Èhàwo 106
106
Mawu be ègbèjinɔ̀nɔ, dùkɔ̃a be èkɔ̀ lìalia
(Àkpa 1.47-48; 1Kro 16.34-36)
1Mì kafu Tɔhonɔ̀!
Mì do àkpe na Tɔhonɔ̀ ɖo e nyi àdɔ̀mèfàtɔ,
eye yebe lɔ̃lɔ̃ a lè tɛ̀gbɛ̀.
2Àmè kɛ la teŋu pò nupo so Tɔhonɔ̀ be kãlìnu wɔ̀wɔwo ŋuti,
eye e la gbà ɖè yebe kafu bliboa fiɔ ò?
3Sìtuɖèɖe ye la nyi na àmè kèwo le do bùbu èsewo ŋuti
eye wo le wɔ̀ ènu kè jè gbà sɔ̀gbèa.
4Ɖoŋùku mia ji Tɔhonɔ̀, èwò dùkɔ̃a be àdɔ̀mè nyuɛ̃wɔ̀tɔ.
Va ji mi kpɔ, miabe hlùɛ̃tɔ.
5Eŋuã mi la kpɔ àpo àmè cãcãwo be nyɔna,
èjì la jɔ̀ mi lè àpo dùkɔ̃a be jìjɔɛ mè,
ne mia go ɖo àpo àmèwo ŋuti.
6Mi ku mia tɔgbewo, mi wɔ̀ ènuvuɛ̃;
mi wɔ̀ ènumàye, ènu nyànyrã sɔ jè àgɔ̀.
7Mia tɔgbewo mu le ŋùkuvi ɖo Mawu be
ènujɔ̀asuwo ŋuti lè Ejiptè sɔ nyanu ò.
Wo ŋlɔ̀be yebe nyɔna gbogboawo,
eye wo jèagla lè plãŋùpòfɛ̃ be àpùa to.
8Co gãke ne Tɔhonɔ̀ bèa sɔ ɖè yebe ŋusɛ̃ tɔ̀xɛa fiɔa,
e hlùɛ̃ wo gã ɖo yebe gogo nyikɔa ŋuti.
9E wo do àpùa cã ye e pu trolo.
Eye e kplɔ̀ wo to ègũ mè be èmɔ̃ ŋuã ji
sìgbè zògbè pupu ji wo le to nène.
10E hlùɛ̃ wo lè àmè kèwo le crì woa simè,
gbà jo wo lè woabe kɛ̃tɔwo si.
11E na èsìa ŋɛ̃ gbã ble èta na wo,
woa dòmètɔ ɖekpe mu kpɔ̀tɔ̀ ò.
12Wàlɛbɛ ŋuã ye wo xɔ̀ yebe nyàwoa ji sè
eye wo jì kafu-hawo na ɛ̀.
13Wo ŋlɔ̀be yebe wɔ̀wɔwo kaba,
wo mu nɔ̀tè kpɔ yebe àɖàŋùɖoɖowo be zɔ̃zɔ̃ sui ò.
14Lè zògbèa jia, wo bìaŋù ènu kè dɛ̃ do woa,
eye wo tè Mawu kpɔ lè èkuɖì-nyigbã ji.
15E wɔ̀ ɖo woabe jojro ji
eye e nyì wo kaka to gbɔ̃gblɔ̃ ŋuti#106.15 Kaka e tì wo. Xoma ɖewo gblɔ̃ be: “E sɔ èkuɖìɖi sɔ pò wo”.
16Lè bɔ̀bɔa mèa, Mosè cã ku Arɔ̀n kè nyi
Tɔhonɔ̀ be àmè kɔ̀kɔ̀ɛa be ènu le ve woa ŋuti.
17Ekèa na be ànyigbã hũ eye e mì Datàn,
eye e gbà bu ŋùkumè na Abiràm be àhùakɔ̃a.
18Èzò fiɔ̃ wo, èzò be àɖe vàvlàwo fiɔ̃ àmè nyrãkuwo.
19Wo wɔ̀ ènyìvi lè hòrɛb-toa ji,
wo do ènu gũ na gàkpo-tòlia.
20Nène ye wo ɖɔ̀lì woabe gogo be Mawu a kudo ènyì,
ènyì kè ɖùnà ègbea yeŋu.
21Eye wo ŋlɔ̀be Mawu kè hlùɛ̃ wo gã,
e wɔ̀ ènu jɔ̀ àsuwo na wo lè Ejiptè.
22Àmè kè wɔ̀ ŋùdãnuwo lè Cam be ànyigbã ji,
gbà wɔ̀ ènu jɔ̀ àsuwo lè plãŋùpòfɛ̃ be àpù toa.
23Eye e gblɔ̃ be yè la crɔ̃ wo,
vɔ̀ yebe àmè cãcã Mosè ye nɔ̀tè lè yebe ŋùmè,
xɔ̀ àgɔ̀jèjea nu sɔ fa yebe èjìbibi-dã kè la crɔ̃ woa.
24E yomè a, wo dovlo ànyigbã nyuɛ̃a,
wo mu gbà xɔ̀ Tɔhonɔ̀ be ènyà ji sè ò.
25Wo lìlìhũi ɖo Tɔhonɔ̀ ŋuti lè woabe gòxowo mè,
wo mu ɖo èto Tɔhonɔ̀ be ègbè ò.
26Eye kè e kɔ àlɔ̀ yì jia, e fìã àjɔ̀gbè
be yè la tàsi wo la crɔ̃ lè zògbèa ji.
27E kã àtãŋu cã be yè la kãkã
woabe jìjimèviwo ɖo ànyigbã keŋu ji
eye yè la na, wo la ku ci àmèjrowo dòmè.
28Wo sɔ woa ɖokoe savɔ na vòdu Bal lè Peɔ̀r
eye wo ɖù èlã kè wo sɔ savɔ na kukuwoa.
29Nène ye woabe wɔ̀wɔwo do àdɔ̀mèze na ɛ̀
eye èdɔ̀ vuɛ̃wo gbã cɔ̃ wo.
30Vɔ̀a, Pinàs sitè gà ŋuã mè sɔ gbe ènyàa
eye èdɔ̀ vuɛ̃ a ɖo àlɔ̀tè.
31Eye Tɔhonɔ̀ bù ì ɖo jɔ̀jɔɛ ji
so jìjimè yì jìjimè kaka sɔ yì.
32Wo do àdɔ̀mèze na Tɔhonɔ̀ lè Meribà be èsìa#106.32 Meribà be èsì kèa va lè àdɔ̀mèze yomè. Ɖo Mawu biɔ so Mosè si be ne bɔ̀ dùkɔ̃a ne yèa na ɛ̀ èsì kè be le ji lè èjìbibi mèa. Vɔ̀, Mosè bijì eye e sɔ yebe èkpòa sɔ pò Meribà be àkpã kè mè Mawu ɖè èsì to lè na dùkɔ̃a. E ye wɔ̀ be ètodɔ̃dɔ̃ va Mosè ji gbɔ,
ekèa hɛ̃ gbledo va Mosè ji ɖo woa ŋuti.
33Ɖo wo na Mosè bijì kaka mu gbà va nɔ̀ ye ɖokoe mè ò
eye ènyà gɛ̃ lè ènu na ɛ̀ tàflà.
34Wo mu crɔ̃ Kanàn dùkɔ̃wo
sìgbè àlekè Tɔhonɔ̀ biɔ so woa si nènea ò.
35Vɔ̀a, wo wɔ̀ ɖèka kudo àmè mànya Mawu kèawo,
kaka wo yì le pò woabe kòɖowo.
36Wo yì sumɔ woabe vòduwo,
ekèa trɔ zũ èmɔ̃ tetre na wo.
37Nyàwo, wo sɔ woabe èvi ŋusù
ku nyɔ̃nùwo savɔ na legba.
38Eye wo kɔ̀ kunùmewo be èhũ ɖɛ,
woa ŋutɔwo be ŋusùviwo ku nyɔ̃nùviwo,
ye wo sɔ savɔ na Kanàn be vòduwo.
Eye woabe èhũa gble ànyigbã.
39Wo trɔ zũ àmè pòɖiwo to woabe wɔ̀nawo ji,
Wo gble woa ɖokoewo sìgbè àhasìwɔ̀tɔwo nène.
40Nène a ye Tɔhonɔ̀ be jìbibi be àdãa jè yebe dùkɔ̃a ji.
Kaka be ye ŋutɔ be ècrɔ̃nu gbeŋɔ na ɛ̀.
41E ɖè wo do àsi na àmèjroviwo:
Woabe crìtɔwo va ɖù gaglasu ɖo woa ji.
42Woabe kɛ̃tɔwo ɖiki wo,
eye wo bɔ̀bɔ̀ wo ɖo woabe gɔ̃mè.
43Tɔhonɔ̀ hlùɛ̃ wo zè naɖe,
vɔ̀a, wo kpɔ̀tɔ̀ lìa woa ɖokoewo
eye e nyrɔ̃ wo ɖo woabe dàdawo mè kpe è.
44Co, kè e sè woabe àpa a,
e ɖèŋùku kpɔ woabe àyàa.
45E ɖoŋùku yebe zòɖùɖu
kè e wɔ̀ kudo wo lè lɔ̃lɔ̃ mèa,
eye e trɔ yebe ɖoɖo a.
46Tɔhonɔ̀ na be wo ku ŋuzĩzĩ
na wo lè woabe àhùale nyinyi mè.
47Oò! Tɔhonɔ̀ miabe Mawu, hlùɛ̃ mi gã
ne wòa cã mi bɔ̀ lè dùkɔ̃wo dòmè.
Mi le mlã àpo nyikɔ kɔ̀kɔ̀ɛa.
Eye mi le na wò gogo to kafuhawo mè.
48Gogo na Tɔhonɔ̀,
Izràɛl be Mawu a so mà-vɔ yì mà-vɔ.
Eye dùkɔ̃a kpata ne gblɔ̃ be:
“Àmèn! Mì kafu Tɔhonɔ̀!”
Currently Selected:
Èhàwo 106: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
