Èlododowo 7
7
Nyɔ̃nù àhasìwɔ̀tɔ nyina àfɔ̀klɛ̃nu na ɖèkajɛwo
1Èvi nyè, ɖo ŋùku àpe ènyàwo ji, ne wòa lebè na àpe ègbè do àsiwo. 2Ne wò ji la nɔ̀ àgbèa, eŋuã lebè na àpe ègbèɖèɖewo kudo àpe ènufiɔfiɔ sìgbè àdɔ̀kùnuwo be àdɔ̀kùnɔ̀ nène. 3Wo ne nɔ̀ àlɔ̀sɔpe na wò eye wòa ŋlɔ̀ wo ɖo àpo èjì mè. 4Sɔ ènunya sìgbè ènɔ̀ wò be èvi nène eye ènunya bèa nyi àpo èxlɔ̃ àdodoe. 5Wo la hlùɛ̃ wò lè nyɔ̃nù àhasìwɔ̀tɔ, nyɔ̃nù àmèjroa be ènyà viviwo si. 6Gbè ɖèkaa, mù lè flɛsɛ̀ to le kpɔ vayì vayìwo. 7Mù kpɔ ɖèvi màto lè àzìcro-mèwo le gble. Lè woa dòmèa, mù kpɔ ɖèkajɛvi kè susu hùe na a cã. 8Ɖèkajɛvia to àjɔdotɔwo be èmɔ̃a ji, lè fikè nyɔ̃nù àhasìwɔ̀tɔa be àxue lèa gbɔ. Eye e le yebe àxomè be èmɔ̃. 9Wètrɔ gbɔ ɖe ye wàlɛbɛ kè xixe mè le cɔ̃, eye èzã le do a. 10Nyɔ̃nùa to va dogò è. E lè àhasìwɔ̀tɔ be àwù mè, eye àyè gɛdɛ na ɛ̀. 11Nyɔ̃nùa mu teŋu lena ye ɖokoe kaka ne èŋù bèa kpɛ̃ ɛ̀ ò. Eye mu teŋu lina ègũi ɖo tèpe ɖèka ò. 12Eji-eji ye e tona, sãnà lè èmɔ̃ to kudo àsìto, nɔ ji ŋusù. 13E le ɖèkajɛa, fã ɛ̀, gblɔ̃ na ɛ̀ ku èjì ɖèɖe be: 14“Mù ɖo àkpe dodo be vɔsa ɖe be ŋùgbè na Mawu. E ve ènu nyè ye mù wɔ̀ ɛ̀ egbè. 15Ènu kèa ŋuti ye mù to va le ji wò eye mù kè ɖo ŋuti wò trolo. 16Mù ɖo àba nyèa vɔ̀, eye kùŋùtu kè mè kɔlà hamè-hamèwo lèa kudo Ejiptè be àbajivɔ àlɛ̃ŋudàtɔ̀ ye mù ɖo ɖo e ji. 17Mù wu anùwɛtrɛ̀ àdodoewo ɖo e ji. 18Va! Ne mia dɔ̃ kaka èŋù bèa kè, mia mu lɔ̃lɔ̃ be àhà. 19Èsrɔ̃ nyè mu lè àxomè ò. E yì èmɔ̃ dìdì ɖe ji. 20E hɛ̃ ègà sùgbɔ ɖo àsi eye e la nɔ̀ funu na wɛ̀tri kè la vaa gbɔ̀xue la gbɔ̀.” 21Nyɔ̃nùa bi ŋutɔ. E blè ɖèkajɛvia kudo yebe ènyà viviwo! 22Eye zè ɖèkaa, e kplɔ̀ nyɔ̃nùa do sìgbè ènyì kè wo kplɔ̀ le yì wùwùgbea nène. Sìgbè ègàmènɔ̀tɔ nènea, ɖèkajɛ sùkunɔ̀ kèa ɖota yebe ètodɔ̃dɔ̃a mè, 23kaka na wàlɛbɛ kè wo la do è èku be àbìa. Eye sìgbè àlekè xèvi zrònà yì èmɔ̃tetre gbɔa, mu le nya be yebe àgbè lè àfɔ̀ku mè ò. 24Fifìa, èvi nyèwo, mì ɖoto mù ne mìa le ŋùku ɖo ènyà kè mù le gblɔ̃a ŋuti nyuɛ̃ ɖe! 25Mì mu gbà na ne nyɔ̃nù kèa hati ne blè mì ò! Mì mu gbà yì ku ci woabe èmɔ̃ ji ò. 26E do àbì àmè fuu ŋuti eye e na wo jè ànyi. Co àmè kèwo keŋu e wùawo nyi àmè sɛ̃ŋu gãke. 27E gbɔ yìyi lè sìgbè èku ŋutɔ gbɔ yìyi nène. Èkuwode ke ye àmè kè le gogo èa, ɖota le yì.
Mina Bible © Bible Society of Togo, 2014.