Èhàwo 32
32
Tɔhonɔ̀ be sɔsɔkè nana vòvo
1David be ènufiɔfiɔ.
Sìtume ye nyi àmè kè be àgɔ̀ Mawu la ɖè jo
eye be la sɔ yebe èvuɛ̃ kèa.
2Sìtume ye nyi àmè kè mu blènà àmè ò,
eye Tɔhonɔ̀ mu hlɛ̃nà àgɔ̀ jèje na òa.
3Sã, kè nyè mu jènàsi àpe àgɔ̀ jèjewo òa,
mù ŋɛ̃nà ŋùkèkè bliboa kpata
eye àpe ŋusɛ̃ cã srènà.
4Èzã kudo kedè ye àpo àlɔ̀a zĩna mù
eye mù gbɔjɔna sìgbè àti kè dɔ̃ŋùkusu yrɔ̀a nène.
5Vɔ̀a, mù ɖè àpe nuvuɛ̃a fiɔ wò, nyè mu wla àpe àgɔ̀jèje ò.
Mù gblɔ̃ be: “Mù la hũ àpe àgɔ̀jèjewo mè na Tɔhonɔ̀.”
Eye wò la ɖè àpe èvuɛ̃ be àgbãa jo lè ji nyè.
6Ekèa ŋuti àpo àmè kɔ̀kɔ̀ɛwo ɖo la fã yɔ wò, ne wo do jèsi woabe àgɔ̀jèjewoa.
Nène a, ne gbledo ɖe la kpe wo cã a, e la glɔ̃ èmɔ̃.
7Wò nyi àpe tabèpe, wò hlùɛ̃nà mù lè gbledo si.
Wò pòhla mù gòdò ku jiɖùɖu be èhàwo.
8Tɔhonɔ̀ gblɔ̃ na mù be:
“Mù la fiɔ wò ènu, gbà ɖè èmɔ̃ kè wò la toa fiɔ wò.
Mù la ɖè àɖàŋù na wò, wàlɛbɛ kè àpe ŋùkuwo lè ji wòa:
9Èsɔ kudo èsɔàkɛtɛa, ènunya mu lè woa si ò.
Wo ɖo la nɔ dɔ̃ èkà mè na wo,
la nɔ kplɔ̀ wo, gbɔ̀xue wo la teŋu sè ètonu.
Mù gbà ɖì wo ò. Eye èvuɛ̃ ɖe mu la kpe wò ò.”
10Àmè bàɖà la ɖù àyà sùgbɔ,
vɔ̀a, Tɔhonɔ̀ la sɔ nyɔna pòhla do àmè kè kã ɖo e jia.
11Mìa ànùkuamèwo, mì haya, gbà jɔ̀jì ɖo Tɔhonɔ̀ ŋuti.
Mì do jìjɔɛ be àpa, mì àmè kèwo ɖo èjì mè kɔ̀kɔ̀ɛa.
Currently Selected:
Èhàwo 32: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
