Èhàwo 35
35
Tɔhonɔ̀, dohùɛ do àmè kèwo sitè ɖo ŋuti nyèa
1David tɔ̀.
Tɔhonɔ̀, dohùɛ do àmè kèwo le dohùɛ do mù a,
sitè ɖo àmè kèwo le sitè ɖo ŋuti nyèawo ŋuti.
2Sɔ àpo àkpoxɔ̀nu ku àhùawɔ̀nuawo.
Sitè kplà, ne wòa va xɔ̀ na mù.
3Gbà dɔ̃ èhuã ku àhùafiɔvia, ne wòa pò àmè kèwo tĩ yo nyè mèa.
Gblɔ̃ na èjì nyè be: “Ènyè ye hlùɛ̃ wò gã!”
4Èŋù ne kpɛ̃ àmè kèwo ji la wù mù a,
wo ne dã èta na woa ɖokoewo.
Àmè kèwo jro la wɔ̀ ènu bàɖà kudo mù a,
woa trɔ yì ŋùgbe-ŋùgbe ku ŋùkpɛ̃.
5Tɔhonɔ̀ be àtikplɔtɔa ne nyà wo ɖo ènu,
eye woa trɔ èbèyɔɛ kè àya kplɔ̀ le yìa.
6Tɔhonɔ̀ be àtikplɔtɔa ne ɖè wo ɖo ènu
kaka ne woa ɖiɖi lè èmɔ̃ kè do vìvìtia ji.
7Ɖo gbalo ye wo tre èmɔ̃ ɖo èdo nu ɖɛ na mù.
Gbalo ye wo ɖè èdo ɖo ŋùkɔ̀ na mù, ne ma crɔ̃.
8Gbledo klìko ɖe ne gɛ̃ jè woa ji kplà!
Èmɔ̀ kè wo tre na mù a, ne trɔ le wo,
eye gbledo kèa ne crɔ̃ wo gbidi.
9Eye, mù la ɖu jìjɔɛ be èwè ɖo Tɔhonɔ̀ ŋuti.
Mù la kpɔ jìjɔɛ, ɖo e hlùɛ̃ mù gã.
10Mù la gblɔ̃ so kaka èjì mè be:
“Àmè kɛ ye lè sìgbè Tɔhonɔ̀ nène?
Wò hlùɛ̃nà ènuwɔ̀donɔ̀ lè àmè kè sɛ̃ŋu wu ìa si.
Wò hlùɛ̃nà wɔ̀amènɔ̀ ku ènuwɔ̀donɔ̀
lè àmè kèwo le gbidi woa si mè.”
11Àjè ɖàsèfowo to va.
Wo biɔ mù ènyà kèwo nyè mu nya òa.
12Wo wɔ̀ èvuɛ̃ ɖo ènyuɛ̃ tèpe na mù.
Àmè sia àmè gble mù ɖɛ.
13Mù ci siayi wàlɛbɛ kè lãmè gble woa.
Mù nyàmà àmèti nyèa ku ènubabla
eye mù fãkue tèmàtɔ.
14Mù dãna jàjà sìgbè nɔ̀vi àlo èxlɔ̃ nyè wo nyi nène.
Mù ci kpɔ̃ ku èfũlòlo sìgbè ènɔ̀ nyè ye ku nène.
15Vɔ̀a woawo ya, àpe ànyi jèje ŋutɔ cã dona jìjɔɛ na wo.
Eye wo yì bɔ̀nà ɖo àpe èvuɛ̃ jiji ŋuti.
Àmèjrowo, àmè kèwo nyè mu jèsi sã ŋutɔ cã òa, dona àpa ɖo èta nyè.
16Àjèɖàtɔ kèawo ɖènà àlɔmè lè ŋuti nyè eji-eji,
eye wo ɖùnà àɖuklui.
17Tɔhonɔ̀, wò la nɔ kpɔ ekèa kaka va na gà kɛ mè ò?
Ɖè mù lè àmè bàɖà kèawo si,
ɖè mù lè jãŋùta kèawo si mè.
18Mù la do àkpe na wò lè àmèha gã ɖe be ŋùkɔ̀,
mù la kafu wò lè habɔ̀bɔ gã mè.
19Ne àmè kèwo ɖè ŋùtafui na mù gɔ̃mè màsetɔ̀a,
wo mu gbà kò mù ɖe ò.
Ne àmè kèwo crì mù gbaloa,
wo mu gbà klɛ̃ àzũ mè do mù ke ò.
20Gbèɖe, wo mu jina ŋuti fàfa ò,
vɔ̀a, wo ɖànà àjè àɖàŋùtɔ̀ ɖo àmè nyuɛ̃wo si.
21Wo dona àpa ɖo èta nyè lelele be:
“Hoo! Hoo! Mi kpɔ ɛ̀ ku miabe ŋùkuwo!”
22Tɔhonɔ̀, wò ya wò kpɔ ènu sia ènu, mù gbà bɔ̀ ènu ò,
mù gbà nɔ̀ àzɔ̀ge boo lè ŋuti nyè ò.
23Tɔhonɔ̀ Mawu nyè fɔ̃! Sitè ne wòa sò jɔ̀jɔɛ na mù,
ne wòa xɔ̀ ènyà ɖo èta nyè.
24Wò lè jɔ̀jɔɛ, Tɔhonɔ̀ Mawu nyè, sò jɔ̀jɔɛ na mù jro.
Ne àmè kèawo mu gbà kpɔ jìjɔɛ ɖo ŋuti nyè ò.
25Wo mu gbà gblɔ̃ kpɔ be:
“Ɛ̃ɛ, mi kpɔ ènu kè mi le jia, mi mì ì àgbligbà!” O.
26Èŋù ne kpɛ̃ àmè kèwo la jɔ̀jì ɖo àpe àfɔ̀ku ŋutia,
wo ne bu woabe bùbuwo.
Èŋù ne kpɛ̃ àmè kèwo susu be yèwo sɛ̃ŋu wu mù a.
Wo ne trɔ zũ èvlodonu na àmèwo.
27Vɔ̀a, àmè kèwo be ŋùmè àpe ànùkua wɔ̀wɔ jèawo
ne nɔ do jìjɔɛ be àpa, ne woa nɔ gblɔ̃ tɛ̀gbɛ̀ be:
“Tɔhonɔ̀ lòlò, e le ji yebe sumɔ̃via be ɖàgbè”.
28Eye mù la nɔ gblɔ̃ eji-eji be wò nyi ànùkuamè.
Mù la nɔ jì kafu-hawo na wò tɛ̀gbɛ̀.
Currently Selected:
Èhàwo 35: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
