Èlododowo 10
10
Èlododo so àgbè nyuɛ̃ nɔ̀nɔ ŋuti
1Salomɔ̀n be èlododowo.
Èvi kè ɖo ènunyaa, dona jìjɔɛ na ètɔa. Eye ɖèvi kè ènunya hùe do a, dona ènɔa ŋuzĩzĩ mè.
2Àɖùflui be ènuɖùɖu mu dɔ̃na àmè ji gbèɖe ò, vɔ̀ àgbè nɔ̀nɔ nyuɛ̃ ɖènà àmè lè èku mè.
3Àmè kè le wɔ̀ ènu nyuɛ̃a, Tɔhonɔ̀ nana àdɔ̀ mu wùnà ɛ̀ ò. Vɔ̀, Tɔhonɔ̀ xena èmɔ̃ na àmè kèwo le wɔ̀ ènu bàɖàwo be jijiwo.
4Kuviɔ̃tɔ be àlɔ̀wo hɛ̃nà èhiã va, vɔ̀, àdɔ̀kùnuwo sona àlɔ̀ kèwo wɔ̀nà èdɔa mè.
5Ènunyatɔ ye yànà àgblè kè e dà a be nukuwo, vɔ̀ e jè be woa crì àmè kè le dɔ̃ àlɔ̃ lè nukuyàya hùenua.
6Àmè kè le wɔ̀ ènu nyuɛ̃a, kpɔna sìtuwo xɔ̀nà. Vɔ̀ ènu bàɖàwɔ̀tɔwo be nupo wlana èdrã.
7Àmè kè wɔ̀nà ènu nyuɛ̃a, gblena ŋùɖo àdodoe dà ɖɛ. Vɔ̀ wo ŋlɔ̀nàbe ènu bàɖàwɔ̀tɔ be ŋùgbe keŋu-keŋu.
8Àmè kè bùnà ye ɖokoea, lɔ̃nà ègbè do àsiwo. Vɔ̀ àmè kè pònà nupo mà-ɖo kɔpea, hɛ̃nà cɔ̃crɔ̃ vana ye ɖokoe ji.
9Àmè kè wɔ̀nà ànùkua, nɔ̀nà àgbè lè tomè fàfa mè, vɔ̀ wo dɔ̃nàto na àmè mà-wɔ̀ ànùkua a.
10Àmè kè le wla nyàwo do àmè kpɔ̀tɛwoa, le do vève sèse na wo. Vɔ̀ àmè kè le gbenyà na wo lè àmèdòmèa, le na wo ŋuti fàfa.
11Àmè kè le wɔ̀ nyuɛ̃a lè sìgbè àgbè be èsìdo nène; Vɔ̀ àmè kèwo le wɔ̀ ènu bàɖàwo be nupo wlana èdrã.
12Àmè kè crìnà àmèa, dona àjrè àmèwo dòmè. Vɔ̀ àmè kè lɔ̃nà àmèa sɔna àgɔ̀jèje kènà fàa.
13Àmè nyanu pònà ènunyatɔ be nupo. Vɔ̀ ènumànyatɔ xɔ̀nà èkpò.
14Ènunyatɔwo lenabè na woabe ènunyawo sìgbè àdɔ̀kùnu nène. Vɔ̀ àmè kèwo gblɔ̃nà ènyà kpòtoewoa kpɔna cɔ̃crɔ̃ kaba.
15Àdɔ̀kùnɔ̀ be àdɔ̀kùnuawo ye xena èmɔ̃ na ènu sia ènu kudo ŋusɛ̃, vɔ̀ èhiã crɔ̃na wɔ̀amènɔ̀wo.
16Àmè kè lè jɔ̀jɔɛa nana àgbè to yebe fɛ̃tu ji. Vɔ̀ àmè bàɖà, wɔ̀nà ènu kpòtoewo kudo yebe àdɔ̀kùnu.
17Àmè kè lɔ̃nà be woa ɖo àfɔ̀ àfɔ̀ ji na yèa, le ji àgbè. Vɔ̀ àmè kè mu lɔ̃nà ètopòɖo òa, buna èmɔ̃ kaba.
18Àmè kè le wla yebe àmè cìcria, nyi àmè màtonyàwo. Àmè kè ɖànàjè ɖo àmèwo sia, nyi àmè kè mu ɖo ènunya òa.
19Àmè kè pònà nupo yùua, le jè àgɔ̀ lè àmèwo ji. Vɔ̀ ènunyatɔ mu pònà nupo sùgbɔ ò.
20Àmè kè wɔ̀nà ènu nyuɛ̃a be nupowo xɔ̀asì wu klòsalò kè kɔ̀ ceŋu-ceŋuã. Àmè bàɖàa be susuwo mu ɖo àsìxɔ̀xɔ ɖe ò.
21Àmè nyuɛ̃a be nupowo nyìnà èdù blibo. Vɔ̀ sùkunɔ̀wo crɔ̃na, ɖo wo mu bùnà èta mè ò.
22Tɔhonɔ̀ be sìtu ye nana àdɔ̀kùnu. Siayicici mu sɔna ènu ɖe kpena ènu ò.
23Ènu bàɖà wɔ̀wɔ dona jìjɔɛ na sùkunɔ̀. Vɔ̀ àmè kè bùnà ye ɖokoea, zɔ̃nà lè ènunya mè;
24Ènu bàɖàwɔ̀tɔ mu jina be ènu bàɖà ne va zɛ̃ yè ò. Àmè kè le wɔ̀ nyuɛ̃a, kpɔna ènyuɛ̃ be fɛ̃tu xɔ̀nà.
25Àya vuɛ̃ kè le pòa, kplɔ̀nà ènu bàɖàwɔ̀tɔ yìnà. Vɔ̀ àmè kè le wɔ̀ nyuɛ̃a, linakè goŋu-goŋu.
26Àzìzɔ yɔ̀nà ŋùkuviwo. Vɛ̃ gbegble nyinyina àɖu. Nène a ke ye kuviɔ̃tɔ dona àdɔ̀mèze na yebe àpetɔ.
27Àmè kè bùnà Tɔhonɔ̀a, nɔ̀nà àgbè dìdì. Vɔ̀ ènu bàɖàwɔ̀tɔa kuna kaba.
28Jìjɔɛ nɔ̀nà nyuɛ̃wɔ̀tɔ be àgbowo mè. Vɔ̀ ènu bàɖàwɔ̀tɔ cina àkòŋùgò.
29Tɔhonɔ̀ kpɔna nyuɛ̃wɔ̀tɔ ji kudo ŋusɛ̃. Vɔ̀ e crɔ̃na ènu bàɖàwɔ̀tɔwo.
30Ènunyuɛ̃wɔ̀tɔ mu jènà ànyi kpɔ ò. Vɔ̀ èmɔ̃ mu lè na ènu bàɖàwɔ̀tɔ lè èdùa mè ò.
31Ènunyuɛ̃wɔ̀tɔ pònà nupo ènunyatɔ̀. Vɔ̀ àjèɖàtɔwo kpena bùsu.
32Àmè kè le wɔ̀ nyuɛ̃a pònà nupo kudo àdɔ̀mè nyuɛ̃. Vɔ̀ ènu bàɖàwɔ̀tɔa blènà àmè.
Mina Bible © Bible Society of Togo, 2014.