Èhàwo 18
18
Àkpedo-ha na Tɔhonɔ̀
1Èhà kè wo ɖè lè hàsìnɔ̀ gã be xoma mèa. Tɔhonɔ̀ be sumɔ̃vi David jì ì na Tɔhonɔ̀ wàlɛbɛ kè e hlùɛ̃ ɛ̀ gã lè yebe kɛ̃tɔwo kudo Saolò si mèa. E gblɔ̃ be:
2“Mù lɔ̃ wò Tɔhonɔ̀, èwò ye nyi àpe ŋusɛ̃!
3Tɔhonɔ̀ nyi àkpã kè wla mù a, àgbògbò kè tɔ̃ èkpa trɔ do mù a.
Eye e na mù vòvo. Mawu nyè mè ye mù kpɔ nɔ̀pe lè.
E hlùɛ̃nà mù lè kɛ̃tɔ nyèwo si.
4Mù do àpa yɔ Tɔhonɔ̀ eye e hlùɛ̃ mù lè kɛ̃tɔ nyèwo si.
Mì kafu Tɔhonɔ̀!
5Èku le pò àlì do mù xoxo,
e le do vɔ̃vɔ̃ na mù sìgbè ètɔ̀ jèagla ɖe nène.
6Èkuwode be èkàwo pòxla mù,
eye èku tre èmɔ̃ na mù.
7Lè gbledo nyèa mèa, mù do àpa yɔ Tɔhonɔ̀,
mù fã yɔ Mawu nyè.
So yebe nɔ̀pea, e ɖo èto àpe ègbè.
Àpadodo nyèa, yì jè èto mè ke na ɛ̀.
8Wàlɛbɛ ŋua, ànyigbã hũhũ,
ètowo be dodoewo hùã.
Wo hũhũ lè Mawu be àdɔ̀mèzea be ŋùkɔ̀.
9Àzìzɔ tù so yebe ŋɔ̀tiwo mè,
èzò sɛ̃ŋu ɖe to so yebe ènu mè kudo èzòkawo.
10E ɖiɖi jiŋùkusi eye e ɖì va ànyigbã ji.
Yebe àfɔ̀wo gɔ̃mè do vìvìti cicri.
11E lia yebe ènu ɖoɖo Kèrubim ɖèka ji zrò,
eye e zrò lè àya be àwàdawo ji.
12E sɔ vìvìti wɔ̀ àvɔ sɔ cɔ̃,
èsì do vìvìti kudo lilikpo klìkowo ye trɔ do è gòdò.
13Èzò tɔ̀hɛ kè kɔ̀a, jè ŋùkɔ̀ na ɛ̀,
èzò be kɛ̃klɛ̃ kudo èzòkpe le to lè yebe lilikpowo mè. 14So èjia, Tɔhonɔ̀ na èji ɖè ègbè.
Èjihũitɔa na wo sè yebe ègbè.
Èzò kɛ̃klɛ̃ kudo èzòka bìzòwo ze lè jiŋùkusi.
15Tɔhonɔ̀ dà yebe àŋùtiwo sɔ kãkã yebe kɛ̃tɔwo ɖo xixea mè.
E dà yebe bìɖàwo eye àmè sia àmè kãhlɛ̃.
16Àpù be gɔ̃mè ze peŋu
eye xixea be dodoewo ci àma
lè àpo ènyà gbe na àmè nu;
lè àpo àdɔ̀mèze be àdã nu.
17Tɔhonɔ̀ drɛ̃ àlɔ̀ so jiŋùkusi le mù,
e dɔ̃ mù to lè ètɔ̀ jèaglawo mè.
18E hlùɛ̃ mù lè kɛ̃tɔ sɛ̃ŋu nyèa si,
lè àmè kèwo crì mù a si, àmè kèwo wugã mù a.
19Wo xa mù lè àpe gbledo be gàmè,
vɔ̀ Tɔhonɔ̀ va xɔ̀ na mù.
20E ɖè mù to lè bàɖà mè, na mù vòvo.
E hlùɛ̃ mù ɖo yebe lɔ̃lɔ̃ a ŋuti.
21Mù wɔ̀ ɖo Tɔhonɔ̀ be èsea ji, mù wɔ̀ nyuɛ̃
eye e kɔ̀ àdɔ̀mè ɖo ŋuti nyè.
22Mù zɔ̃ lè Tɔhonɔ̀ be èmɔ̃a ji,
nyè mu trɔ ŋùgbe do yebe ènyà kɔ̀kɔ̀ɛa ò.
23Tɔhonɔ̀ be ɖoɖowo kpata lè ŋùkɔ̀ na mù,
nyè mu ɖèkɔ̀ lè yebe èjro ɖe ŋuti kpɔ ò.
24Ɖo, mù lè ègbèji lè e gbɔ eye mù na àsà èvuɛ̃.
25Mù wɔ̀ ɖo Tɔhonɔ̀ be èsea ji,
e kpɔ ènu kè mù wɔ̀a eye e na mù yebe àjɔ̀.
26Oò Tɔhonɔ̀! Wò wɔ̀nà ànùkua kudo àmè kè lè ègbèji na wòa.
Eye wò ɖènà àpo àdɔ̀mè nyuɛ̃ fiɔna àmè kè wɔ̀nà nyuɛ̃a.
27Wò ɖènà kɔ̀kɔ̀ɛnyinyi wòa fiɔ àmè kè kɔ̀a.
Vɔ̀ wò nɔ̀nà àyèji na àmè kè drãa.
28Èwò ye hlùɛ̃nà àmè bɔ̀bɔɛa gã,
vɔ̀, wò ɖiɖina ègòyitɔ.
29Tɔhonɔ̀, kɔ̀ àgbè nyèa ŋuti
ne wòa nyà vìvìti kè lè ètù mè na mù a jo.
30Mù sinatè ɖo kɛ̃tɔwo ŋuti lè àpo nyikɔ mè.
Mawu nyè be ŋusɛ̃ ye mù sɔ mùnà àgbògbòwo.
31Mawu nyi kplɔ̀tɔ àdodoe eye yebe ènyà mè kɔ̀ peŋu.
Tɔhonɔ̀ nyi àkpoxɔ̀nu na àmè kèwo ji nɔ̀pe lè e gbɔa.
32Tɔhonɔ̀ ye nyi miabe Mawu,
Mawu kè mi le sumɔa ye nyi miabe àkpã.
33Mawu kèa ye ɖɔ̀go na mù ku ŋusɛ̃.
E fiɔna mù èmɔ̃ kè zìɔ̃ a.
34E na àfɔ̀ gɔ̃mè bi na mù sìgbè èse tɔ̀ nène.
E li mù ɖo ètokɔ̃ɛwo ji.
35E tù mù ɖo na àhùa wɔ̀wɔ,
e fiɔ mù àlekè wo zãna gàjɛ̃ be àŋùdàti ɖoa.
36Àkpoxɔ̀nu wòa ye nana mù èjiɖùɖu,
àpo ɖùsilɔ sɛ̃ŋua ye le mù ɖotè
eye àpo àdɔ̀mè nyuɛ̃ wɔ̀wɔ na mù le sĩ kpe è.
37Ku àpo àlɔ̀doa, mù ɖènàbla eye àfɔ̀kɔ̃ nyèwo likè goŋu.
38Mù tĩ kɛ̃tɔ nyèwo yomè kaka yì xe wo,
mù crɔ̃ wo gbɔ̀xue trɔ gbɔ̀.
39Mù gbã wo xãnya xãnya kaka be wo mu gbà teŋu sitè ò,
wo ci ànyigbã lè àpe àfɔ̀wo gɔ̃mè.
40Wò dona mù ŋusɛ̃ lè àvũwɔ̀wɔ nyèwo mè.
Wò nana àmè kèwo sitè ɖo ŋuti nyèwo jènà ànyi lè ŋùkɔ̀ na mù.
41Wò do mù àlɔ̀ ye mù ɖo àfɔ̀ èhlò ji na kɛ̃tɔ nyèawo
eye mù crɔ̃ àmè kèwo sitè ɖo ŋuti nyèa.
42Wo do àpa co àmè ɖe mu lè, la va xɔ̀ na wo ò.
Wo do àpa yɔ Tɔhonɔ̀ ŋutɔ cã, vɔ̀, e ɖè èkɔ̀ lè woa ŋuti.
43Mù nyàmà wo. Wo trɔ sìgbè hũhũ kè àya kplɔ̀ le yìa nène.
Mù kplɔ̀ wo sìgbè ɖiɖɔɛ lè èmɔ̃wo ji.
44Wò cɔ̃ àsi ji nyè lè àgbètɔwo be àvũwɔ̀wɔ kudo mù mè;
eye wò sɔ mù ɖo èga ɖo dùkɔ̃wo nu.
Nène a, èdù kèwo nyè mu jèsi sã òa, ye va sumɔ mù.
45Wo wɔ̀nà ɖo ènu kè mù gblɔ̃a ji trolo,
àmèjroviwo kanafu mù.
46Wo bu woabe jìdo eye àdìka sò wo
eye wo to lè woabe àgbògbò sɛ̃sɛ̃wo mè, le pò tìtìtì.
47Tɔhonɔ̀ lè àgbè! Gogo na àpe àkpã sɛ̃ŋu!
Gogo na Mawu kè hlùɛ̃ mù gãa!
48Mawu ye biɔ èhlɔ̃ na mù,
e na dùkɔ̃wo lè àpe ŋusɛ̃ gɔ̃mè.
49Wò xɔ̀ mù lè kɛ̃tɔ nyèwo simè.
Wò na mù ɖù àmè kèwo sɔ àhùa ɖo ŋuti nyèwo ji,
eye wò hlùɛ̃ mù lè ènyà sɛ̃sɛ̃ hɛ̃tɔwo si.
50Ekèa ŋuti Tɔhonɔ̀, mù le do àkpe na wò
lè dùkɔ̃wo dòmè eye mù gbà le lòlò àpo nyikɔ.
51Jiɖùɖu àkòŋùka ye Tɔhonɔ̀ na yebe èfìɔa.
E ɖènà yebe lɔ̃lɔ̃ a fiɔ àmè kè ye ŋutɔ cã a,
fiɔ David kudo yebe ènukuawo, kaka sɔ yì.
Currently Selected:
Èhàwo 18: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
