Èlododowo 8
8
Ènunya le wɔ̀ yɔyɔ yeye
1Ènunya le wɔ̀ yɔyɔ,
ènunya le do àpa lelele.
Mì mu le sè òa?
2Ènunya tɔtè ɖo ètokɔ̃ɛ
kèwo be gɔ̃mè èmɔ̃a toa ji,
lè èmɔ̃ zɛ̃kpliwo nu.
3E le do àpa lè èdùa be àgbowo nu,
lè àfɔ̀topewo gblɔ̃ be:
4“Mìa àgbètɔ be viwo ye mù le yɔ.
Mù le gblɔ̃ ènyà na mìa kpata.
5Mì àmè kèwo mu ɖo ènunya òa,
mì kpla àlekè wo wɔ̀nà ɖona ènunyaa.
Mì àmè kèwo ènunya hùe do a,
mì kpla àlekè wo wɔ̀nà nyana ènua;
6Mì ɖoto nyuɛ̃ ɖe, ɖo mù la pò nupo
kudo èjì ɖèɖe sɔ gblɔ̃ ènyà àdodoewo.
7Ɛ̃ɛ, mù le to nyàwo,
ɖo mù crìnà àjèɖàɖa be ènyàwo.
8Ènu kè mù gblɔ̃nà kpata sɔ̀nàgbè pɛpɛpɛ.
Nyè mu pònà nupo gbèɖe sɔ blènà àmè ò,
nyè mu ɖànà àjè ò.
9Àmè kè nyana ènua, kpɔna àpe ènyàwo jɔ̀jɔɛ,
àmè kè kùnà ènu mèa, kpɔna wo àdodoe.
10Mì sɔ àpe ènufiɔfiɔ lè klòsalò gbɔ,
mì ji ènunya lè sìka gbɔ.
11Nyàwo be nyi be ènyè ènunyaa,
mù xɔ̀ àsì sɔ wu àcɔɖonuwo kpata,
eye mù gbà xɔ̀ àsì wu ènu
kèwo kpata jrona mìa.”
Ènunya ɖè ye ɖokoe fiɔ
12Ènyè, ènunya, nyè mu crìnà
ènu kè sɔ̀gbè gbà jèa ò.
Mù bùnà ènu ŋuti nyuɛ̃ ɖe gbɔ̀xue wɔ̀nà ɛ̀.
13Àmè kè crì èvuɛ̃a ɖo bùbu na Tɔhonɔ̀.
Mù crì ègòyiyi, àmè cìcri,
ènu kpòtoewo kudo àjèɖàɖawo.
14Àpe èdɔ do àsi ye nyi be ma pòtoɖo na àgbètɔ
eye ma fiɔ ɛ̀ àlekè wo jrànà ɖo jè ŋùkɔ̀
na ènu ɖekpekpe be wɔ̀wɔa.
Mù nyi ènunyatɔ eye mù ɖo ŋusɛ̃.
15Àpe àlɔ̀do ye na èfìɔwo kplɔ̀nà èdù
eye kòjoɖotɔwo wɔ̀nà èse jɔ̀jɔɛwo.
16Ènyè ye nana èga kudo cãmìwo
ɖènàgbè kaka jè àmè kèwo ɖonakòjo
lè ànyigbã kpata jia.
17Nyè ya, mù lɔ̃nà àmè kèwo lɔ̃nà mù a.
Àmè kèwo ji mù a, kènà ɖo ŋuti nyè godo godo.
18Mù nana àdɔ̀kùnɔ̀ kudo bùbu,
ènu kèawo mu gblena ò.
Eye mù gbà nana àjɔ̀ kè jèa.
19Àpe ènu nyuɛ̃wo xɔ̀asì wu sìka
kè kɔ̀ ŋutɔa eye àpe ènunanawo
nyɔ wu klòsalò àdodoe.
20Mù zɔ̃nà lè jɔ̀jɔɛsòso be èmɔ̃ ji,
lè àfɔ̀tope fikè wo wɔ̀nà ɖo èse ji lèa.
21Funua, mù wɔ̀nà nyuɛ̃ na àmè kèwo lɔ̃ mù a,
mù nana woabe àxuewo ɖɔna kudo ènu xɔ̀asìwo.
22Tɔhonɔ̀ ɖo mù cucugbãa,
gbɔ̀xue e va ɖo ènu kpɔ̀tɛ kèwo e wɔ̀a.
23E wɔ̀ mù so xoxo xòxò,
lè ènuwo keŋu be gɔ̃mèjèje,
gbɔ̀xue xixea jɔ̀.
24Àpùwo mu lè gbɔ̀xue wo jì mù ò.
Èsìdo kèwo ɖɔ kudo èsìa cã mu lè ò.
25Wo jì mù gbɔ̀xue wo wɔ̀
èto kudo ètokɔ̃ɛwo.
26Lè gà ŋua mèa, Tɔhonɔ̀ mu kpɔ wɔ̀
ànyigbã àlo àgblèwo kaka
la va wɔ̀ èkɔkui ɖèka ŋutɔ cã ò.
27Mù lè gbɔ̀xue e vlũ jiŋùkusi
ɖo ye tèpe goŋu-goŋu,
gbɔ̀xue e tèflì ɖo àpùwo
kudo jiŋùkusiwo dòmè,
28wàlɛbɛ kè e sɔ lilikpowo ɖo èjia,
wàlɛbɛ kè e sɔ woabe ŋusɛ̃
sɔ na èsìdowo lè èdòa,
29wàlɛbɛ kè e ɖo lipò na àpùwoa,
wàlɛbɛ kè e ɖègbè na èsì be
mu gbà to lipò kèawo ŋuti òa,
wàlɛbɛ kè e ɖo ànyigbã be dodoewo ànyi a,
30wàlɛbɛ ŋua, mù lè, mù gogo Tɔhonɔ̀
eye sìgbè èxɔ̀ be àɖàŋùɖètɔ nènea,
mù dona jìjɔɛ na Tɔhonɔ̀
so ŋùkèkè yì ŋùkèkè.
Mù gblena lè ŋùkɔ̀ na ɛ̀ wè sia wè.
31Mù gblena lè ànyigbã kè e wɔ̀a ji.
Eye mù kènà ɖo àpe jìjɔɛ ŋuti lè àgbètɔwo dòmè.
Sìtume ye nyi àmè kè ɖonato ènunyaa
32“Fifìa, èvi nyèwo mì ɖoto mù.
Sìtume ye nyi àmè kèwo le wɔ̀ ènu kè mù gblɔ̃a!
33Mì ɖoto àpe àmèsìasia ne mìa nyi ènunyatɔwo,
mì mu gbà crì wo ò.
34Sìtume ye nyi àmè kèwo le ɖoto mù a,
kèwo le ɖia àpe àgboa.
35Ɛ̃ɛ, àmèkè kè ɖo ŋuti nyèa,
kpɔ àgbè, eye Tɔhonɔ̀ dàsi ɖo e ji.
36Vɔ̀, àmè kè mu kè ɖo ŋuti nyè òa,
le do àbì ye ɖokoe ŋuti.
Àmè kèwo crì mù a, lɔ̃ èku be ènyà gbɔ.”
Mina Bible © Bible Society of Togo, 2014.