Èlododowo 28
28
1Àmè kè wɔ̀nà ènu bàɖàa sina, ne àmè ɖekpe mu le nyà ɛ̀ cã òa. Vɔ̀a, àmè kè wɔ̀nà ènyuɛ̃a kãna ɖo ye ɖokoe ji sìgbè jãŋùtavi nène.
2Ne hũnyà-hũnyà jɔ̀ lè èdù ɖe mèa, àmè sia àmè nyina àpetɔ. Vɔ̀a, ne èdùkplɔ̀tɔa nyi ènunyatɔ gbà ɖènà àɖàŋùa, yebe jiɖùɖua linakè goŋu-goŋu.
3Àmè kè zĩna àmè gbɔjɔ gbɔjɔwo ɖo ànyi a lè sìgbè èjijàja kè le gble nukuyàyawoa nène.
4Àmè kè mu wɔ̀nà ɖo èse ji òa, kanafu àmè nyrãkuwo. Vɔ̀ àmè kè wɔ̀nà ɖo èse jia, mu kãmana na àmè nyrãkuwo ò.
5Àmè nyrãku mu sɔnaɖe lè èse ji wɔ̀wɔ mè ò. Vɔ̀a, àmè kè jina Tɔhonɔ̀a, sènà èse ji wɔ̀wɔ be gɔ̃mè.
6Wɔ̀amènɔ̀ kè le nɔ̀ àgbè lè ànùkua mèa, nyɔ wu ècitɔ kè lè èmɔ̃ gɔ̃glɔ̃ jia.
7Ɖèvi kè le wɔ̀ ɖo èse jia, ɖo ènunya. Vɔ̀a, àmè kè le do èha kudo gbèvũviwoa, le do ŋùkpɛ̃ ètɔa.
8Àmè kè do ègà jì gà èfĩtɔ̀ sɔ kpɔ ècia be àdɔ̀kùnuwo la va ci ànyi na àmè kè le wɔ̀ ènyuɛ̃ na wɔ̀amènɔ̀woa.
9Ne àmè ɖe tu yebe ètowo do èsea, yebe kuefã ŋutɔ cã nyi ènu nyɔŋu.
10Àmè kè le tùtù àmèwo ɖo èmɔ̃ vuɛ̃ jia, la va jè èdo kè e kùa mè. Vɔ̀a, ànùkuamèwo la kpɔ nyɔna.
11Ècitɔ susuna be yè nyi ènunyatɔ. Co, wɔ̀amènɔ̀ kè ɖo ènunyaa nya ènu kè ŋùkumè be nyi tututua.
12Ne ènunyuɛ̃wɔ̀tɔ le kplɔ̀ èdùa, ŋuti fàfa ku jìjɔɛ nɔ̀nà ànyi. Vɔ̀a, ne àmè nyrãku le kplɔ̀ èdùa, àɖuklui ɖùɖu ye nɔ̀nà ànyi.
13Àmè kè wlana yebe èdɛ̃ bàɖàa, mu kpɔna jiɖùɖu ò. Vɔ̀a, àmè kè le do è jèsi eye e le ɖè àsi lè ye ŋutia, la kpɔ sɔsɔkè.
14Àmè kè le vɔ̃ ènu bàɖàwɔ̀wɔa nyi sìtume. Vɔ̀a, àmè kè mu sènà ètonu òa, la kpɔ gbledo.
15Kplɔ̀tɔ nyrãku kè le zĩ wɔ̀amènɔ̀wo ɖo ànyi lè dùkɔ̃a mèa, lè sìgbè jãŋùta kè lè àdã ji, àlo ègbemèlã kè le ji la trɛ̃ àmèa nène.
16Kplɔ̀tɔ kè mu ɖènà susu òa, tanafu àmè wè sia wè. Vɔ̀a, àmè kè crìnà àmè bàɖà be ènyà gbɔa, nɔ̀nà àgbè dìdì.
17Èhlɔ̃dãtɔ sina kaka yì yebe èyɔ̀do mè: mu hiã be woa nyà ɛ̀ kaka va yì le è ò.
18Àmè kè lè àgbè lè ànùkua wɔ̀wɔ mèa la gã. Vɔ̀a, àmè kè le ɖù ènu èvèa, la crɔ̃ lè ɖèka àlo èvègɔ̃a mè godo.
19Ènuɖùɖu nɔ̀nà àmè kè le dà ye ŋutɔ be àgblèa si. Vɔ̀a, àmè kè mu le ji la wɔ̀ ènu ɖɔ̀hũi ɖekpe òa, la nyi ènuwɔ̀donɔ̀ kaka yì.
20Àmè kè le wɔ̀ ànùkua a, ɖɔna kudo sìtu. Vɔ̀a, àmè kè le hlà àmè bu be ènuwo sɔ kpɔ ècia, la kpɔ ètodɔ̃dɔ̃ gbè ɖèka.
21Mu nyɔ be woa do vòvòtoto àmèwo dòmè ò. Co, àmè ɖe teŋu zĩ àmè bu be ènu ji jro.
22Àmè kè àmè bu be ènu jronaa, pu dù kplɔ̀ àdɔ̀kùnu do. Eye mu nya be èhiã kplɔ̀ yè do ò.
23Kpoeɖea, mi kanafu àmè kè le gbe ènyà na mia, sɔ wu àmè kè le dɔ̃ ènu gbegble wɔ̀wɔ ji na mia.
24Àmè kè le fĩ ètɔa kudo ènɔa, vɔ̀a le gblɔ̃ be: “Mu nyi ènu bàɖà òa”, lè sìgbè fìãfĩ ke nène.
25Àmè be ènu bìaŋùku na àmè hɛ̃nà àjrè vana. Vɔ̀a, àmè kè sɔ yebe ŋùɖo kpata dà ɖo Tɔhonɔ̀ jia, trɔnazũ ècitɔ.
26Àmè kè sɔ yebe ŋùɖo dà ɖo ye ŋutɔ ɖokoe jia, nyi àmè màɖè susu. Vɔ̀a, àmè kè ɖo ènunyaa, ɖùnà gbledowo kpata ji.
27Àmè kè nana ènu wɔ̀amènɔ̀woa, mu hiãna ènu ɖekpe ò. Vɔ̀a, gbledo ye kɔ̀nà ɖo àmè kè mu sɔɖe lè e mè na wɔ̀amènɔ̀wo òa ji.
28Àmè sia àmè ɖona yebe àkumè ne ènudrãwɔ̀tɔ ɖe xɔ̀ ŋùkɔ̀ na èdùa be kpɔ̀kplɔa. Ne e va kua, ènudrãwɔ̀tɔwo trɔna èjì mè eye ènyuɛ̃ wɔ̀wɔ drina ɖo ji fuu.
Mina Bible © Bible Society of Togo, 2014.