Èhàwo 109
109
Tɔhonɔ̀, xɔ̀ ènyà ɖo ta nyè!
1David be Èhà kè wo ɖè lè hàsìnɔ̀ gã be xoma mèa.
Mù lòlò àpo nyikɔ, Oò Mawu, mù gbà bɔ̀ ènu ò.
2Àmè nyrãku kudo àmè flùtɔwo kè woabe ènuwo ɖo ŋuti nyè.
Wo le gblɔ̃ àjèɖànyàwo ɖo ŋuti nyè.
3Wo sɔ èkɛ̃-do-àmè be ènyàwo sɔ pòxla do mù,
eye wo sitè ɖo ŋuti nyè àgɔ̀ ɖe màjè.
4Wo do mù èkɛ̃ ɖo àpe àdɔ̀mè nyuɛ̃ wɔ̀wɔ ŋuti,
co mù le fãkue ɖo woa ta.
5Wo sɔ èvuɛ̃ ɖo nyuɛ̃ tèpe na mù,
eye wo crì mù ɖo àpe èjro nyuɛ̃ wɔ̀wɔ ŋuti.
6Wo gblɔ̃nà so ŋuti nyè be:
“Mi dà àmènyrãku ɖe ɖo e ŋuti ne bèa yì xa ɛ̀,
ne hùɛdotɔ ɖe ne nɔ̀ yebe ɖùsi mè.
7Ne e yì kòjo mèa, yebe ènyà ne gble.
Eye yebe kuefã ŋutɔ cã ne nyi bùsu nya!
8Na yebe àgbènɔ̀zãwo nu ne ci;
eye wòa na àmè bu ne xɔ̀ yebe èdɔa.
9Èviawo ne trɔ zũ ètɔcɔɛviwo
eye èsrɔ̃a ne zũ àsukusi.
10Na yebe èviwo woa nɔ dã, nɔ yì mà-kpɔ jèpe ɖe.
Woa nɔ biɔ ènu tɛ̀gbɛ̀,
lè tèpe kèwo dìdì boo lè woabe nɔ̀pewo.
11Na ègàjìgatɔa ne hlà ènu kèwo kpata lè e sia;
eye àmèjrowo nɔ xɔ̀ ènu kèwo e wɔ̀ èdɔ sɔ kpɔa.
12Na àmè ɖekpe mu gbà wɔ̀ nyuɛ̃ na ɛ̀ ò,
nèneake, àmè ɖe mu gbà nɔ ku ŋuzĩzĩ na yebe cɔɛviwo ò.
13Na yebe jìjimèviwo ne crɔ̃;
eye woabe nyikɔ ne gũ lè àmèha dòmè sɔ̀sɔɛɖe.
14Na woa ɖoŋù ètɔawo be ènu màɣe wɔ̀wɔwo ji na Tɔhonɔ̀.
Ènu ɖekpe mu gbà tutu ènɔa be àgɔ̀jèjewo ò.
15Tɔhonɔ̀ ne ɖoŋù woabe àgɔ̀jèjewo tɛ̀gbɛ̀dò
eye bèa ɖè woabe nyikɔwo jo lè ànyigbã ji.
16Ɛ̃ɛ, àmè kèa mu ɖoŋùku ɖàgbè wɔ̀wɔ ji ò.
E do àyà na wɔ̀amènɔ̀wo kaka yì èku mè
E gbã èjì na hiãnɔ̀wo kudo àmè kèwo hiã àlɔ̀doa.
17Kè e tɔ̀ be kpɛ̃sɛ̃sɛ̃ jɔ̀nàjì na ɛ̀a, kpɛ̃sɛ̃ ne va e ji.
Eye kè e nyi be sìtunya mu jɔ̀nàjì na ɛ̀ òa, sìtu ne na ɛ̀ àsà.
18E sɔ kpɛ̃sɛ̃ tà sìgbè àvɔ nène.
E ɖo lãmè na ɛ̀ sìgbè èsì nène,
gbà ɖo yebe èpuwo mè sìgbè àmì nène.
19Na ne kpɛ̃sɛ̃a ne nyi àwù na ɛ̀ bèa nɔ do,
gbà nyi ègojiblanu kè e la sɔ nɔ bla ègoji tɛ̀gbɛ̀a.”
20Bòhũa, na ekèa Tɔhonɔ̀ ne nyi àmè kèwo le dohùɛ do mù
kudo àmè kèwo le gblɔ̃ ènyà màɣe ɖo ŋuti nyèwo be fɛ̃tu.
21Eye èwò Tɔhonɔ̀ Mawu, wɔ̀ na mù ɖo àpo nyikɔa ŋuti;
sɔ zɔ̃ ɖo àpo lɔ̃lɔ̃ kudo àpo nyɔnawo jia, hlùɛ̃ mù.
22Ɖo wɔ̀amènɔ̀ kudo hiãnɔ̀ mù nyi
eye àpe èjì xɔ̀ àbì lè àdɔ̀mè na mù.
23Àgbè nyèa lè sìgbè vɔ̃vɔ̃lì kè le ɖo èxɔ̀a nène.
Eye wo ɖè mù ɖo ènu sìgbè hùesuvi nène.
24Mù blanu xɔ̀ àzã fuu, eye àmèti nyèa gbɔjɔ.
Eye kù ɖo ènumàɖu ŋutia, èpu ɖèɖe kpò mù trɔ zũ.
25Mù zũ kòkoe na wo.
Kè wo kpɔ mù a, wo hũhũ èta.
26Do mù àlɔ̀, Tɔhonɔ̀ Mawu nyè.
Hlùɛ̃ mù gã sɔ zɔ̃ ɖo àpo lɔ̃lɔ̃ a ŋuti
27Ne woa nya be àpo àlɔ̀ ye nyi ekèa,
be èwò Tɔhonɔ̀ ye wɔ̀ ɛ̀.
28Wo le sɛ̃kpɛ̃ vivivò, vɔ̀a, èwò ya, tu sì fàa.
Ne wo sitè ɖo ŋuti nyèa, na èŋù ne kpɛ̃ wo
eye ne àpo sumɔ̃via ne kpɔ jìjɔɛ.
29Na kɛ̃tɔ nyèwo mu gbà kpɔ bùbu xɔ̀ ò,
ŋùkpɛ̃ ne cɔ̃ wo sìgbè àvɔ nène.
30Mù la nɔ kafu Tɔhonɔ̀ ku ègbè lelele;
ɛ̃ɛ, mù la jì kafu-ha na ɛ̀ lè àgũ dòmè.
31Ɖo e nɔ̀tè lè wɔ̀amènɔ̀a be ɖùsi mè,
ne bèa hlùɛ̃ è lè yebe kòjoɖotɔwo simè.
Currently Selected:
Èhàwo 109: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
