Èlododowo 2
2
Ènunya nyi àdɔ̀kùnu wawla
1Èvi nyè, ɖoto àpe ènyàwo,
le àpe ègbè do àsiwo mè ɖo àsi.
2Ɖoto ènunya be ènufiɔ-àmè
ne wòa ji ènu gɔ̃mè sèse.
3Ɛ̃ɛ, biɔ ènunya ne bèa kpe ɖo ŋuti wò,
yɔ ènyà jɔ̀jɔɛ ne bèa do wò àlɔ̀.
4Ji ènunya sìgbè àlekè wo jina ègàa nène.
Ji ì kudo àɖàŋù sìgbè àlekè wo jina àdɔ̀kùnu a nène.
5Ne wò wɔ̀ ènu kèawo kpataa,
wò la sè bùbu ɖoɖo na Tɔhonɔ̀ be gɔ̃mè
eye wò la nya Mawu.
6Ɛ̃ɛ, Tɔhonɔ̀ ye nana ènunya,
ènugɔ̃mè kùku kudo ènunya so e gbɔ.
7E kpena ɖo àmè jɔ̀jɔɛwo ŋuti.
E nyina àkpoxɔ̀nu na àmè
kèwo wɔ̀nà ànùkua a.
8E lenabè na àmè kèwo dona bùbu èsewo ŋutia.
E lena ŋùku ɖo yebe èxlɔ̃ ànùkuamèwo be èmɔ̃wo ŋuti.
9Ne wò ɖoto mù a, wò la nya ekèa be:
jɔ̀jɔɛ, èse ji wɔ̀wɔ ku ànùkua wɔ̀wɔ
kplɔ̀nà àmè yì jɔ̀gbè nyuɛ̃ mè.
10Ènunya la gɛ̃ ɖo àpo èjì mè
eye wò la ɖɔ ènunya kpɔ ku jìjɔɛ.
11Ŋùgblèdède ne cɔ̃ ji wò
eye ènunya ne kpɔ ji wò.
12Wo la kplɔ̀ wò ne mù gbà jè èvuɛ̃ mè ò.
Wo la ɖè wò to lè àjèɖàtɔwo dòmè,
13lè àmè kèwo gbe èmɔ̃ jɔ̀jɔɛa toto
eye wo ke ɖo èmɔ̃ vuɛ̃ a ŋuti.
14Àmè kèawo nɔ̀nà jìjɔɛ mè sɔ wɔ̀nà èvuɛ̃,
wo kpɔna jìjɔɛ lè woabe èhlɔ̃ dãdãwo mè.
15Wo mu tona nyàwo ò
eye woabe wɔ̀nawo nyi ènu gɔ̃glɔ̃.
16Nène a ye wò la gbe ènu lè nyɔ̃nù àhasìwɔ̀tɔ ŋuti,
la glo àmèjro nyɔ̃nù ènumèvivitɔa be èmɔ̃ tetrea.
17Àmèjro kèa gbe yebe èxlɔ̃ tùgbɛ̀jɛmètɔ̀a,
nènea, e gble zòɖùɖu kè lè ye ku Mawu dòmèa.
18Yebe zɔ̃zɔ̃ le kplɔ̀ ɛ̀ yì cɔ̃crɔ̃ mè.
Eye yebe wɔ̀nàawo le ɖiɖi ì yì kaka èkuwode.
19Àmè kèwo kpata le yì e gbɔawo
mu la gbà trɔ gbɔ̀ gbèɖe ò.
Wo mu la gbà trɔ kpɔ àgbè be èmɔ̃a ò.
20Eŋuã, sɔ àmè nyuɛ̃wo be èmɔ̃,
srɔ̃ àmè kèwo le wɔ̀ ènyuɛ̃a.
21Nyàwo, àmè jɔ̀jɔɛwo la nɔ̀ ànyigbã a ji,
àmè kèwo ŋuti ènyà ɖekpe mu kù ɖo òa
kpò ye la nɔ̀ funua.
22Vɔ̀, wo ɖo la ɖè àmè vuɛ̃wo jo,
àmè kèwo mu tona nyàwo òa,
la jo lè ànyigbã a ji.
Mina Bible © Bible Society of Togo, 2014.