Èhàwo 105
105
Izràɛl be àseŋu so Mawu be ŋùdãnu ŋuti
(Àkpa 1-15; 1Kro 16. 8-22)
1Mì do àkpe na Tɔhonɔ̀, mì nɔ yɔ yebe nyikɔ.
Mì ɖè yebe ènujɔ̀asuwo fiɔ lè dùkɔ̃wo dòmè.
2Mì jì èhà na ɛ̀, mì jì èhà viviwo na ɛ̀.
Mì pò nupo so yebe ŋùdãdɔwo kpata ŋuti.
3Mì nɔ go lè yebe nyikɔ kɔ̀kɔ̀ɛa mè,
mì àmè kèwo le ji Tɔhonɔ̀a, mì jɔ̀jì.
4Mì trɔ va ji Tɔhonɔ̀ ŋusɛ̃kpatatɔa,
mì nɔ ji yebe ŋùmè tɛ̀gbɛ̀.
5Mì ɖoŋù yebe ŋùdãdɔ kèwo be wɔ̀a,
mì nɔ ɖoŋù yebe ŋùdãdɔ ku ènyàmèsòsowo.
6Mìa Tɔhonɔ̀ be sumɔ̃vi Abràham be jìjimèviwo,
mìa Yakɔb, yebe àmècãcã be viwo.
7Tɔhonɔ̀ ye nyi miabe Mawu;
e ye le kplɔ̀ ànyigbã kpata.
8E ɖonaŋù yebe èzòɖùɖua ji tɛ̀gbɛ̀,
ku ègbè kè e na, sɔ na àkɔwo kpata kpata.
9Èzòɖùɖu kè e wɔ̀ kudo Abràham,
eye e kã yebe àtãŋu na Izàk.
10E ɖokpe e ji na Yakɔb to èse ji,
ekèa ye le nyi zòɖùɖu mà-vɔ na Izràɛl.
11Kè e gblɔ̃ be: “Mù la sɔ Kanàn be ànyigbã a na wò,
e la nyi àpo ècrɔ̃nu.”
12Mia tɔgbewo mu sùgbɔ wàlɛbɛ ŋuã ò.
Àmè viɖe kpò wo nyi lè àmèjro-nyigbã ŋuã ji.
13Wo sã lè ànyigbã ɖe ji yì èbu ji,
so èfìɔdu ɖe mè yì èfìɔdu bu mè.
14Vɔ̀a, Tɔhonɔ̀ mu na èmɔ̃ àmè ɖe ne tɛ̃ŋùkuvi do wo ò.
Ɛ̃ɛ e dɔ̃ èto na èfìɔwo ɖo woa ta.
15E gblɔ̃ be: “Mì mu gbà tɔ àsi àpe àmè ɖèɖovòwo ò,
mì mu gbà wɔ̀ ènu bàɖà ɖekpe ku àpe gblɔ̃ɖɛtɔwo ò.
16E na àdɔ̀ to lè ànyigbã ji
eye ènuɖùɖu dɛ̃ keŋu-keŋu.
17Vɔ̀a, e dɔ̃ àmè ɖe jè ŋùkɔ̀ na wo:
e kè le nyi Yosɛ̀f, àmè kè wo sà sìgbè kluvi nènea.
18Wo do àmèviga àfɔ̀wo na ɛ̀,
eye wo sɔ ɛ̀ yì dogà,
19kaka sɔ na gbè kè gbè yebe ènyà va va e mè,
eye Tɔhonɔ̀ ɖè kunù na ɛ̀.
20Ejiptè be èfìɔa ɖègbè be woa ɖè àsi lè e ŋuti,
dùkɔ̃wojiɖùtɔa ɖè è to lè ègàkpaa mè.
21E sɔ ɛ̀ ɖo àpetɔ ɖo yebe àxuea nu,
eye e le kpɔ yebe ènunɔ̀amèsiwo keŋu ji.
22Yosɛ̀f fiɔ yebe ɖoɖowo yebe èdùdɔnunɔ̀tɔwo
e gbà fiɔ ènunya yebe ètopòɖotɔwo
23E yomè a, Izràɛl cã va Ejiptè,
eye Yakɔb trɔ zũ àmèjro lè Cam-nyigbã ji
24Eye Tɔhonɔ̀ na yebe dùkɔ̃a jì èvi fuu
e gbà na Izràɛlviwo ɖo ŋusɛ̃ wu woabe kɛ̃tɔwo.
25E trɔ Ejiptèviwo be èjì, kaka wo crì Izràɛl.
Eye wo xɔ̀nà èkpli na yebe dùkɔ̃a.
26Nène a, e dɔ̃ yebe sumɔ̃vi Mosè
kudo Arɔ̀n kè ye ŋutɔ cã a.
27Mawu na wo wɔ̀ ŋùdãdɔwo
lè Ejiptèviwo dòmè.
28Mawu na ye vìvìti cɔ̃ wo ji sìgbè èzã nène
eye àmè ɖekpe mu teŋu gbe yebe ègbè ò.
29E na woabe ètɔ̀wo trɔ zũ èhũ,
eye e na èlãvivo keŋu ku.
30E na woabe ànyigbã ɖɔ ku àbìtowo
kaka yì kɔ̀ ɖo woabe èfìɔa be àxuewo mè.
31Mawu ɖègbè eye tɔ̀bɔ̀su ɖù àmèwo
ku èmuwo va cɔ̃ Ejiptè be èdùa kpata ji.
32E na èsìkpe wuwli jà ɖo èji be tèpe,
eye èzò vlàvlà kɔ̀ ɖo ànyigbã ji.
33E gbà sò woabe vɛ̃kawo ku èvòtiwo pu ànyi,
eye e ŋɛ̃ woabe àgbonu-tiwo.
34E ɖègbè eye hùesuvi kudo
èŋɔviwo va ɖo gbãŋu-gbãŋu.
35Wo ɖù ègbekuiwo keŋu lè woabe ànyigbã ji,
gbà ɖù àgblèmènukuwo kpata.
36E gbà wù Ejiptètɔwo be ŋùkɔ̀gbevi ŋusùwo,
woa tɔwo be àlìmè be ŋusɛ̃ cucugbã tɔ̀awo.
37E yomè a, e kplɔ̀ mia tɔgbewo
to lè Ejiptè ku klòsalò kudo sìka.
Eye ɖɔ̀ɖɔɛnɔ̀ ɖekpe mu nɔ̀ woabe kɔ̀tawo mè ò.
38Wàlɛbɛ kè wo joa, èjì jɔ̀ Ejiptèviwo ŋutɔ
ɖo wo do vɔ̃vɔ̃ gã ɖe na wo.
39Mawu vlũ lilikpo sɔ cɔ̃ woa ji
ne kɛ̃tɔwo mu gbà kè ɖo woa ŋuti ò
eye lè èzã mèa, e nana wo èzò
kè kɔ̀nà woabe àfɔ̀topewo.
40Vɔ̀a, wo biɔ ènuɖùɖu
eye Mawu hlɛ̃ tèkliviwo ɖo woa ji
eye wo cã kpɔ̃nɔ so èji#105.40 Tot 16.13-18.
41E hũ ènu lè àkpã nu, eye èsì ɖùɖù
srà to zògbè nyigbã ji sìgbè ètɔ̀ nène.
42Ɛ̃ɛ, Mawu ɖoŋùku yebe àjɔ̀gbè kɔ̀kɔ̀ɛ
kè e fìã na Abràham, yebe sumɔ̃via ji.
43Eye e kplɔ̀ yebe dùkɔ̃a to ku jìjɔɛ,
yebe àmè cãcãwo le jì èhàgbè viviwo.
44E yomè a, e sɔ dùkɔ̃ buwo be ànyigbã na wo
eye wo kpɔ gomè lè èdɔ kè dùkɔ̃awo wɔ̀a mè.
45Ekèa, ne woa teŋu le ŋùku ɖo yebe kɔ̀dowo ŋuti,
gbà nɔ kpɔ yebe èseawo ji.
Mì kafu Tɔhonɔ̀.
Currently Selected:
Èhàwo 105: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
