Èlododowo 3
3
Lekè wo wɔ̀nà ɖona ènunya ò?
1Èvi nyè, mù gbà ŋlɔ̀be àpe ènufiɔfiɔ ò, lè àpe ègbèdoàsiwo ɖo èjì mè. 2Ne wò lebè na woa, wò la nɔ̀ àgbè dìdì eye wò la kpɔ nyɔna. 3Nyi àmè nyuɛ̃ kudo ànùkuamè gà sia gàmè. Bla ènu xɔ̀asì kèawo ɖo èkɔ̀, ŋlɔ̀ wo ɖo àpo èjì mè. 4Nène a, Mawu kudo àgbètɔwo la lɔ̃ wò, eye ènuwo la zɔ̃ sùu na wò. 5Mù gbà dojì ɖo àpo ènunya ŋuti ò, vɔ̀ kudo àpo èjì bliboa, dojì ɖo Tɔhonɔ̀ ŋuti. 6Ɖo tèpe na ɛ̀ lè ènu kè wò le wɔ̀a mè eye e ya, la fiɔ wò àfɔ̀tope. 7Mù gbà susu be yè nyi ènunyatɔ ò, vɔ̀ do bùbu Tɔhonɔ̀ ŋuti eye wòa si lè èvuɛ̃ gbɔ. 8Ekèa la dà èdɔ̀ na àpo àmètia, la do wò ŋusɛ̃. 9Sɔ àpo nyɔnawo sɔ do bùbu Tɔhonɔ̀ ŋuti, ɖè lè àpo nukuwo be àkpa cucugbã tɔ̀a mè na ɛ̀. 10Nène a, nukuwo la nɔ̀ àpo àvàwo ji tɛ̀gbɛ̀, eye àpo vɛ̃-gòwo la ɖɔ kaka kɔ̀ŋùgbe. 11Èvi nyè, mù gbà gbe Tɔhonɔ̀ be àmè sìasia be ènyà ò, yebe ŋùmè kãkãwo mu gbà ɖì kòkoe na wò ò. 12Ɛ̃ɛ, Tɔhonɔ̀ kãna ŋùmè na àmè kè e lɔ̃a sìgbè àlekè ètɔ gbena ènyà na yebe èvi ɖèvea nène.
Ènunya nana nyɔna
13Jɛ̀jrɛ̀ na àmè kèwo kè ɖo ènunya ŋuti eye wo trɔ zũ ènunyatɔa. 14Ɖo ènunya xɔ̀ àsì wu ècikpɔkpɔ. Eye yebe àlèawo nyɔ wu sìka. 15Ènunya ɖo àsìxɔ̀xɔ wu àcɔɖonuwo. Ènu jro àmè ɖekpe mu lè wu ekèa ò. 16E nana àgbè dìdì àgbètɔwo, e hũnà nyɔna kudo àdɔ̀kùnu be èmɔ̃wo na wo. 17E kplɔ̀nà wo to èmɔ̃ nyuɛ̃wo ji, fikè wo la zɔ̃ to kudo èjìgbɔ̃ɖɛ. 18Ènunya lè sìgbè àti kè nana àgbè àmè kèwo va e gbɔa nène. E nyi jɔ̀gbè nyuɛ̃ be sìdo na àmè kèwo kè ɖo e ŋutia. 19Tɔhonɔ̀ wɔ̀ ànyigbã kudo ènunya, eye e sɔ ènunya sɔ vlũ jiŋùkusi. 20To yebe ènumè-kùku mèa, èsì kè lè ànyigbã gɔ̃mèa wo gbàa, eye lilikpowo na èji jànà.
Tɔhonɔ̀ kpɔna ènunyatɔ ji
21Èvi nyè, tɛ ɖo ènunya kudo ŋùgblèdède ŋuti gobi. Mù gbà ɖè àsi lè woa ŋuti gbèɖe ò. 22Wo la na wò la ɖo àgbè nyuɛ̃. 23Nène a, wò la zɔ̃ yì ŋùkɔ̀ ku èjì ɖèɖe eye àpo àfɔ̀ mu la ɖiɖi ò. 24Ne wò mlɔ̃ ànyi a, wò mu la vɔ̃ ò eye wò la dɔ̃ àlɔ̃ bɔ̀kɔ̀ lè àba wò ji. 25Vɔ̃vɔ̃ mu la jè e ji wò kpàtà ò, eye àmè vuɛ̃wo mu la kpɔ èmɔ̃ lè ŋuti wò ò. 26Ɛ̃ɛ, Tɔhonɔ̀ la cɔ̃ àsi ji wò eye e la na wò mu la jè èmɔ̃ ɖe mè ò.
Lekè wo ɖo la lɔ̃ àmè be havia
27Ne wò teŋuã, mù gbà gbe ènyuɛ̃ wɔ̀wɔ na àmè kè lè èhiã mèa ò. 28Ne wò ɖo ènu kè hiã ɛ̀ egbèa, mù gbà gblɔ̃ na havi wòa be: “Jo yì! Mù la nɔ kpɔ èsɔ̀ be mù la teŋu na wò ènu ɖe mà a.” 29Mù gbà nɔ ɖè susu bàɖà ɖekpe so èxlɔ̃ wò kè lè gbɔ wò ku èjì ɖèɖe ò. 30Mù gbà hɛ̃ ènyà kudo àmè ɖekpe gbalo ne e nyi be wo mu wɔ̀ ènu bàɖà ɖe kudo wò ò. 31Mù gbà hùãŋu àmè kè le wɔ̀ èdrãa kaka ne wòa ɖì ì ò. 32Nyàwoa, Tɔhonɔ̀ mu lɔ̃nà àmè kè mu wɔ̀nà ènunyuɛ̃ òa be ènyà ò, vɔ̀ e nyina àmè nyuɛ̃wo be èxlɔ̃. 33Tɔhonɔ̀ sɛ̃nakpɛ̃ na àmè kè le wɔ̀ ènu bàɖàa be xòmè, vɔ̀ e tuna èsì na àmè kèwo wɔ̀nà ènu nyuɛ̃a be xòmèwo. 34Tɔhonɔ̀ kònà àmè kèwo kònà àmèa, vɔ̀ e wɔ̀nà ènyuɛ̃ na àmè bɔ̀bɔɛwo. 35Àmè kè le tɔtè kpɔ ènunyatɔa la kpɔ nyɔna, vɔ̀ èŋù ye la kpɛ̃ àmè màɖè susuwo.
Mina Bible © Bible Society of Togo, 2014.