Èlododowo 9
9
Ènunya le yɔ bòlìmècitɔwo
1Ènunya ɖo sɔti adrɛ̃ ànyi eye e sɔ sò yebe àxue. 2E wù yebe èlãwo, e wɔ̀ vɛ̃. Eye yebe ènuɖùɖua sɔ̀gbè. 3E dɔ̃ yebe sumɔ̃vi nyɔ̃nùwo ɖoɖa èdùa be tèpe xɔ̀asì ne woa do àpa gblɔ̃ be: 4“Mìa bòlìmècitɔwo, mì va tèpe kèa!” E na wo gblɔ̃ na àmè kèwo susu hùedoawo be: 5“Mì va ɖù àpe ènuɖùɖu kè mù ɖàa, mì va nù vɛ̃ kè mù wɔ̀a! 6Mì jo lè mìabe èlãnu wɔ̀wɔwo gbɔ ne mìa nɔ̀ àgbè! Mì sɔ ènunya be àfɔ̀topea kpò!”
Ènunyatɔ kudo àmèkòtɔa
7Àmè kè le gbe ènyà na àmè kè ɖùnà fɛwu ɖo ènu sia ènu ŋutia, mu xɔ̀nà àlìlɔ ò. Àmè kè le gbe ènyà na àmè vuɛ̃ a, xɔ̀nà èzũ. 8Mù gbà gbe ènyà na àmè kè ɖùnà fɛwu ɖo ènu ŋuti ò, mu nyi nène òa, e la crì wò. Vɔ̀ ne wò gbe ènyà na ènunyatɔa, e la lɔ̃ wò kpe è. 9Pòtoɖo na ènunyatɔ, e la gbà kpɔ ènunya ɖo e ji kpe è. Fiɔ ènu àmè kè le wɔ̀ ènyuɛ̃a ne yebe ènunya ne sĩ ɖo ji kpe è. 10Ènunya be gɔ̃mè jèje ye nyi Tɔhonɔ̀ be vɔ̃vɔ̃. Ènunya ye nyi be woa nya àmè kè lè kɔ̀kɔ̀ɛa. 11Ɛ̃ɛ, ènyè ènunya, mù la dà ŋùkèkèwo ɖo àpo àgbèzã ji eye mù la na èpè wòwo la jì ɖo eji. 12Ne wò nyi ènunyatɔa, wò la ɖì ì. Ne wò le ɖù fɛwu ɖo ènu ŋutia, wò la va kpɔ e mè sonuwo.
Ènumànya le wɔ̀ yɔyɔ
13Ènu bàɖà lè sìgbè nyɔ̃nù kè wɔ̀nà tùkaɖa, kè mu nya ènu ɖekpe ò, eye be cibòlìmèa nène. 14E nɔ̀nà ànyi ɖo yebe àgbo nu lè èdùa be tèpe xɔ̀asì. 15Lè funua, e yɔna àmè kèwo va le yì eye wo le kpɔ ŋùkɔ̀ tututua gblɔ̃ be: 16“Mì va, mìa ènumànyatɔwo!” E gblɔ̃nà na àmè kèwo cibòlìmèa be: 17“Àhà kè wo fìã a vivina nùnu, eye ènuɖùɖu kè wo ɖù lè bèbe mèa, vivina ŋutɔ.” 18Co àmè kèawo mu nya kpɔ gbèɖe be yèwo le zɔ̃ kudo àmè kukuwo ò, be ènu bàɖà be èxlɔ̃wo lè èkuwode xoxo vɔ̀ ò.
Mina Bible © Bible Society of Togo, 2014.