
Tɔhonɔ̀ be kɛ̃tɔwo la pu sìgbè àvemè be ègbe nène.
Wo la fiɔ̃, wo la fiɔ̃ ɖiwa lè àzìzɔ mè.
21Ne àmè bàɖà donu lè àmè sia, mu trɔ ɛ̀ va na ò.
Vɔ̀a, àmè kè sènà ètonu na Mawu a,
vena àmè nu eye e mana ènu kudo àmè fàa.
22Àmè kèwo Tɔhonɔ̀ tu sì na a tɔ̀ ye le nyi ànyigbã;
Wo la crɔ̃ àmè kèwo e sɛ̃kpɛ̃ na a wo.
23Ne àmè ɖe be wɔ̀na jè Tɔhonɔ̀ tɔ̀ jia,
Tɔhonɔ̀ nana yebe àfɔ̀ ɖèɖè linakè goŋu-goŋu.
24Ne e gbà klɛ̃ àfɔ̀ cã a,
mu la jè ànyi ò, ɖo Tɔhonɔ̀ le è ɖo àsi.
25Mù nɔ̀ ɖèkajɛ mè sãa, fifìa mù sĩ.
Vɔ̀a, nyè mu kpɔ kpɔ be Mawu ɖènà èkɔ̀
lè àmè kè le sètonu na ɛ̀a ŋuti ò.
Nyè mu kpɔ kpɔ be yebe viwo cã biɔ ènu ɖù kpɔ ò.
26E kuna ŋuzĩzĩ na àmè wè sia wè,
gbà dona ènu na àmè eye sìtu lè èviawo ji.
27Ɖè àsi lè èvuɛ̃ ŋuti, ne wòa wɔ̀ nyuɛ̃.
Eye wò la nɔ̀ àgbè kaka sɔyì.
28Ɛ̃ɛ, Tɔhonɔ̀ lɔ̃nà àmè kè lè jɔ̀jɔɛa.
Mu ɖènà èkɔ̀ lè yebe ànùkuamèwo ŋuti ò.
E kpɔna woa ji tɛ̀gbɛ̀.
Vɔ̀, e la ɖè àmè bàɖà be èviwo jo.
29Àmè kèwo sènà ètonu na Mawu a tɔ̀ ye la nyi ànyigbã a,
wo la ɖù yebe ècrɔ̃ tɛ̀gbɛ̀.
30Àmè kè le sètonu na Mawu a, pònànu ènunyatɔ̀.
Ènyà jɔ̀jɔɛ ye tona so yebe ènu mè.
31Yebe Mawu be èsea lè èjì mè na ɛ̀,
mu la ɖiɖi lè yebe àfɔ̀ ɖèɖe ɖekpe mè ò.
32Àmè bàɖà dona èxa na àmè kè
le sètonu na Mawu a, sɔ nɔ ji yebe èku kpò.
33Vɔ̀a, Tɔhonɔ̀ mu la ɖè àsi lè e ŋuti na ɛ̀ ò.
Ne e yì kòjo mè cã a, mu la na wo la gblehùɛ do è ò.
34Nɔ̀tè kpɔ Tɔhonɔ̀ sinu, le ŋùku ɖo yebe èmɔ̃a ŋuti.
E la ɖo wò gã ɖe ne ànyigbã ji nɔ̀nɔ
eye wò la kpɔ àlekè wo la crɔ̃ àmè bàɖàwo ɖoa.
35Mù kpɔ àmè bàɖà trɔ zũ àmè ɖo ŋusɛ̃ gã ɖe.
Àfɔ̀ sù ànyigbã na ɛ̀ eye
e vũ sìgbè Libàn be sedàtiwo nène.
36Co, e yì ɖiwa. Mu gbà lè ò.
Mù ji ì, vɔ̀ nyè mu teŋu gbà kpɔ ɛ̀ ò.
37Le ŋùku ɖo àmèjɔ̀jɔɛa ŋuti, ne wòa kpɔ ànùkuamè a ɖa!
Àmè kè lɔ̃nà ŋuti fàfa la nɔ̀ àgbè tɛ̀gbɛ̀.
38Co, wo la crɔ̃ vuɛ̃wɔ̀tɔwo kpata.
Wo la gbà gũta na àmè bàɖà be èviwo keŋu.
39Tɔhonɔ̀ hlùɛ̃nà àmè kè sènà ètonu na ɛ̀a gã.
E cɔ̃na e ji kudo ŋusɛ̃ lè nyrãdo be gàmè.
40Tɔhonɔ̀ la kpe ɖo e ŋuti, la gbà hlùɛ̃ ɛ̀ gã.
E la xɔ̀ ɛ̀ lè àmè bàɖà simè,
gbà la hlùɛ̃ ɛ̀ gã, ɖo e dojì ɖo Tɔhonɔ̀ ŋuti.
Currently Selected:
Èhàwo 37: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
