Èlododowo 30
30
Àgur be ènyàwo
1Yàke be èvi ŋusù Àgur be ènyà ɖè ɖovò. Ènyà kè e gblɔ̃ na Itìɛl, na Itìɛl kudo Ukàl va yìa, ye kè:
2“Ɛ̃ɛ, mù jɔ̀ sùkunɔ̀ ŋutɔ ne ma nyi àmè,
nyè mu ɖo àgbètɔ be ènunya ò.
3Nyè mu kpla ènunya kè la na
mù la teŋu nya àmè kè nyi àɖèsã cã tètè ò.
4Àmè kɛ ye lia jiŋùkusi eye e gbà ɖì ò?
Àmè kɛ ye le àya ɖo àlɔ̀ mè ò?
Àmè kɛ ye kù èsì ɖo yebe àwù mè ò?
Àmè kɛ ye ɖo ànyigbã be lipòwo ò?
Leke ye wo yɔna ɛ̀ ò?
Èvia be nyikɔ ɖe? Wò nya ɛ̀a?
5Kãkãɖoji lè Mawu be ènyàwo kpata mè. Àkpoxɔ̀nu be nyi na àmè kèwo le wɔ̀ ɖo woa jia. 6Mù gbà sɔ ènyà ɖekpe sɔ kpe Mawu be ènyàwo ò. Mu nyi nène òa, e la va kã ŋùmè na wò eye wò la ze sìgbè àjèɖàtɔ nène.
7Mawu nyè, ènu èvè kpò ye mù le biɔ wò be ne wòa na mù gbɔ̀xue ma va ku. 8Ɖè àjèɖàɖa kudo ènu mà sɔ̀gbè wɔ̀wɔ jo lè gbɔ nyè boo. Mù gbà na mù ècikpɔkpɔ àlo èhiã jèje ò. Vɔ̀a, na mù ènu kè jè ne ma sɔ nɔ̀ àgbèa kpò. 9Nyàwo, ne mù kpɔ èci ŋutɔa, mù teŋu gbe wò gblɔ̃ be: “Àmè kɛ ye nyi Tɔhonɔ̀ ò?” Eye ne mù jè èhiã ŋutɔa, mù teŋu trɔ zũ fìãfĩ. Nène a, nyè mu la gbà do bùbu Mawu be nyikɔ ŋuti ò.
10Mù gbà gblɔ̃ sumɔ̃vi ɖe be ènyà bàɖà na yebe àpetɔa ò. Mu nyi nène òa, e la sɛ̃kpɛ̃ na wò eye wò la tu àgɔ̀ kèa be èfɛ̃.
11Àmè ɖewo sɛ̃nakpɛ̃ na woa tɔ eye wo mu tunasì na woa nɔ̀ ò.
12Àmè ɖewo susuna be yèwo mu ɖo ŋùmè kãkã ɖe ò, vɔ̀a, wo mu tutu woabe àfɛ̃nuwo jo ò.
13Àmè ɖewo ɖɔ kudo ègòyiyi eye wo kpɔna àmè kpɔ̀tɛawo kudo ŋùku bàɖà.
14Àmè ɖewo be àɖuwo dìdì sìgbè èwui nène eye woabe àglãwo ɖa sìgbè kàkla nène. Wo trɛ̃na èdùa be ènuwɔ̀donɔ̀wo eye wo buna ŋùkumè na wɔ̀amènɔ̀wo lè àmèwo dòmè.”
Èlododo kèwo zɔ̃ ɖo hɛ̃hlɛ̃ jia
15Àvlɔkui kè nùnà èhũa ɖo nyɔ̃nùvi èvè. Wo gblɔ̃ be: “Na ènu, na ènu!” Ènu mu sùnà ènuɖoɖo ètɔ̃ ɖewo gbèɖe ò. Ènè buwo mu gblɔ̃ kpɔ be: “E sù ò!”
16Woawo ye nyi èkuwode, nyɔ̃nù èkònɔ̀a.
Ànyigbã kè èsì mu le sù òa.
Ènègɔ̃a ye le nyi èzò. Mu gblɔ̃nà gbèɖe be “E sù nène ò”
17Ne àmè ɖe le kò ètɔa, ne e gbe be yè mu la sè ètonu na ènɔa òa, àkpàfiɔ̃wo la trɔ̃ ŋùku na ɛ̀, lè ètɔ̀ to. Eye àklàsuwo la ɖù yebe ŋutilã.
18Ènugɔ̃mè sèse ètɔ̃ ɖewo to àpe ènunya ŋuti. Ɛ̃ɛ ènè bòhũ ye wo nyi, nyè mu teŋu le sè wo gɔ̃mè ò:
19Èhɔ̃ be zòzro to àya mè, èdã be zɔ̃zɔ̃ to àkpã ŋuti,
àpùjihũ be èmɔ̃ zɔ̃zɔ̃ to àpù be dòdòmè.
Ènègɔ̃a ye nyi be ŋusù be nyɔ̃nù gbɔ yìyi.
20Ènu kè nyɔ̃nù kè dona àfɔ̀ ègbea wɔ̀nà ye nyi ekèa: e la ɖù co, la tutu ènu to, gblɔ̃ be: “Nyè mu wɔ̀ ènu bàɖà ɖe ò!”
21Ènu ètɔ̃ ye nana xixea hũhũna,
oò, ènu ènè bòhũ be ŋùkɔ̀ ye mi mu teŋu nɔ̀nà tè lè ò:
22Èkluvi kè va trɔ zũ èfìɔa,
sùkunɔ̀ kè mu ɖɔnapò gbèɖe òa,
23nyɔ̃nù kè dè àmè sia àmè nua be èsrɔ̃ɖèɖe.
Ènègɔ̃a ye nyi be: Àmègbɔnɔ̀vi kè va xɔ̀ àsu lè àxuenɔ̀a sia.
24Lè ànyigbã jia, èlã hamè-hamè ènè ɖewo lè, wo hùe ŋutɔ. Vɔ̀a, wo ɖo ènunya tɔ̀hɛ:
25Àɖiɖeviwo; wo mu ɖo ŋusɛ̃ ò, vɔ̀a, wo bɔ̀nà woabe ènuɖùɖu lè nukuyàya be hùenu.
26Wɛ̀tɛ̀klɛ̀wo mu ɖo ŋusɛ̃ ò, vɔ̀a, àkpãwo mè ye wo kùnà woabe èdowo ɖo.
27Tìkpotìkpowo mu ɖo èfìɔ ò, vɔ̀a, wo zɔ̃nà hòo lè ɖoɖo nu.
28Àdòŋùglowo, wo la teŋu le wo kudo àsi vɔ̀a, wo yìnà èfìɔsawo mè ŋutɔ cã.
29Ènu àgbèagbè ètɔ̃ ɖewo lè kèwo nya kpɔkpɔa. Ɛ̃ɛ, ènè ye wo nyi eye woabe àzɔ̃lìmè nyanakpɔ:
30Jãŋùta, èlãwo be kãlìsu,
mu yìnà ŋùgbe lè ènuɖekpe be ŋùkɔ̀ ò.
31Kòklosu kè nɔ̀tè ɖo yebe àfɔ̀ èvèwo ji, àlo gbɔgbɔɛ.
Ènègɔ̃a ye nyi èfìɔ kè be ŋùkɔ̀ àmè ɖekpe mu nɔ̀nàtè ɖo òa.
32Ne ègòyiyi wòa le do wò àɖàhùa eye wò va yì ɖokoe wò mèa, wòa nya ènupo pòpo e yomè. 33Nyàwo, ne wò kpà àmì lè nyìnɔsi be ŋùmèa, wò la kpɔ bɔtà; ne wò sɔ ŋɔ̀ti pò ènua, èhũ la to; ne wò do àdɔ̀mèze na àmè ɖe a, e la hɛ̃ àjrè va.
Mina Bible © Bible Society of Togo, 2014.