Èlododowo 5
5
Ènunya biɔ be woa zɛ̃ na nyɔ̃nù àhasìwɔ̀tɔ
1Èvi nyè, le ŋùku ɖo ènunya kè mù le fiɔ wòa ŋuti, ɖoto ètopòɖo kè àpe ènunya le na wòa. 2Ekèa la na wò la nɔ ŋɔjè ènu mè eye àpo àɖe la nɔ to ènunya be ènyà. 3Ɛ̃ɛ, nyɔ̃nù àhasìwɔ̀tɔ be ènyàwo vivina sìgbè ànyisì nène, eye e srànà sìgbè àmì nène. 4Vɔ̀ lè vɔ̀vɔnua, wo va vena kpàa, wo dona àbì àmè sìgbè èwui ènu èvè tɔ̀ nène. 5Nyɔ̃nù kèa be wɔ̀na dona àmè èku, yebe àfɔ̀wo le ɖiɖi yì èyɔ̀ mè. 6Mu sɔna àgbè be èmɔ̃ ò, e buna àfɔ̀tope co mu nyana ɛ̀ ò. 7Eye fifìa, èvi nyè, ɖoto mù. Mù gbà gbe àpe ètopòɖowo ò. 8Mù gbà zɔ̃ kudo nyɔ̃nù kèa hati ò, mù gbà gogo yebe èxɔ̀mɔnu ŋutɔ cã ò. 9Mu nyi nène òa, e la ɖè bùbu tɔ̀xɛ wòa jo eye àmè mà ku ŋuzĩzĩwo la biɔ wò yebe èfɛ̃. 10Àmèjrowo ye la zã àpo ènuwo, àmè mà jèsi ye la va ɖù àpo ègà. 11Vɔ̀vɔnua, ènu la tìkɔ̀ na wò eye wò la va nɔ ŋɛ̃. 12Nène a, wò la va gblɔ̃ be: “Mù gbe àfɔ̀ ɖo àfɔ̀jiwo va yì, nyè mu lɔ̃ ŋùmèkãkãwo ò. 13Nyè mu ɖoto àpetɔ nyèwo be ètopòɖowo ò, nyè mu kè ènu do mè na woabe ènufiɔfiɔwo ò. 14Eye fifìa, mù gɛ̃ ɖo gbledo gã ɖe mè kaka be àmèha kudo dùkɔ̃a gbe mù.”
Lɔ̃ àpo ɖèkajɛmè be èsrɔ̃ kpò
15Èsrɔ̃ wò nyɔ̃nù lè sìgbè àpo èsìdo nène, èsì kè le ji so vudo wòa mè nène. Nù èsì ŋua kpò! 16Mù gbà na ne èsì wòa ne srà yì èkpa godo kaka ne bèa yì àsìdòmè ò. 17Ne nyi wò ɖèka tɔ̀ wò, mù gbà ma ɛ̀ kudo àmè ɖekpe ò! 18Kè ɖo jìjɔɛ wòa ŋuti kudo nyɔ̃nù kè wò ji so ɖèkajɛ mèa: 19E ɖo lɔ̃lɔ̃ sìgbè àvũgbɛ nène; e nya kpɔ sìgbè èsèe nène. Na ne ènu ne nyɔ na ɛ̀. Yebe àmètia ne nɔ do jìjɔɛ na wò tɛ̀gbɛ̀! Ɖo lɔ̃lɔ̃ na ɛ̀ ɖehòmèku kpò! 20Èvi nyè, nukɛ ŋuti ye wò le lɔ̃ àmè bu be nyɔ̃nù kaka la va nɔ le ànɔ na ɛ̀ ò? 21Ɛ̃ɛ Tɔhonɔ̀ le kpɔ àgbètɔwo be wɔ̀na, e le kpɔ àmè sia àmè lè yebe wɔ̀wɔwo mè. 22Àmè kè le wɔ̀ ènu bàɖàa la nyi gàmènɔ̀tɔ na yebe àgɔ̀jèjewo. Wo la nɔ̀ na ɛ̀ sìgbè èmɔ̃ tetre nène. 23E la ku, ɖo mu xɔ̀ kpakpla ò. Yebe àɖàhùa gãa la crɔ̃ ɛ̀.
Mina Bible © Bible Society of Togo, 2014.