Èhàwo 107
107
Xoma àtɔ̃gɔ̃a
(Èhàw 107 yì 150)
Mì jì èhà na Tɔhonɔ̀ kè ɖènà àmè lè àfɔ̀ku mèa
1Mì do àkpe na Tɔhonɔ̀, ɖo e nyi àdɔ̀mèfàtɔ gbà nyɔ.
Eye yebe lɔ̃lɔ̃ a lè tɛ̀gbɛ̀.
2Na àmè kèwo Tɔhonɔ̀ ɖè èkà wo ne nɔ gblɔ̃ nènea ke,
àmè kèwo be jo lè kɛ̃tɔa sia,
3àmè kèwo be bɔ̀ so ànyigbãwo kpata jia,
so èwèzɛ̃pe ku èwèɖoxɔ̀pe,
so èvègo ku àpùgo.
4Àmè ɖewo bu ci zògbè pupuia ji
kè wo mu teŋu kè ɖo èdù kè mè
àmèwo lèa be èmɔ̃a ŋuti ò.
5Àdɔ̀ wù wo eye sìkɔ tì wo,
eye wo gbɔjɔ.
6Wo do àpa yɔ Tɔhonɔ̀ lè woabe gbledo gàmè
eye Tɔhonɔ̀ ɖè wo to lè woabe èfũwo mè.
7E kplɔ̀ wo ɖɔ̀ɖɔ̀ yì èdù
kè mè àmèwo lèa mè.
8Wo ne doàkpe na Tɔhonɔ̀ ɖo yebe lɔ̃lɔ̃ ŋuti,
ɖo yebe ŋùdãdɔwo lè àgbètɔwo dòmè ŋuti.
9Ɛ̃ɛ, e na èsì àmè kèwo sìkɔ le tìa nù, be sù wo.
E na ènuɖùɖu àmè kèwo le ku àdɔ̀kua fà.
10Àmè buwo nɔ̀ gàkpa mè lè èku be vɔ̃vɔ̃lì mè.
Wo ɖù àyà ŋutɔ eye wo do wo kɔ̀sɔ̀kɔsɔ.
11Ɖo wo sitè ɖo Mawu be ɖoɖowo ŋuti.
Wo crì Mawu kè lè èji hũia be àɖàŋùɖoɖowo.
12Mawu sɔ àyàɖùɖu sɔ pò wo.
Wo jè ànyi eye àmè ɖe mu do wo àlɔ̀ ò.
13Wo do àpa yɔ Tɔhonɔ̀ lè woabe gbledo be gàmè,
eye Tɔhonɔ̀ ɖè wo to lè woabe èfũwo mè.
14E ɖè wo to lè woabe èku be vɔ̃vɔ̃lì mè.
E sò kɔ̀sɔ̀kɔsɔawo na wo.
15Wo ne doàkpe na Tɔhonɔ̀ ɖo yebe lɔ̃lɔ̃ ŋuti,
ɖo yebe ŋùdãdɔwo lè àgbètɔwo dòmè ŋuti.
16Nyàwo e gbã gàjɛ̃ be àgbowo,
e ŋɛ̃ gàyìbɔ be àgboglatiwo.
17Àmè ɖewo trɔ zũ sùkunɔ̀wo,
wo le wɔ̀ ènu màɣe màɣewo.
Woabe àgɔ̀jèjewo hɛ̃ gbledo va woa ji.
18Ènu ɖe be ɖùɖu be ŋusɛ̃ mu gbà lè woa ŋuti ò.
Wo ɖo èku donu vɔ̀ xoxo.
19Wo do àpa yɔ Tɔhonɔ̀ lè woabe gbledo be gàmè
eye Tɔhonɔ̀ ɖè wo to lè woabe èfũwo mè.
20E ɖè ègbè eye wo dà èdɔ̀ na wo
wo ɖè wo to lè yɔ̀do mè.
21Wo ne doàkpe na Tɔhonɔ̀ ɖo yebe lɔ̃lɔ̃ ŋuti,
ɖo yebe ŋùdãdɔwo lè àgbètɔwo dòmè ŋuti.
22Wo ne wɔ̀ àkpedo-vɔsawo, kudo jìjɔɛ,
wo ne gblɔ̃ ènu kè Tɔhonɔ̀ wɔ̀ na woa
23Àmè buwo ɖo àpùji-hũ jèmɔ̃
ne woa yì wɔ̀ èdɔ lè àpù dòmè.
24Àmè kèawo kpɔ ènu kè Tɔhonɔ̀ wɔ̀a,
yebe ŋùdãdɔwo lè àpùa ji.
25E ɖègbè ɖèka kpò ye àya gblenu so
eye e na àsrɔ̀kewo mlì ŋutɔ.
26Wo kɔkɔna àpùji-hũa yì ji boo e yomè a,
wo gbà ɖiɖina ɛ̀ jè àpùa mè zè ɖèka.
Àmè kèwo lè àpùji-hũa mèa be èjì ci àya mè
ɖo gbledo kè le pò àlì do woa ŋuti.
27Wo mu gbà teŋu le nɔ̀tè ò,
wo le zɔ̃ sìgbè àhànùmunɔ̀wo nène.
Wo mu gbà nya ènu kè wo le wɔ̀ ò.
28Wo do àpa yɔ Tɔhonɔ̀ lè woabe gbledo gàmè
eye Tɔhonɔ̀ ɖè wo to lè woabe èfũwo mè.
29E na àya vùdùa jè e mè,
eye àpù srɔ̀kewo nu ɖoɖa see.
30Kè wo kpɔ be àpùa jè e mèa, èjì jɔ̀ wo ŋutɔ.
Eye Tɔhonɔ̀ kplɔ̀ wo yì fikè wo jro la lìɔ èhũa ɖoa.
31Wo ne doàkpe na Tɔhonɔ̀ ɖo yebe lɔ̃lɔ̃ ŋuti,
ɖo yebe ŋùdãdɔwo lè àgbètɔwo dòmè ŋuti.
32Wo ne lòlò yebe nyikɔ lè dùkɔ̃wo dòmè.
Ne woa jì kafu-hawo lè àmèsĩsĩwo be habɔ̀bɔ mè.
33Tɔhonɔ̀ teŋu trɔ ètɔ̀ gãwo wɔ̀ zògbè ji,
eye èsìdowo la pu kpakpla.
34Ànyigbã wɔ̀ nukua, la trɔ zũ ànyigbã mà sɛ̃ku,
ne e jinɔ̀tɔwo nyi àmè vuɛ̃ a.
35Vɔ̀a, Tɔhonɔ̀ teŋu gbà trɔ zògbè wɔ̀ tãku gã ɖe
eye ànyigbã pu kpakpla la trɔ èsìdo.
36Funu ye Tɔhonɔ̀ la sò nɔ̀pe ɖo
na àmè kèwo àdɔ̀ le wùa
eye wo la sò èdùa, la nɔ̀ e mè.
37Wo la wu ènu ɖo àgblèwo mè,
wo la dè vɛ̃-gblewo
eye wo la yà èkusɛ̃sɛ̃awo.
38Tɔhonɔ̀ tu èsì na wo eye wo jì fuu ɖo ji,
woabe èlãhawo mu ɖènà kpɔ̀tɔ̀ gbèɖe ò.
39Vɔ̀a, èfũ, àyà kudo ènuxàxa zĩ èɖewo
ɖo ànyi eye wo ɖè kpɔ̀tɔ̀.
40Tɔhonɔ̀ sɔ vlododo cɔ̃ cãmìwo, e ɖè àsi lè woa ŋuti
eye wo yì bu ci zògbè ji fikè èmɔ̃ ɖekpe mu lè ò.
41Co e lìɔnà wɔ̀amènɔ̀wo to lè èfũ mè.
E nana woabe xòmè kudo èlãwo jìnà ɖo ji drì.
42Ne àmè kèwo ɖo jìmè kɔ̀kɔ̀ɛa wo kpɔ ekèa,
èjì la jɔ̀ wo eye ɖoɖoe la zĩ lè ènudrãwɔ̀tɔwo nu.
43Ne àmè ɖe jro la nya ènua,
e ɖo la le ŋùku ɖo ènu kèawo ŋuti
eye e la jèsi Tɔhonɔ̀ be lɔ̃lɔ̃.
Currently Selected:
Èhàwo 107: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
