Èlododowo 29
29
1Gbledo zɛ̃nà àmè kè mu lɔ̃nà be woa gbe ènyà na yè òa, kaba. Eye e hɛ̃nà cɔ̃crɔ̃ va na ɛ̀.
2Dùkɔ̃a kpata la nɔ̀ jìjɔɛ mè, ne àdɔ̀mè nyuɛ̃wɔ̀tɔ le kplɔ̀ èdùa. Vɔ̀a, àɖuklui ɖùɖu ye nɔ̀nà dùkɔ̃a mè ne èdùkplɔ̀tɔa le zĩ àmèwo ɖo ànyi a.
3Àmè kè lɔ̃nà ènunya be àgbè nɔ̀nɔa, dona jìjɔɛ nana ètɔa. Vɔ̀a, ègà mu nɔ̀nà ègo mè na àmè kè le do èha kudo àhasìwɔ̀tɔwo ò.
4Èfìɔ kè wɔ̀nà ɖo èse jia, dona bùbu yebe èdùa ŋuti. Vɔ̀a, èfìɔ kè ye kãna ègà na dùkɔ̃a mà gbɔ̃jɛ̃a, le crɔ̃ èdùa.
5Kàfù kafu nyina èmɔ̃ tetre na àmè havi.
6Ènudakàwɔ̀tɔ be àgɔ̀jèjewo nyina èmɔ̃ tetre. Vɔ̀a, ènunyuɛ̃wɔ̀tɔwo nɔ̀nà jìjɔɛ kpɔkpɔ mè tɛ̀gbɛ̀.
7Ènunyuɛ̃wɔ̀tɔ ɖona tèpe na wɔ̀amènɔ̀wo. Vɔ̀a, ènudakàwɔ̀tɔ mu ɖo gàmè kaka la va bù wɔ̀amènɔ̀wo be ènu ɖe ŋuti ò.
8Èseblatɔwo hɛ̃nà tìtɔ̀titɔ va na èdù mè. Vɔ̀a, ènunyatɔwo teŋu ɖona àsi dùkɔ̃a be àdɔ̀mèze ji.
9Ne ènunyatɔ ɖe kpe ènyà kudo sùkunɔ̀a, ne e le bijì àlo e le kònu cã a, mu la kpɔ èhlò la nù èsì ò.
10Èhlɔ̃dãtɔ crìnà ènyuɛ̃wɔ̀tɔ be ènyà gbɔ, vɔ̀a, àmè jɔ̀jɔɛwo lɔ̃nà woabe ènyà gbɔ.
11Sùkunɔ̀ be èjìbipe mu nya kpɔna ò, vɔ̀a, ènunyatɔ ya nyana ye ɖokoe lele eye e nɔ̀nà kpoo.
12Èfìɔ kè sɔna àjè ɖàɖa sɔ wɔ̀nà èdɔa, dona yebe cãmìwo ŋuzĩzĩme.
13Ènu kè Tɔhonɔ̀ na wɔ̀amènɔ̀ kudo àmè kè zĩna àmè ɖo ànyi ɖo èdùa, ye nyi be: “Wo ɖo ŋùkuviwo ne woa sɔ kpɔ ènu”.
14Èfìɔ kè le sò jɔ̀jɔɛ kaka le sò è na wɔ̀amènɔ̀wo cã a, be fìɔdua linakè goŋu-goŋu.
15Èkpò kudo ènyà gbegbewo nana ènunya, vɔ̀a, sumɔ̃vi kè wo mu le gbe ènyà na òa, nyina tagbã na ènɔa.
16Èhlɔ̃dãdã bɔna lè fikè ye ènudakàwɔ̀tɔwo sùgbɔ lèa. Vɔ̀a, gbè ɖèka kpò ye wo la jè ànyi lè ènyuɛ̃wɔ̀tɔ be ŋùkɔ̀.
17Dɔ̃ èto na èvi wò ne wòa jrà ɛ̀ ɖo kpoo. Eye èsɔ̀a, e la va do jìjɔɛ na wò.
18Ne àmè ɖekpe mu le bùtamè so èsɔ̀ kè gbãnà ŋuti òa, hũnyà-hũnyà nɔ̀nà èdùa mè. Vɔ̀a, àmè kè le wɔ̀ ɖo èse jia, nɔ̀nà ŋuti fàfa mè.
19Ènyà mu fiɔna ènunyuɛ̃ sumɔ̃vi ò. Ne e gbà sè e mè cã a, mu la wɔ̀ ɖo e ji ò.
20Ne wò kpɔ àmè ɖe le pò nupo màbù e ŋuti kpɔa, eŋuã wò la susu lekè sùkunɔ̀ ya tɔ̀ la teŋu nɔ̀a.
21Àmè kè le kebe yebe sumɔ̃vi so yebe ɖèvi mèa, le do è kuviɔ̃tɔ.
22Àmè kè binajì kabaa, hɛ̃nà àjrè va na. Nène a ke, e wɔ̀nà nuvuɛ̃ sùgbɔ.
23Mawu ye la ɖiɖi àmè kè le ko ànyaa. Vɔ̀a, e kɔna àmè kè sɔ ye ɖokoe wɔ̀ sumɔ̃via, yì ji.
24Àmè kè le do èha kudo fìãfì a, le dovlo ye ɖokoe. E nyana gbledo kè le tɔtè kpɔ ɛ̀a, co vɔ̀a, mu kènà ènu lè e ji sɔ ɖè èxlɔ̃a sia ò.
25Àmè kè vɔ̃na àmè kpɔ̀tɛawo, jènà èmɔ̃ mè. Vɔ̀a, àmè kè dojì ɖo Tɔhonɔ̀ ŋutia mu vɔ̃na ò.
26Àmè sùgbɔ jina kàfù kafu so woabe ŋùkɔ̀nɔ̀tɔwo gbɔ. Vɔ̀a, Tɔhonɔ̀ ye dànà àmè sia àmè kpɔ.
27Àmè kè wɔ̀nà nyuɛ̃a, crìnà àmè bàɖà be ènyà gbɔ. Nène a ke ye àmè bàɖà cã crìnà àmè nyuɛ̃a yeŋu.
Mina Bible © Bible Society of Togo, 2014.