Èlododowo 4
4
Àvũdɛ̃drɛ̃ sɔ ɖo ènunya
1Èvi nyèwo, mì ɖoto ètɔ be ègbè. Mì hɛ̃ àdòdò eye mìa kpla àlekè wo wɔ̀nà ɖona ènunyaa. 2Ɛ̃ɛ, mù le fiɔ mì ènu kè la dɔ̃ mìa jia, mì mu gbà gbe àpe ènufiɔfiɔwo ò. 3Nyè cã mù nyi èvi nyuɛ̃ na ètɔ nyè va yì, eye ènɔ̀ nyè lɔ̃nà àpe ènyà gbɔ sìgbè èvi àkòŋùgò nène. 4Ètɔ nyè fiɔna mù ènu gblɔ̃nà be: “Le ènyà nyèwo ɖo àsi nyuɛ̃ ɖe, wɔ̀ ènu kè mù le gblɔ̃ na wòa ne wòa nɔ̀ àgbè. 5Ɖo ènunya ne wòa trɔ zũ ènunyatɔ. Mù gbà ŋlɔ̀be àpe ènyàwo eye mù gbà gbe wo ò. 6Mù gbà gbe ènunya ò, e la kpɔ èji wò. Lɔ̃ ɛ̀ ne bèa xɔ̀ na wò gà sia gàmè. 7Ènunya be gɔ̃mèjèje ye nyi be woa drɛ̃ àvũ sɔ ɖo ènunya. Zã ŋusɛ̃ kè lè àsi wòa sɔ ɖo ènunya. 8Ènunya ne nɔ̀ àsi wò ne bèa wɔ̀ wò àmègã. E la na wò la trɔ zũ àmè ŋùkuta ɖe ne wò fã yɔ ɛ̀a. 9E la nɔ̀ na wò sìgbè sìkanu nyuɛ̃ ɖe nène, sìgbè jègbà àdodoe ɖe nène.”
Ènunyatɔ mu ɖo la kplɔ̀ ènu bàɖà do ò
10Èvi nyè, ɖoto mù ne wòa xɔ̀ àpe ènyàwo eye wò la nɔ̀ àgbè dìdì. 11Mù le fiɔ wò ènunya be àfɔ̀tope, mù le fiɔ wò ànùkua wɔ̀wɔ be àgbè nɔ̀nɔ. 12Nène a, wò la zɔ̃ yì ŋùkɔ̀ fàfa ɖe eye, ne wò le pudùa, wò mu la klɛ̃ ènu ò. 13Le ènufiɔfiɔ kè wò xɔ̀a ɖo àsi, mù gbà gble è ɖɛ ò. Le è, e la na wò la nɔ̀ àgbè. 14Mù gbà kpla àmè vuɛ̃wo be àgbè nɔ̀nɔ ò, mù gbà ɖo àfɔ̀ èvuɛ̃wɔ̀tɔwo be àfɔ̀do mè ò. 15Ɖè àsi lè e ŋuti, mù gbà to funu ò! Tàsi ì eye zɔ̃ yì ŋùkɔ̀! 16Àmè kèawo mu teŋu dɔ̃na àlɔ̃ ne wo mu wɔ̀ ènuvuɛ̃ ò. Ne wo wɔ̀ ènu bàɖà ku àmèa gbɔ̀xue ye wo teŋu vònà. 17Ɛ̃ɛ, ènu drã wɔ̀wɔ ye nyi woabe nuɖùɖu, ènu kpòtoe muna wo sìgbè àhà nène. 18Lè ègo ɖe a mèa, àmè kèwo wɔ̀nà ènunyuɛ̃a be àgbè lè sìgbè ŋùdekɛ̃nyɛ be kɔ̀kɔ̀ɛ nène. E kɔ̀nà kaka va ɖona gà woèvè mè. 19Vɔ̀ àmè kèwo wɔ̀nà ènu bàɖàa be àgbè do vìvìti sìgbè èzã nène. Wo mu kpɔna ènu kè la teŋu na wo la jè ànyi ò.
Àfɔ̀tope àdodoea: Ènunya
20Èvi nyè, ɖoto àpe ènyàwo, le ŋùku ɖo àpe ètopòɖowo ŋuti. 21Mù gbà ŋlɔ̀be wo gbèɖe ò, le wo ɖo àpo èjì mè. 22Wo nana àmè kèwo xɔ̀ woa àgbè kudo lãmèsɛ̃. 23Wu e kpataa, le ŋùku ɖo èjì wòa ŋuti, ɖo e ye le nyi àgbè wòa be jɔ̀sope. 24Mù gbà na ne ènu wòa bèa ɖàjè ò, mù gbà pò nupo bàɖà so àmè ɖe ŋuti ò. 25Le ŋùku ɖo àmèwo ŋuti ne wòa nɔ kpɔ wo, ènu ɖe mà wla. 26Bù èta mè gbɔ̀xue wòa jè ènu ɖekpekpe be wɔ̀wɔ gɔ̃mè, sɔ àfɔ̀tope kèwo jèa. 27Mù gbà yì ɖùsi àlo èmìɔ̃ mè ò, si lè èvuɛ̃ gbɔ.
Mina Bible © Bible Society of Togo, 2014.